Wantete wa Paulu Kuna kwa Timoteo
6 Awana bakangama muna vangu kia ubundu, yambula babadikilanga e mfumu zau vo bafwene kikilu o zitu,+ kimana e nkumbu a Nzambi ye longi diandi dialembi tiangunua.+ 2 Vana ntandu, awana bena vo mfumu zau minkwikizi, ke babavezi ko wau bena vo ampangi. Kansi bafwete kubasadilanga una ufwene, kadi awana bevuanga e nluta muna salu kiau kiambote i minkwikizi ye azolwa.
Kwamanana longa mambu mama yo vana luludiku lwalu. 3 Avo vena yo muntu olonganga longi diankaka yo lembi tonda longi diavimpi,*+ edi diatuka kwa Mfumu eto Yesu Kristu, ngatu longi dina ngwizani yo vumi wa Nzambi,+ 4 wazala yo lulendo yo lembi bakula konso diambu.+ Wazola tantana yo fila e mpaka mu kuma kia mvovo.+ Mambu mama i mau metwasanga kimpala, unzonzi, makumbu,* ngindu zambi, 5 tantana ntangwa zawonso muna mambu makondwa mfunu vana vena wantu ana bayiva muna nyindu,+ ana ke bebakulanga diaka ludi ko yo yindula vo vumi wa Nzambi i mpila ya vuila nluta.+ 6 Kieleka, avo muntu una yo vumi wa Nzambi+ yo yangalela ina kena yau, nluta miayingi kevua. 7 Kadi ke twayiza ye lekwa ko ova nza, ke tulendi vo nata mpe lekwa ko.+ 8 Dianu vo, avo tuna ye madia ye mvuatu, tuyangalela yo.+
9 Kansi, awana bazolele vuama, bebwa muna umpukumuni ye ntambu+ ye muna zolela yayingi ya uzowa ye yampasi, eyi ifilanga wantu muna lufwasu yo lubukumuku.+ 10 Kadi, o zola nzimbu i tuku dia mambu mawonso mambi, ankaka wau bakivana emvimba muna zola kwaku, bavengomoka muna lukwikilu, yo kukitwasila mpasi zayingi.+
11 Vo i ngeye, e selo kia Nzambi, tina mambu mama. Tatidila unsongi, vumi wa Nzambi, lukwikilu, zola, luzindalalu yo lulembamu.+ 12 Nuana vita yambote ya lukwikilu; toma tatidila moyo a mvu ya mvu una wabokelelwa yo tela kimbangi kiambote vana ndose a mbangi zayingi.
13 Vana ndose a Nzambi ona ozingisanga lekwa yawonso, yo Kristu Yesu ona wasila umbangi wambote vana ndose a Pontio Pilato,+ ikanikini 14 watoma lunda nkanikinu kimana wakondwa tona ye lusembo yamuna lusengomoko lwa Mfumu eto Yesu Kristu,+ 15 luna kesonga muna ntangwa andi, ona wina vo nkwa kiese, yandi kaka i Nengolo. Yandi i Ntinu wa atinu ye Mfumu a zimfumu,+ 16 yandi kaka olembi fwanga,+ ona okalanga muna ntemo ulembi finamwa,+ ona kamoneka kwa muntu ko ngatu lenda kumona.+ Kuna kwa yandi nkembo ye nkum’a mvu ya mvu. Amen.
17 Kanikina* awana bena vo mvuama mu tandu* kiaki balembi kala akwa lulendo, balembi sia e vuvu kiau muna kimvuama eki kilenda vila,+ kansi muna Nzambi kaka ona okutuvananga lekwa yawonso ikutuyangidikanga.+ 18 Ubavovesa bavanganga wete, bavuamina muna mavangu mambote, bakala avani a mvevo, bakayilanga ankaka,+ 19 bayilundilanga lusâlu, luna vo, i nkubilw’ambote ina betungila muna lumbu ikwiza,+ kimana basimbinina moyo una vo moyo kikilu.+
20 E Timoteo, lunda kina wayekekwa,+ venga moko yakondwa mfunu itiangunanga mambu mavelela ye mpaka zina ziyikilwanga kuna luvunu vo “zayi.”+ 21 Ankaka wau bekuyisananga mu kuma kia zayi wau, bavengomoka muna lukwikilu.
Yambula e nsambu zakala yaku.