Yesaya
13 Nsangu za mfundisa zina Yesaya+ wa mwan’a Amoze kawa muna mona-meso mu kuma kia Babele:+
2 “Nutongeka e sinsu*+ va mongo a matadi.
Nubakazila, nubalawulwila o koko,
Kimana beza kota muna mavitu ma azitu.
3 Mpene nkanikinu kwa awana yasola.*+
Mbokele makesa mame kimana basonga makasi mame,
Ana bena ye kiese kiayingi.
4 Nuwá, ndonga ina muna miongo;
E zú diau dina nga zú dia ulolo wa nkangu!
Nuwá, o mazu ma yintinu,
Ye ma zula ikutakene!+
Yave a vu mu kutika kena makesa mu nuana e vita.+
5 Tuka kuna nsi ina kwandá,+
Tuka kuna nsuk’a zulu,
Yave ye nuaninua ya makasi mandi mukwiza bena
Muna fwasa e nza yawonso.+
6 Nudila, kadi e lumbu kia Yave kifinamene!
Kikwiza se lufwasu lutuka kwa Mpungu-ngolo.+
7 Muna kuma kiaki, moko mawonso meyovoka,
E ntima miawonso mia wantu mizeloka mu kuma kia wonga.+
8 O wantu mu zakama bena.+
Babakamene kwa nkatanga ye mpasi,
Nga nkento una mu nsongo.
Betalanga yo wonga kwa muntu yo nkwandi,
Ye ndose zizele yo lukendalalu.
9 Tala! E lumbu kia Yave kilweke,
Kiampasi, kianganzi ye nsita za makasi,
Mu kitula e nsi se kuma kia mwena wonga,+
Ye mu fwasa asumuki bena mo.
10 Kadi e ntetembwa za zulu ye buka yau*+
Ke ivana ntemo ko;
E ntangwa vava ivaika ibukama e tombe,
E ngonde ke ivana miezi ko.
11 Tumba itumba e nza mu kuma kia bi wandi,+
Yo wantu ambi mu kuma kia bi wau.
Isukisa lulendo lwa akwa lulendo,
Yo kulula umvuania wa abangiki.+
12 Ikitula dio se diampasi mu mona o muntu ke mu wolo wakenzwa ko,+
Mu mona wantu ke mu wolo wa Ofire ko.+
13 Kiaki i kuma izakamesena e zulu,
O ntoto unikunua yo katuka vana fulu kiandi+
Muna nsita za Yave a vu, muna lumbu kia nsita za makasi mandi.
14 Nze nkayi ikulaneswanga, nze kambi dikondelo mvungudi,
Konso muntu ovutuka kwa nkangu andi;
Konso muntu otayila kuna nsi andi.+
15 Konso ona osoloka, tompolwa ketompolwa,
Konso ona obakama ofwila muna nsosolo.+
17 Ikubabundumwina esi Madai banunuanisa,+
Ana bebadikilanga e palata se ma kiakondwa o mfunu
Ana ke beyangalelanga wolo ko.
18 E mfumba miau mikosomona matoko;+
Ke bemwena mbongo a vumu nkenda ko
Ngatu fwila yingiana-ngiana e nkenda.
19 E Babele, e kintinu kisundidi o nkembo* muna yitinu yawonso,+
O wete yo lulendo lwa Akaladi,+
Ikituka nze mbanz’a Sodoma ye Ngomora vava o Nzambi kafwasa zo.+
O Arabe ke simika mo nzo andi ya ngoto ko,
Avungudi ke bevundisila mo makambi mau ko.
21 E bulu ya makanga ibubamena mo;
E nzo zau zizala ye mafungu.
22 E bulu iwokanga iwokela muna nzo zandi zandá,
E mbulu ziwokela muna nzo zandi zambote-mbote.
E ntangw’andi ifinamene, e lumbu yandi ke ilambulwa ko.”+