Kuna kwa Esi Ngalatia
4 Edi mpovele vo, o mvingidi e vua ekolo kena nleke, kaswaswane ye ntaudi ko, kana una vo yandi i mfumu a lekwa yawonso, 2 kadi una muna wisa kia ayingidi ye selo yavana kifwana ntangwa yasikidiswa kwa se diandi. 3 Diau dimosi, yeto mpe vava twakala yingiana-ngiana, twabundunuanga muna mambu ma nza yayi makondwa o mfunu.+ 4 Kansi vava kiafwana e ntangwa, Nzambi watuma Mwan’andi, ona wawutwa kwa nkento+ ye wakala kuna nsi a nsiku,+ 5 kimana kafuta e ntalu muna kûla awana bena kuna nsi a nsiku,+ kimana o Nzambi katutambula nze wan’andi.+
6 Wau vo nu wan’andi, Nzambi watuma mwanda+ a Mwan’andi muna ntima mieto,+ una ukazanga vo: “Aba,* e Tata!”+ 7 Dianu vo, ke nu ntaudi diaka ko, kansi nu wana; wau vo nu wana, nutambula mpe e vua muna Nzambi.+
8 Kansi, vava ke nuazaya Nzambi ko, nuabundunuanga kwa nzambi zina vo ke nzambi kieleka ko. 9 Kansi wau nuazaya Nzambi yovo nuazayakana kwa Nzambi, ekuma luvutukidi diaka muna mambu mantete matovoka+ ye makondwa mfunu yo bundunwa diaka?+ 10 Nusianga e sungididi kia lunda e lumbu, ngonde,+ nsungi ye mvu. 11 Wonga ngina wau mu kuma kieno, dilenda kala vo nkatu-nkatu yafuntukila mu kuma kieno.
12 Ampangi, inudodokele, nu-kala nze mono, kadi e mpila nuina i una mpe yakala.+ Ke nuampanga diambu diambi ko. 13 Kansi, nuzeye wo vo mu kuma kia kimbevo yavuila e lau diantete dia kunusamunuina e nsangu zambote. 14 Kana una vo kimbevo kiame kiakala se lutonto kwa yeno, ke nuamveza ko ngatu mona nkele;* kansi nuantambula nze mbasi a Nzambi, nze Kristu Yesu. 15 Akweyi kwina e kiese kina nuakala kiau? Kadi inusididi umbangi vo, kele vo nuavua e lau, nga nuandunguna meso meno yo kumpana mo.+ 16 Ozevo, nga nkitukidi se mbeni eno wau inuvovese ludi e? 17 Bevanganga mawonso muna kunubaka, kansi ke bena ye kani diambote ko; bazolele kunuvambula ye mono kimana nuakala ye luzolo lwa kubalanda. 18 Avo muntu ovanganga mawonso muna kunubaka ye kani diambote, ke mu kolo ngina yeno kaka ko, kansi ntangwa zawonso, ediadi diambote kwa yeno, 19 e wan’ame anzolwa,+ kadi muna kuma kieno mbwenene diaka nsongo, yavana Kristu kevangama muna yeno. 20 Nzolele vo yakala yeno, yanuvovesela kuna lulembamu, kadi o ntim’ame uyangamene mu kuma kieno.
21 Nunzayisa, oyeno nuzolele kala mu wisa kia nsiku, nga ke nuwanga Nsiku ko e? 22 Muna bong’e nona, diasonama vo Abarayama wana wole amakala kakala yau, omosi muna ntaudi ankento,+ owaka muna nkento una vo ke ntaudi ko;+ 23 kansi ndiona wawutwa kwa ntaudi ankento wawutukila mun’owu uwutukilanga wantu awonso,+ kansi wankaka, ona wawutwa kwa nkento una vo ke ntaudi ko, muna nsilu kawutukila.+ 24 Mambu mama mena nze kingana; kadi akento awaya makangu mole besunzulanga, e kangu dimosi i dia Mongo a Sinai,+ diawutila wana muna ubundu, i Anga. 25 Anga mongo a Sinai+ una kuna Arabia kesunzulanga, yandi osunzulanga Yerusaleme o unu, kadi ntaudi kumosi yo wan’andi. 26 Kansi Yerusaleme ya zulu, yavevoka, yandi i ngudi eto.
27 Kadi diasonama vo: “Yangalala e sita kia nkento, ngeye kwawuta ko; kemba ye kiese ngeye kwamona nsongo ko; kadi o lutangu lwa wan’a nkento ona wabembolwa lusundidi lutangu lwa wana a ndiona una ye yakala.”+ 28 Ampangi, yeto tu wan’a nsilu nze Isaki.+ 29 Kansi wauna ndiona wawutukila mu mpila iwutukilanga wantu awonso kayantika bangikila ndiona wawutukila mun’owu wa mwanda,+ i diau mpe divangamanga o unu.+ 30 Ozevo, e sono aweyi kivovanga? “Yinga ntaudi ankento yo mwan’andi, kadi o mwan’a ntaudi kalendi kala mvingidi a vua ko kumosi yo mwan’a nkento una vo ke ntaudi ko.”+ 31 Dianu vo, ampangi oyeto ke tu wan’a ntaudi ankento ko, kansi tu wan’a nkento una vo ke ntaudi ko.