Luvaiku

30 “Vanga e ziku dia yokela e ndumbu;+ vangila dio muna mabaya ma akasia.+ 2 E ndambu zau yá za ziku zifwete kala zafwanana, kinkoso kimosi* muna lambuka, kinkoso kimosi muna yalumuka ye yinkoso yole muna zanguka. E mpoka ye ziku ikala se lekwa kimosi.+ 3 Lenga dio wolo walembi sangwa lekwa: vana ntandu, muna ndambu zandi zawonso ye muna mpoka zandi; vanga mvind’a wolo muna kinzieta kiandi. 4 Vanga mpe nlunga miole miawolo mu kuma kia ziku, lamika mio kuna nsi a mvind’andi muna ndambu zole zitalanene, i mûna muviokela e mbindi za natina e ziku. 5 Vanga e mbindi zole za mabaya ma akasia, lenga zo wolo. 6 Sia e ziku vana ntwal’a rido ina vana ndambu a nkel’a Kimbangi+ ye fukwa kiandi, vana ikuyisunzulwila kwa ngeye.+

7 “Arone+ oyokela e ndumbu ansunga+ vana ziku,+ ofutumuna yo vana ziku konso mene ekolo kekubikanga e minda.+ 8 Vava Arone kekwika e minda muna nkokela, vitila tombe kiabukama,* oyoka e ndumbu. Olwalu i lukau lwa ndumbu lutambikwa ntangwa zawonso vana ndose a Yave muna mbandu zeno zawonso. 9 Ke nufwete vo tambikila ndumbu yalembi vaninua nswa ko+ yovo lukau lwa ngioka ngatu lukau lwa mbwaza. Ke nufwete vo yitila mpe lukau lwa ndua ko. 10 O Arone kafwete tula ndambu a menga ma bulu kia lukau lwa sumu vana mpoka za ziku kimana kavaula dio. Nkumbu mosi muna mvu kevaula e ziku,+ muna mbandu zeno zawonso. E ziku divauka kikilu kuna kwa Yave.”

11 I bosi, Yave ovovese Mose vo: 12 “Konso ntangwa osoneka yo tanga lutangu lwa wan’a Isaele,+ konso muntu ovana lukûlu kwa Yave mu kuma kia moyo andi vava besonekwa, kimana balembi lwakilwa kwa vuku. 13 I lekwa yayi bevana yau awonso besonekwa: bula kati kwa sekele,* mun’owu wa sekele ya fulu kiavauka.*+ E ngera* makumole i sekele mosi. E ndambu a sekele i lukau kuna kwa Yave.+ 14 Konso muntu wasonekeswa ona una ye mvu 20 yovo vioka, ovana lukau lwa Yave.+ 15 O mvuama kalendi vana vioka bula kati kwa sekele ko, o nsukami mpe kalendi kululwilwa e bula kati kwa sekele* ko se lukau kwa Yave muna kûla* mioyo mieno. 16 Tambula nzimbu za palata kwa Aneyisaele za luyambulwilu lwa masumu, vana zo muna wete dia salu kia saba kia wananina, kimana zakala se luyindulu vana ndose a Yave mu kuma kia Aneyisaele, muna kûla* mioyo mieno.”

17 Yave ovovese diaka Mose vo: 18 “Vanga longa diampwena dia nsongo ye vuandisilwa kiandi kia nsongo muna kuyisukulwila;+ i bosi, tula dio vana kati-kati kwa saba kia wananina ye ziku, tula o maza muna longa.+ 19 O Arone yo wan’andi i mûna besukulwila o moko mau yo malu mau.+ 20 Avo se bekota muna saba kia wananina yovo se befinama vana ziku muna sala yo vana lukau kwa Yave vana tiya, bafwete kuyisukula muna maza kimana balembi fwa. 21 Bafwete sukula o moko yo malu mau kimana balembi fwa, owau ukala se nkanikinu wakwele mvu kwa yandi ye kwa mbongo andi, muna mbandu zau zawonso.”+

22 Yave ovovese diaka Mose vo: 23 “Bonga lekwa isundidi e nsunga: yilo sambanu ya mô yakangama, yilo tatu ya kinamone, yilo tatu ya kalamuse, 24 yilo sambanu ya kasia, yazongelwa muna sekele ya fulu kiavauka,*+ kumosi ye yini mosi* ya mazi ma olive. 25 I bosi, vanga mazi mavauka mankusa muna lekwa yayi; mafwete vangilwa muna umbangu.*+ Mekala se mazi mavauka mankusa.

26 “Muna mazi mama okusila e saba kia wananina+ ye nkel’a Kimbangi, 27 kumosi yo meza ye sadilwa yandi yawonso, zangikilwa kia minda ye sadilwa yandi, ziku dia ndumbu, 28 ziku dia lukau lwa ngioka ye sadilwa yandi yawonso, longa diampwena ye telamesenua kiandi. 29 Vaula e lekwa yayi kimana yakala se yavauka kikilu.+ Konso muntu osimba yo kafwete kala wavauka.+ 30 Okusa Arone+ yo wan’andi,+ ubavaula kimana bansadila se anganga.+

31 “Vovesa Aneyisaele vo: ‘O mazi mama mekwamanana kala se mazi mavauka mankusa kwa mono, muna mbandu zeno zawonso.+ 32 O mazi mama ke mafwete kuswa mu nitu a muntu ko, ke nufwete landa mpangilu andi ko mu vanga konso lekwa. Kadi o mazi mama mavauka. Mekala se mavauka kwa yeno ntangwa zawonso. 33 Konso muntu ovanga mazi ma mpila yayi yovo kusa mo kwa muntu kavaninua mo nswa ko,* kafwete vondwa vana vena nkangu andi.’”+

34 I bosi, Yave ovovese Mose vo: “Bonga o mazi mama mansunga:+ matonsi ma setakete, onika, ngalabanu yansunga ye ndumbu a nti a lebona yalembi sangwa lekwa, yawonso ikala tezo kimosi. 35 Vangila e ndumbu muna mazi mama;+ ifwete sangilwa kuna umbangu.* Ifwete siwa mungwa,+ ikala yavelela ye yavauka. 36 Tuta e ndambu a lekwa yayi yavana ikituka se mfumfu, sia e ndambu vana ntwal’a Kimbangi muna saba kia wananina, vana ikuyisunzulwila kwa ngeye. Ifwete sunda ovauka kuna kwa yeno. 37 E ndumbu ina ovangila muna lekwa yayi kufwete yo sadila mu kuma kia ngeye kibeni ko.+ Ofwete yo badikila se lekwa kiavauka kwa Yave. 38 Konso muntu ovanga ndumbu nze yayi kimana kawá e nsunga zandi, kafwete vondwa vana vena nkangu andi.”