Luvaiku

28 “Bokela mpangi aku Arone vana vena Aneyisaele, kumosi yo wan’andi amakala, kimana kansadila se nganga+—Arone+ kumosi yo wan’andi:+ Nadabi, Abiu,+ Elaza yo Itama.+ 2 Vangila Arone wa mpangi aku mvuatu miavauka kimana kazitiswa yo vienga.+ 3 Vovesa akwa umbangu* awonso, ana yazadisa yo mwand’a ngangu,+ bavanga mvuatu mia Arone kimana kayekolwa kwa mono,* kansadila se nganga.

4 “Emiami i mvuatu bevanga: babu kia tulu,*+ kidukula,+ yunga kia kondwa o moko,+ mvuela ya kare-kare, mpu a nlele+ ye mponda;+ bevanga e mvuatu miami miavauka mu kuma kia mpangi aku Arone yo wan’andi amakala, kimana kansadila se nganga. 5 Akwa umbangu bafwete sadila wolo, nsinga mia bule, nsinga mia mika mia se kia nduwa, nsinga mia mbwaki akongola* ye lino yambote.

6 “Bafwete vangila kidukula muna nsinga mia wolo, nsinga mia bule, nsinga mia mika mia se kia nduwa, nsinga mia mbwaki akongola,* nsinga miasietwa mia lino yambote.+ 7 E kidukula kifwete kala ye tenda yole yalamikwa vana mavembo mu yikakesa e nsuka zole za konso vembo. 8 E mponda+ ina ikangwa muna kidukula kimana yasimbinina yo, ifwete vangilwa muna lekwa yau ayimosi: nsinga mia wolo, nsinga mia bule, nsinga mia mika mia se kia nduwa, nsinga mia mbwaki akongola* ye nsinga miasietwa mia lino yambote.

9 “Bonga matadi mole ma onise+ yo vosona mo e nkumbu za wan’a Isaele,*+ 10 nkumbu sambanu muna tadi dimosi ye nkumbu sambanu muna diaka tadi, mun’owu wa ngutuka zau. 11 O mvosoni a matadi ovosona e nkumbu za wan’a Isaele muna matadi mau mole nze una uvosonuenuang’e dimbu.+ I bosi, ongeye zungisa mo e simbininua ya wolo. 12 Tula matadi mau mole vana tenda ya kidukula ina vana mavembo, mekala se matadi ma luyindulu kwa wan’a Isaele.+ O Arone kafwete nata e nkumbu zau vana ndose a Yave, vana tenda yole ya mavembo, se luyindulu. 13 Vanga simbininua ya wolo 14 ye ngonzi zole za wolo walembi sangwa lekwa, zasietwa nga nsinga,+ ofwete kanga e ngonzi zasietwa muna simbininua.+

15 “Tuma nkwa umbangu wa tunga nlele kavanga babu kia tulu kia mfundisa.+ Kifwete vangilwa nze kidukula, muna nsinga mia wolo, nsinga mia bule, nsinga mia mika mia se kia nduwa, nsinga mia mbwaki akongola* ye nsinga miasietwa mia lino yambote.+ 16 Vava e babu kia tulu kibundikwa, e ndambu zau yá zifwete kala zafwanana, lutama lumosi* muna lambuka ye lutama lumosi muna yalumuka. 17 Muna babu kia tulu sia mo matadi mavakama muna simbininua, vanga nlonga nyá mia matadi. Muna nlonga wantete: tadi dia rubi, dia topaze ye dia emeraude. 18 Muna nlonga wanzole: tadi dia tokwase, dia safire ye dia yasepi. 19 Muna nlonga wantatu: tadi dia lesheme,* dia angate ye dia ametisite. 20 Muna nlonga wa nyá: tadi dia kerusolito, dia onise ye dia yade. Mafwete siwa muna simbininua ya wolo. 21 O matadi mekala mun’owu wa nkumbu 12 za wan’a Isaele. Konso tadi difwete vosonua nze dimbu, konso nkumbu isunzula kanda dimosi muna makanda 12.

