Kuna kwa Esi Kolosai
4 Yeno amfumu, nukadilanga ye ntaudi zeno mu mpila yambote ye unsongi, wau nuzeye wo vo oyeno mpe Mfumu nuna yandi kuna zulu.+
2 Nuzindalala muna sambu,+ ke nuvilakananga samba ko ye nuvutulanga matondo.+ 3 Vana ntandu, nusambanga muna wete dieto+ mpe kimana Nzambi katuziulwila mwelo twalenda samuna e diambu dia mbumb’avauka mu kuma kia Kristu, ina nkangilu mu tuvambu,+ 4 yasamuna yo una ufwene muna mpila mfwete yo samunuina.
5 Nukangadilanga muna ngangu vana vena awana bena kuna mbazi, nutoma sadilanga e ntangwa eno.*+ 6 Yambula mvovo mieno miakalanga miangemba ntangwa zawonso, miasiwa o mungwa,+ kimana nuazaya una nufwete vanina e mvutu kwa konso muntu.+
7 Tikiko+ wa mpangi ame anzolwa ye selo kia kwikizi ye nkwame ntaudi muna Mfumu, okunuzayisa nsangu zawonso mu kuma kiame. 8 Intumini kwa yeno kimana nuazaya owu tuna kimana kafiaulwisa mpe ntima mieno. 9 Okwiza kumosi yo Onesimo+ wa mpangi ame anzolwa ye kwikizi, ona watuka kwa yeno; bekunuzayisa mawonso mabwidi okwaku.
10 Aresetako+ wa nkwame mbakami, unutumini mavimpi yo Maku+ wa yitu kia Banaba (ona nuakanikinua vo nuantambula+ avo wizidi), 11 yo Yesu ona oyikilwanga vo Yuseto, awaya i bazengwa. Yau kaka i akwame a salu kia Kintinu kia Nzambi, yau i nto a lufiaulwisu* lwame. 12 Epafera+ wa ntaudi a Kristu Yesu ona watuka kwa yeno, unutumini mavimpi. Ntangwa zawonso okwamanananga samba muna wete dieno, kimana nuatelama, nuazikuka yo sikila muna luzolo lwawonso lwa Nzambi. 13 Intelele kimbangi vo osalanga ye fululu kiawonso muna wete dieno, ye muna wete dia awana bena muna Laodikia ye Yerapole.
14 Luka+ wa ngang’a mawuku anzolwa, yo Dema banutumini mpe mavimpi.+ 15 Nuvana mavimpi kw’ampangi muna Laodikia, kwa Numfa ye nkutakani ina muna nzo andi.+ 16 Vava nutanga nkanda wau, nuvanga mawonso kimana watangwa+ mpe muna nkutakani a Laodikia, oyeno mpe nutanga una wa esi Laodikia. 17 Nuvovesa Arekipo+ vo: “Toma tala uselo una watambula muna Mfumu kimana walungisa wo.”
18 I mavimpi mame mama, mono kibeni Paulu nsonekene mo, muna koko kwame.+ Nuyindulanga tuvambu twame.+ Yambula e nsambu zakala yeno.