Yeremiya
29 O mama i mambu ma nkanda una katwika Yeremiya wa ngunza tuka kuna Yerusaleme kwa akuluntu ana basala vana vena nkangu wanatwa muna kinkole, anganga, angunza ye nkangu wawonso una Nebukandesa kayalula muna Yerusaleme yo kubanata kuna Babele, 2 vava Yekoneya+ wa Ntinu yo ntinu ankento wa ngudi a ntinu,*+ mbanda-mbanda, akuluntu a Yuda ye Yerusaleme, akwa umbangu ye avangi a lekwa ya sengwa* bavaika muna Yerusaleme.+ 3 Otwikidi nkanda wau vana moko ma Elasa wa mwan’a Safani+ yo Ngemareya wa mwan’a Kilekiya ona Sedekiya+ wa ntinu a Yuda katuma kuna Babele kwa Nebukandesa wa Ntinu a Babele, oku vo:
4 “I wau wuwu kavovele o Yave a vu, wa Nzambi a Isaele kwa nkangu wawonso una muna kinkole, ana yayambula vo bayalulwa muna Yerusaleme, banatwa kuna kinkole muna Babele, 5 ‘Nutunga nzo yo zingila mo. Nukuna mpatu yo dia mbongo andi. 6 Nubonga akento yo wuta wan’amakala yo wan’amakento; nubongela wan’eno amakala akento yo sompesa wan’eno amakento, kimana yau mpe bawuta wan’amakala ye amakento. Nuwokela kwakuna yo lembi keva. 7 Nuvava luvuvamu lwa mbanza ina nuanatwa yo samba kwa Yave muna wete diandi, kadi muna luvuvamu lwandi nukadila yo luvuvamu.+ 8 Kadi i wau wuwu kavovele o Yave a vu, wa Nzambi a Isaele: “Ke nuyambula ko vo ngunza zeno ye nganga za ngombo ana bena vovo nuina banuvuna,+ ke nukwikila ko mu ndozi zina belotanga. 9 Kadi ‘luvunu besakulanga muna nkumbu ame, kibatumini ko,’+ u kavovele o Yave.”’”
10 “Kadi i wau wuwu kavovele o Yave: ‘Vava nulungisa 70 lwa mvu muna Babele, vutula ivutula e sungididi kiame kwa yeno,+ ilungisa nsilu ame muna kunuvutula va fulu kiaki.’+
11 “‘Kadi nzeye ngindu zame mu kuma kieno,’ u kavovele o Yave, ‘ngindu za luvuvamu ke ngindu zambi ko,+ nzolele kunuvana e vuvu+ ye zingu kiasikila kuna sentu. 12 Oyeno nukumbokela, nukwiza kwa mono yo kunsambila, omono ikunuwá.’+
13 “‘Nukumpava yo kunsolola,+ kadi nukumpava ye nsi a ntima wawonso.+ 14 Iyambula vo nuansolola,’+ u kavovele o Yave. ‘Ikutakesa awonso banatwa muna kinkole yo kunukutakesa muna zula yawonso ye fulu ina yanumwanganesa,’+ u kavovele o Yave. ‘Ikunuvutula muna fulu kina nuanatinua muna kinkole.’+
15 “Kansi yeno nuvovele vo: ‘Yave osengomwen’e ngunza mu kuma kieto kuna Babele.’
16 “Ozevo, i wau wuwu kavovele Yave kwa ntinu ona vuende vana kunda kia kimfumu kia Davidi+ ye kwa nkangu wawonso uzingilanga mu mbanza yayi ye kwa ampangi zeno ana ke bayenda mu kinkole ko, 17 ‘I wau wuwu kavovele o Yave a vu: “Ikunutwikila nsosolo, mvengele ye vuku,*+ ikunukitula nze bundu yawola ya nsanda, eyi ke ilendi diwa ko kadi yambi kikilu.”’+
18 “‘Ikubalakama muna nsosolo,+ muna mvengele ye muna vuku, ikubakitula se kuma kia wonga muna yintinu yawonso ya nza+ ye sibu ye lekwa kia sivika, lekwa kia sikila mumpiozi+ yo luvezo vana vena zula yawonso ina yabamwanganesena,+ 19 kadi ke bawá mambu mame ko mana yabatwikila muna selo yame angunza,’ u kavovele o Yave, ‘mono yabatumanga ntangwa ke ntangwa.’*+
“‘Kansi yeno ke nuawá ko,’+ u kavovele o Yave.
20 “Ozevo, nuwá diambu dia Yave, yeno nkangu awonso wanatwa muna kinkole, una yakatula muna Yerusaleme yo fila wo muna Babele. 21 I wau wuwu kavovele o Yave a vu wa Nzambi a Isaele mu kuma kia Akabi wa mwan’a Kolaya yo Sedekiya wa mwan’a Maseya, ana bekunusakulwilanga luvunu muna nkumbu ame:+ ‘Ikubayekola vana moko ma Nebukandesa* wa ntinu a Babele, yandi okubavonda vana meso meno. 22 Dina dikubabwila dikala vovelwa nze sibu mu kuma kia nkangu wawonso wa Yuda una muna kinkole kuna Babele, oku vo: “Yambula Yave kavanga nze Akabi yo Sedekiya, ana ntinu a Babele kayoka vana tiya!” 23 kadi bavanga mambu mansoni muna Isaele,+ muna tá zumba ye akento a mfinangani zau yo vova luvunu muna nkumbu ame, luna kiabakanikina ko.+
“‘“Omono nzeye wo, i mbangi a mambu mama,” u kavovele o Yave.’”+
24 “Kuna kwa Semaya+ wa musi Nekelame vova vo: 25 ‘I wau wuwu kavovele o Yave a vu wa Nzambi a Isaele, oku vo: “Wau vo otwikidi nkanda muna nkumbu aku kwa nkangu wawonso wa Yerusaleme, kwa Sefaniya+ wa nganga wa mwan’a Maseya ye kwa nganga zawonso, oku vo: 26 ‘Yave watumbika kinganga vana fulu kia Yoyada wa nganga kimana wakala se nkengi muna nzo a Yave, muna yingila konso lau okuyisonga se ngunza wansia muna nsuku* ye muna taka;*+ 27 ozevo, ekuma olembi tumbila Yeremiya wa musi Anatote,+ ona uyikitwidi se ngunza kwa yeno? + 28 Kadi watutwikila nkutu nsangu kuna Babele, oku vo: “Kolo kiandá nukala koko! Nutunga nzo yo zingila mo. Nukuna mpatu yo dia mbongo andi+—”’”’”
29 Vava Sefaniya+ wa nganga katanga nkanda wau muna matu ma Yeremiya wa ngunza, 30 diambu dia Yave dizidi kwa Yeremiya, oku vo: 31 “Twika nsangu kwa nkangu una muna kinkole vo: ‘I wau wuwu kavovele o Yave mu kuma kia Semaya wa musi Nekelame: “Wau vo Semaya osakwidi kwa yeno kana una vo kintumini ko yo kunufila mu bunda e vuvu muna luvunu,+ 32 i wau wuwu kavovele o Yave, ‘Isia sungididi kiame kwa Semaya wa musi Nekelame yo wan’andi. Ke muntu ko muna kanda diandi ovuluka vana vena nkangu wau, yandi ke mona lekwa yambote ko ivangila o nkangu wau,’ u kavovele o Yave, ‘kadi ovukumwini nkangu watelamena Yave.’”’”