22 “Vanga ngonzi zasietwa za wolo walembi sangwa lekwa mu kuma kia babu kia tulu.+ 23 Vanga nlunga miole mia wolo mu kuma kia babu kia tulu, tula e nlunga miole muna nsuka zole za babu kia tulu. 24 Kanga e nsinga miole mia wolo muna nlunga miole mina muna nsuka za babu kia tulu. 25 Kotesa e nsuka zole za nsinga miau miole muna simbininua yau yole, sia yo vana tenda ya mavembo ma kidukula, oku ntwala. 26 Vanga nlunga miole mia wolo, sia mio muna nsuka zau zole za ndambu ibundikwa ya babu kia tulu, eyi italana ye kidukula.+ 27 Vanga diaka nlunga miole mia wolo yo sia mio oku ntwal’a kidukula, vana yanda tenda yole ya mavembo, lukufi ye fulu kiayikanena, vana ntandu a mpond’a* kidukula.+ 28 Muna sikidisa e babu kia tulu vana fulu kiandi, ofwete kanga nsing’a bule tuka muna nlunga mia babu kia tulu yamuna nlunga mia kidukula. Ediadi disadisa e babu kia tulu kiasikila vana fulu kiandi, vana ntandu a kidukula, vana ntandu a mponda.

29 “Vava Arone kekota vana Fulu Kiavauka, kafwete nata e nkumbu za wan’a Isaele muna babu kia tulu kia mfundisa vana ntim’andi, se luyindulu vana ndose a Yave ntangwa zawonso. 30 Osia e Urimi ye Tumimi*+ muna babu kia tulu kia mfundisa, ikala vana ntandu a ntim’a Arone vava kekota vana ndose a Yave. Muna mpila yayi, Arone onata vana ntim’andi e lekwa yayi yafundisila Aneyisaele, vana ndose a Yave ntangwa zawonso.

31 “E yunga kiakondwa o moko kia kidukula, kiawonso vangila kio muna nsinga mia bule.+ 32 E yunga kifwete kala ye vundu dia kotesela o ntu vana kati. E vundu dikala yo mvinda muna kinzieta kiandi kiawonso, o mvinda ufwete tungwa kwa nkwa umbangu. E vundu dikala nze dia kinkutu kia sengwa,* kimana dialembi tiazuka. 33 Vanga nganata* muna kinzieta kiawonso kia nswiku a yunga, vangila zo mu nsinga mia bule, nsinga mia mika mia se kia nduwa ye nsinga mia mbwaki akongola.* Landakesa e nganata ye ngunga za wolo. 34 Landakesa ngung’a wolo ye nganata, ngung’a wolo ye nganata,* muna kinzieta kiawonso kia nswiku a yunga kiakondwa o moko. 35 Arone kafwete kio vuata mu sala se nganga,* e zú dia ngunga difwete wakana vava kekota vana fulu kiavauka vana ndose a Yave ye vava kevaika, kimana kalembi fwa.+

36 “Vanga lukandala lwakezima lwa wolo walembi sangwa lekwa. Nze una uvosonuenuang’e dimbu, vosona mo vo: ‘O vauka kwa Yave.’+ 37 Kanga lukandala muna mpu a nlele+ mu nsing’a bule; ke lufwete katuka vana lose lwa mpu a nlele ko. 38 Lukandala lukala vana nkut’a lose lwa Arone. O Arone yandi okala nkwa kuma avo muntu osadidi lekwa yavauka mu mpila yambi,+ e lekwa ina Aneyisaele bevana se lukau lwavauka. Lukandala ke lufwete katuka vana nkut’a lose lwa Arone ko, kimana bavua e dienga vana ndose a Yave.

39 “Vanga mvuela ya kare-kare muna nsinga mia lino yambote, vanga mpu a nlele muna nsinga mia lino yambote, vanga mpe mponda.+

40 “Ovangila mpe wan’a Arone e mvuela, mponda ye fukilwa ya ntu,+ kimana bazitiswa yo vienga.+ 41 Ovuika Arone wa mpangi aku yo wan’andi, ubakusa o mazi vana ntu,+ ubatumbika*+ yo kubavaula, oyau bekunsadila se anganga. 42 Ubavangila mpe makupe* ma lino kimana bafukila e kimpene kiau.+ Makupe mama mafwete tuka muna luketo yamuna mabuku-buku.* 43 O wan’a Arone bafwete vuata makupe momo vava bekota muna saba kia wananina yovo vava befinama vana ziku mu sadila vana fulu kiavauka, kimana balembi vanga vilwa yo fwa. Owau nkanikinu wa mvu ke mvu kwa yandi ye mbongo andi ikunlandila.