Mavangu ma Zintumwa
9 O Saulu wau kavumisanga yo vava vonda alongoki a Mfumu,+ wele kwa ngang’ambuta, 2 unlombele nkanda kimana kenda muna masambilu kuna Damaseke, katwasa muna Yerusaleme, awonso ana kesolola bena muna Nzila,+ akala ye akento.
3 Ekolo kakangalanga, ofinamene Damaseke, vana vau ntemo utukidi kuna zulu untemene,+ 4 obwidi vana ntoto, owidi e ndinga, oku vo: “E Saulu, e Saulu, ekuma okumbangikilanga?” 5 Oyuvuidi vo: “Ongeye u nani e Mfumu?” Ovutwidi vo: “Mono i Yesu,+ ona obangikanga.+ 6 Telama, kota muna mbanza, ozayiswa dina ofwete vanga.” 7 O wantu ana bakangalanga yandi baningamene lembi vova diambu, bawidi e ndinga, kansi ke bamwene muntu ko.+ 8 I bosi Saulu otelamene, kana una vo meso mandi matemoka, kansi kamonanga ko. Bansimbidi muna koko, banète kuna Damaseke. 9 Lumbu tatu kakala, yandi kamoni,+ yandi kadie, ngatu nua.
10 Muna Damaseke mwakala nlongoki nkumbu andi Ananiya,+ o Mfumu umvovese muna mona-meso vo: “E Ananiya!” Ovutwidi vo: “Mono oyu, e Mfumu.” 11 O Mfumu umvovese vo: “Telama, wenda muna nzila iyikilwanga vo Singama, vava muntu una ye nkumbu a Saulu, musi Taso+ una muna nzo a Yuda. Owau mu samba kena, 12 muna mona-meso omwene muntu okotele, nkumbu andi Ananiya, untensekele moko kimana kamona diaka.”+ 13 Kansi Ananiya ovutwidi vo: “E Mfumu, wantu ayingi yawidi bavovelenge mambu ma muntu ndioyo ye mpasi zawonso kavangidi kw’aveledi aku muna Yerusaleme. 14 Oveno mpe e wisa kwa nganga zambuta kimana kakanga awonso bevovelanga e nkumbu aku okwaku.”+ 15 Kansi, Mfumu umvovese vo: “Wenda, e kuma kadi o muntu ndioyo i sadilwa yasola+ mu nata e nkumbu ame kwa esi zula,+ kw’atinu+ ye kwa wan’a Isaele. 16 Kadi itoma kunsonga e mpasi zawonso kemona muna nkumbu ame.”+
17 Ananiya wele, okotele muna nzo, untensekele moko yo vova vo: “E Saulu, e mpangi, o Mfumu Yesu ona omonekene kwa ngeye muna nzila ina wizidi, untumini kimana o meso maku mamona diaka yo zala yo mwand’avelela.”+ 18 Vana vau, muna meso mandi mwavaika e lekwa yakala nze mavavala, omwene diaka. I bosi otelamene, ovubilu, 19 odidi, okumamene.
Okedi yaka lumbu ye alongoki muna Damaseke,+ 20 vana vau oyantikidi longa muna masambilu mu kuma kia Yesu vo, yandi i Mwan’a Nzambi. 21 Awonso ana banwidi basivikidi yo vova vo: “Ke yandi ko wabangikidingi awana bavovelenge nkumbu yayi muna Yerusaleme?+ Nga ke kani dia kubakanga ko yo kubanata kwa nganga zambuta kezidi kwaku e?”+ 22 Kansi, Saulu wakumamanga kikilu yo sivikisa Ayuda ana bakala muna Damaseke wau kasonganga ye sikididi kiawonso vo ndioyo i Kristu.+
23 Vava kiavioka lumbu yayingi, Ayuda bavuende mfulu kimana bamvonda.+ 24 Kansi, e kani diau dizayakene kwa Saulu. Balangidilanga mavitu fuku yo mwini kimana bamvonda. 25 Muna diadi, alongoki andi banete muna fuku, bankulumwini muna kitunga vana vundu dia yaka kia mbanza.+
26 Vava kalweke muna Yerusaleme,+ ovangidi mawonso mu yikama alongoki, kansi awonso bàmwene o wonga, e kuma kadi ke bakwikidi ko vo yandi mpe nlongoki. 27 Muna diadi, Banaba+ wizidi sadisa Saulu, unète kwa antumwa, otomene kubasamunuina una kamwenene Mfumu+ yo vovana yandi muna nzila, ye una kasamunuini e nkumbu a Yesu kuna unkabu kuna Damaseke.+ 28 Saulu okwamanene yau yo kwenda* mu fulu yawonso muna Yerusaleme yo samuna e nkumbu a Mfumu kuna unkabu wawonso. 29 Wamokenanga yo filana e mpaka ye Ayuda bavovanga Kingerekia, kansi oyau bavavanga kumvonda.+ 30 Ampangi vava bazaya wo, bakulumukini yandi kuna Kaisaria, bansindikidi kuna Taso.+
31 I bosi, e nkutakani muna Yuda yawonso, Ngalili ye Samaria,+ yavuvama yo kumama; wau vo yakangadilanga muna vumi wa Yave* ye muna lufiaulwisu lwa mwand’avelela,+ yawokelanga.
32 Wau vo Petelo wakangalanga muna zunga kiawonso, wakulumuka mpe kw’aveledi ana bakala muna Luda.+ 33 Kwakuna, wawana ko muntu, nkumbu andi Aineya, walavalala vana mfulu andi se mvu nana, kadi mbevo a vola kakala. 34 Petelo umvovese vo: “Aineya, Yesu Kristu usaswidi.+ Telama, kubika e mfulu aku.”+ Vana vau otelamene. 35 Awonso bakala muna Luda ye kuna Ndimb’a Sarone bamwene dina diavangama kwa Aineya, bakwikidi muna Mfumu.
36 Kansi muna Yafo mwakala yo nlongoki ankento, nkumbu andi Tabita, ina yasekolwa vo, “Doka.”* Mavangu mayingi mambote kakala mau, lusadisu lwayingi mpe kavananga kwa asukami. 37 Kansi muna lumbu yayina wayela yo fwa. Ozevo, bansukula yo kunlekesa muna suku dia ntandu. 38 Wau vo Luda lukufi yakala ye Yafo, alongoki vava bawa vo Petelo muna mbanza yayina kakala, batuma akala wole benda kundodokela vo: “Dodokolo, wiza nswalu kwa yeto.” 39 Muna diadi, Petelo watelama yo kwenda yau. Vava kalwaka, batomboka yandi kuna suku dia ntandu; akento awonso bafwilwa akala batelama vana kakala, badilanga yo songa yinkutu ye yunga yayingi ina Doka kavanganga vava kakala moyo. 40 I bosi Petelo ovaikisi awonso kuna mbazi,+ ofukamene, osambidi. I bosi, ovilukidi kuna kwakal’e vimbu, ovovele vo: “E Tabita, telama!” Otemwene meso, omwene Petelo, ovumbukidi.+ 41 Untambikidi o koko, untelamese, obokele aveledi ye akento bafwilwa akala, ubasunzwidi Tabita, wamoyo.+ 42 Ediadi dizayakene muna Yafo yawonso, ayingi bakwikidi muna Mfumu.+ 43 Petelo onangini lumbu yayingi muna Yafo kumosi yo nkubiki a nkanda mia bulu wayikilwa vo Simone.+