Mavangu ma Zintumwa
5 Kansi, muntu mosi, nkumbu andi Ananiya yo Safira wa nkaz’andi, otekele ndambu a ntoto. 2 Oswekele ndambu a nzimbu, o nkaz’andi mpe kazaya wo, otwese kaka ndambu a nzimbu, ovene zo kwa antumwa.+ 3 Petelo ovovele vo: “E Ananiya, ekuma oyambulwidi vo Satana kakota muna ntim’aku yamu tezo kia vuna+ mwand’avelela+ wau oswekele ndambu a nzimbu otekele e mpatu? 4 Una kwatekele yo ko, ke yaku ko ikedi e? Wau otekele yo, kulendi sadila nzimbu zaku ko konso una ozolele? Ekuma oyindulwidi diambu diadi muna ntim’aku? Kuvunini wantu ko, kansi Nzambi.” 5 Ananiya una kawidi mambu mama, obwidi, ofwidi. Awonso ana bawidi dio bamwene kikilu o wonga. 6 I bosi matoko matelamene, banzingidi vana nlele, banète, bele kunzika.
7 Vava kiavioka tezo kia ola tatu, o nkaz’andi wizidi, kazeye dina divangamene ko. 8 Petelo unyuvuidi vo: “Unzayisa, nga zazi i nzimbu zawonso nuatekele mpatu yeno wole?” Ovutwidi vo: “Ingeta, i zau kikilu.” 9 Petelo umvovese vo: “Ekuma nuwizanene yeno wole nuatonta mwand’a Yave?* Tala, awana bele zika nkaz’aku bena ova mwelo, vaikisa bekuvaikisa kuna mbazi.” 10 Vana vau obwidi vana malu ma Petelo, ofwidi. Matoko vava bakotele, bamwene wafwa, bamvaikisi kuna mbazi, bele kunzika vana ndambu a nkaz’andi. 11 Muna kuma kiaki, e nkutakani yawonso imwene kikilu wonga ye awonso bawidi mambu mama.
12 Vana ntandu, sinsu yayingi ye masivi makwamanene vangamena vana moko ma antumwa vana vena nkangu;+ yau awonso bakutakananga vana Veta kia Solomo.+ 13 Kieleka, akaka ke bakala ye unkabu ko wakubayikama; kansi o nkangu watoma kubasanisinanga. 14 Vana ntandu, e minkwikizi muna Mfumu bakwamanene wokela, ndonga y’akala ye akento.+ 15 Bavaikisi ambevo muna nzila zampwena, babalekese muna mfulu zakete ye muna yipoyo kimana vava Petelo kevioka, e kini kiandi kiaviokela ankaka muna yau.+ 16 E ndonga yitukidi muna mavata mazietele Yerusaleme, batwese ambevo ye awana babangikwanga kwa mianda mia usafu, awonso bawukilu.
17 Kansi o ngang’ambuta otelamene ye awonso bakedi yandi, ana balandanga malongi ma Asaduki, bazele ye kimpala. 18 Bakangidi antumwa yo kubasia muna pelezo.+ 19 Kansi muna fuku, mbasi a Yave* oziwidi e yelo ya pelezo,+ ubavaikisi yo vova vo: 20 “Nuenda muna tempelo, nukwamanana vova kwa nkangu mambu mawonso ma zingu kiaki.” 21 Una bawidi wo, bakotele muna tempelo muna mene-mene, bayantikidi o longa.
O ngang’ambuta ye awana bakedi yandi bezidi, bakutakese Mbazi a Nkanu* ye akuluntu awonso a wan’a Isaele, batumini makesa muna pelezo babatwasila antumwa. 22 Kansi, makesa vava balweke ko, ke babawene mu pelezo ko. Bavutukidi, batwese nsangu, 23 oku vo: “Tuwene pelezo yabindama yo toma yingilwa, ayingidi batelamene muna mielo, kansi vava tuziudi ke tumwene muntu ko muna kati.” 24 Vava mfumu a makesa ma tempelo ye mbuta za nganga bawidi mambu mama, batelamene o ntima, bakiyuvuidi kana adieyi dibwa. 25 Kansi, vezidi muntu mosi ona ubasamunuini vo: “O wantu nuasidi mu pelezo muna tempelo i bena, batelamene yo longa nkangu.” 26 I bosi, mfumu a makesa wele ye makesa mandi, ubatwese, kansi kuna malembe, kadi bamwene wonga wa nkangu, kadi balenda kubatuba matadi.+
27 Babatwese yo kubatelamesa vana Mbazi a Nkanu.* Ngang’ambuta ubayuvuidi, 28 oku vo: “Twatoma kunukanikina vo ke nulongela diaka muna nkumbu yayi ko,+ kansi nutala, nuzadisi Yerusaleme ye malongi meno, nuzolele sia menga ma muntu ndioyo muna ntu mieto.”+ 29 Petelo ye ntumwa zankaka bavutwidi vo: “Tufwete lemvokela Nzambi nze mfumu ke mu wantu ko.+ 30 O Nzambi a mase meto wafutumuna Yesu, ona nuavonda wau nuamanika vana nti.+ 31 Nzambi wantundidika kuna koko kwandi kwalunene,+ kakala Ntu+ ye Mvuluzi,+ kimana kafila Isaele muna luviluku lwa ntima yo lolokwa masumu.+ 32 Tu mbangi za mambu mama+ ye mwand’avelela mpe,+ una Nzambi kevananga kw’awana bekunlemvokelanga nze mfumu.”
33 Vava bawidi wo, bafungidi kikilu o makasi,* bavavidi kubavonda. 34 Kansi Mfarisi mosi, nkumbu andi Ngamaliele+ wa nlongi a Nsiku, otoma zitiswanga kwa nkangu, otelamene muna Mbazi a Nkanu,* okanikini vo bavaikisa antumwa kuna mbazi mu fikolo. 35 I bosi, ubavovese vo: “Esi Isaele, nukeba mu dina nuzolele vanga kwa wantu awaya. 36 Kadi muna lumbu yavioka, Teuda wavaika yo kukiyikila vo muntu anene, wantu ayingi bayikama e bundu diandi, tezo kia 400. Kansi vava kavondwa, awonso banlandanga bamwangana yo vila. 37 I bosi, vavaika diaka Yuda wa musi Ngalili muna lumbu ya kuyisonekesa, ndonga katunta muna kunlanda. Vava kafwa, awonso banlandanga bamwanganeswa. 38 Mu kuma kia mambu mevangamanga owau, inuvovese vo, ke nuyisie mu mambu ma wantu awaya ko, nubayambula kaka. Kadi avo lukanu lwalu yovo salu kiaki kwa wantu kitukidi, bwa kibwa; 39 kansi avo kwa Nzambi kitukidi, oyeno ke nulendi kio bwisa ko.+ Avo ke wau ko, dimoneka vo Nzambi nunuananga yandi.”+ 40 Batambulwidi luludiku lwandi, babokele antumwa, babawende yo+ kubakanikina vo bayambula vovela e nkumbu a Yesu, i bosi babayambwidi.
41 Bavaikidi muna Mbazi a Nkanu,* bayangalele+ wau babadikilu vo bafwanua vezwa mu kuma kia nkumbu a Yesu. 42 E lumbu yawonso muna tempelo ye mu nzo ye nzo+ ke bayambula longa ko yo samuna e nsangu zambote mu kuma kia Kristu Yesu.+