Levitiku

18 Yave okwamanene vovesa Mose vo: 2 “Vovesa Aneyisaele vo: ‘Mono i Yave wa Nzambi eno.+ 3 Ke nufwete vanga ko mana wantu bevanganga muna nsi ya Engipito, kuna nuazingila. Ke nufwete vanga ko mana wantu bevanganga muna nsi ya Kenani, muna ikunukotesa.+ Ke nufwete landa mavangu mau ko. 4 Nufwete zitisa e nzengo zame za mfundisa. Nufwete lunda e nkanikinu miame yo kangadila mo.+ Mono i Yave wa Nzambi eno. 5 Nufwete lunda e nkanikinu miame ye nzengo zame za mfundisa; konso ndiona ovanga wo, i mûna kekadil’o moyo.+ Mono i Yave.

6 “‘Ke vakadi muntu ko vovo nuina ovukana* ye yitu kiandi.+ Mono i Yave. 7 Kufwete vukana yo se diaku ko ye kufwete vukana yo ngudi aku ko. Kadi yandi i ngudi aku, kufwete vukana yandi ko.

8 “‘Kufwete vukana yo nkento a se diaku ko.+ Ediadi difusulwisa se diaku e nsoni.*

9 “‘Kufwete vukana yo nsang’aku ko, kiakala mwan’ankento a se diaku yovo mwan’ankento a ngudi aku, kiakala mu nzo eno kawutukila yovo mu nzo yankaka.+

10 “‘Kufwete vukana yo mwan’ankento a mwan’aku ayakala ko ngatu vukana yo mwan’ankento a mwan’aku ankento, kadi oyau i kimpene kiaku.

11 “‘Kufwete vukana yo mwan’ankento a nkaz’a se diaku ko, mwan’a se diaku, kadi oyandi nsang’aku.

12 “‘Kufwete vukana yo nsang’a se diaku ko. Oyandi yo se diaku menga mamosi.+

13 “‘Kufwete vukana yo mpangi ankento a ngudi aku ko, kadi oyandi yo ngudi aku menga mamosi.

14 “‘Kufwete fusulwisa mpangi a se diaku nsoni ko* muna vukana yo nkento andi. Oyandi i ngudi aku.+

15 “‘Kufwete vukana yo mwan’aku a nzitu ko.+ Oyandi i nkento a mwan’aku, kufwete vukana yandi ko.

16 “‘Kufwete vukana yo nkento a mpangi aku ko,+ ediadi difusulwisa mpangi aku e nsoni.*

17 “‘Kufwete vukana yo ngudi ko yo mwan’andi ankento.+ Kubongi mwan’ankento ko wawutwa kwa mwan’andi ayakala yovo mwan’ankento wawutwa kwa mwan’andi ankento, wavukana yandi. Oyau yitu yandi; ediadi vangu diansoni.

18 “‘Kufwete bonga mpangi a nkaz’aku ko se nkento aku anzole+ yo vukana yandi ekolo nkaz’aku kena o moyo.

19 “‘Kufwete vukana yo nkento ko ekolo kena ku ngonde.+

20 “‘Kufwete vukana yo nkento a nkw’aku* ko, wayikitula se wafunzuka.+

21 “‘Kufwete yambula ko vo mosi muna wan’aku kavewa* kwa Moleke.+ Kufwete safula nkumbu a Nzambi aku mu mpila yayi ko.+ Mono i Yave.

22 “‘Kufwete vukana yo yakala ko wauna ovukanenanga yo nkento.+ Ediadi vangu diangemi.

23 “‘Yakala kafwete vukana ye bulu ko yo kuyifunzula; yovo nkento kayivana kwa bulu kavukana kiau.+ Ediadi diangemi kikilu.

24 “‘Ke nuyifunzula muna mambu mama ko, kadi muna mambu mama mawonso i bayifunzulwila e zula ina iyinganga ova ndose eno.+ 25 Muna kuma kiaki, e nsi ifunzukidi, itumba yo mu kuma kia bi wandi, e nsi iluka o nkangu andi.+ 26 Kansi oyeno nufwete lunda e nkanikinu miame ye nzengo zame za mfundisa,+ ke nufwete vanga mambu mama mangemi ko, kiakala musi nsi yovo nzenza ona ozingilanga vovo nuina.+ 27 Kadi o wantu banuvita omu nsi yayi, bavanga mambu mama mawonso mangemi,+ owau e nsi ifunzukidi. 28 Kansi oyeno, wau vo ke nusafwidi nsi ko, e nsi ke ikunuluka ko wauna yalukila e zula ina yanuvita. 29 Konso ndiona ovanga dimosi muna mambu mama mangemi, awonso bevanga mo bafwete vondwa vana vena nkangu au. 30 Nukwamanana lungisa kiyekwa kieno kwa mono, muna lembi vanga mavangu mangemi mavanganga awana banuvita,+ kimana nualembi kuyifunzula. Mono i Yave wa Nzambi eno.’”