Luvaiku
18 O Yitero wa ngang’a Midiani, wa kô wa Mose,+ owidi mawonso Nzambi kavangidi kwa Mose, kwa nkangu andi Isaele ye una Yave kavaikisidi Isaele muna Engipito.+ 2 Yitero wa kô wa Mose, watambula Sipora wa nkaz’a Mose, vava Mose kamvutula kwa yandi, 3 kumosi yo wan’andi wole amakala.+ O mosi nkumbu andi Ngeresome,*+ kadi Mose ovovele vo: “Nkitukidi se nzenza muna nsi a kinzenza,” 4 wankaka nkumbu andi Elieze,* kadi Mose ovovele vo: “Nzambi a se diame i nsadisi ame, ona umpulwizi muna nsosolo a Faro.”+
5 Muna kuma kiaki, Yitero wa kô wa Mose, kumosi yo wana yo nkaz’a Mose, bele kwa Mose muna makanga, muna kasikidisila e ndo, vana mongo a Nzambi aludi.+ 6 I bosi, Yitero otumini nsangu kwa Mose vo: “Omono Yitero wa kô waku,+ mu kwiza ngina kwa ngeye kumosi yo nkaz’aku yo wan’aku wole amakala.” 7 Vana vau Mose ovaikidi kawanana yo kô wandi. Ovumbamene yo kumfiba. Bayuvuzianini mavimpi, bakotele muna saba.
8 Mose osamwini kwa kô wandi mawonso Yave kavangidi kwa Faro ye Engipito muna wete dia Isaele,+ e mpasi zawonso bawananene zau muna nzila+ ye una Yave kabavuluzidi. 9 Yitero oyangalele muna mambu mawonso mambote kavangidi o Yave kwa Isaele, muna kubavuluza muna Engipito.* 10 I bosi, Yitero ovovele vo: “Yambula Yave kakembelwa, ona wanuvulwizi muna Engipito ye kuna kwa Faro, ona wavulwizi o nkangu kuna nsi a wisa kia Engipito. 11 Owau nzeye wo vo Yave osundidi nzambi zankaka zawonso o nene,+ kadi otanini o nkangu andi vana moko ma mbeni zau akwa lulendo.” 12 I bosi, Yitero wa kô wa Mose otwese lukau lwa ngioka ye yimenga kwa Nzambi, Arone ye akuluntu awonso a Isaele bezidi mu dila vamosi yo kô wa Mose vana ntadisi a Nzambi aludi.
13 Muna lumbu kialanda, Mose ovuende kafundisa o nkangu nze una kevanganga, o nkangu utelamene vana ntadisi a Mose tuka mene yamuna nkokela. 14 Vava kô wandi kamwene mawonso Mose kevanganga mu kuma kia nkangu, oyuvuidi vo: “Nkia diambu diadi ovanganga mu kuma kia nkangu? Ekuma ovuandidi ngeye mosi yo nkangu awonso watelama ova ntadisi aku tuka mene yamuna nkokela?” 15 Mose ovutwidi kô wandi vo: “Kadi o nkangu kwa mono ukwizanga mu yuvula Nzambi. 16 Avo diambu dibwidi vana vena wantu wole, kwa mono disunzulwanga yafundisa dio, izayisanga e nzengo za Nzambi aludi ye nsiku miandi.”+
17 O kô wa Mose ovovele vo: “E diambu ovanganga ke diambote ko. 18 Kieleka, ongeye yoya oyoya kumosi yo nkangu wau una yaku, kadi e zitu diadi dingi kwa ngeye, kulendi dio nata ngeye mosi ko. 19 Owau ungwila. Longi ikuvana, Nzambi okala yaku.+ Ongeye kala se nsunzudi a nkangu kwa Nzambi aludi,+ ofwete zayisanga e mambu kwa Nzambi aludi.+ 20 Ofwete kubalonga e nkanikinu ye nsiku,+ ubasonga e nzila zina bafwete diatila ye salu bafwete sala. 21 Kansi, sola wan’amakala azikuka vana vena nkangu,+ ana bevuminanga Nzambi, bafwana bundwa e vuvu, ana ke bevavanga nluta mia yau kibeni ko;+ ubatumbika vana vena nkangu se mfumu za mafunda, mfumu za nkama, mfumu za makumatanu ye mfumu za kumi.+ 22 Yau bafwete fundisa nkangu avo vabwidi diambu.* Konso diambu diampasi, betwasa dio kwa ngeye;+ kansi konso diambu diakete, oyau bebakila dio e nzengo. Vevola e zitu diaku muna yambula vo oyau basadisa mu nata dio.+ 23 Avo ovangidi wo, o Nzambi mpe katonda wo, ongeye olenda nata e zitu diadi, wantu awonso bevutuka kuna nzo ye kiese.”
24 Vana vau, Mose owididi kô wandi, ovangidi mawonso kavovele. 25 Mose osolele wan’amakala azikuka vana vena nkangu awonso a Isaele yo kubatumbika se ntu vana vena nkangu, bakala se mfumu za mafunda, mfumu za nkama, mfumu za makumatanu ye mfumu za kumi. 26 Muna mpila yayi, bafundisanga o nkangu vava vabwanga e diambu. Konso diambu diampasi batwasanga dio kwa Mose,+ kansi o mambu mawonso makete yau kibeni bafundisanga mo. 27 I bosi, Mose osindikidi kô wandi,+ wele avutuki kuna nsi andi.