Wanzole wa Petelo
2 Kansi, wauna vavaikila ngunza zaluvunu vana kati kwa nkangu a Isaele, i una mpe vekadila alongi a luvunu vovo kati kweno.+ Ana bekotesa mpambani kuna ndekwa mu fwasa lukwikilu lweno, bevakulwila nkalu o mfumu ona wabasumba+ yo kuyitwasila lufwasu lwa kinsalukisa. 2 Vana ntandu, ndonga belanda mavangu mau mansoni,*+ muna kuma kiau e nzil’a ludi itiangunua.+ 3 Bekunuvunginika mpe kuna loko diawonso muna mvovo mia malengo. Kansi e tumbu kiau kiazengwa tuka kuna nz’ankulu,+ ke kizingila ko, o lufwasa lwau mpe ke lulele ko.+
4 Dialudi, o Nzambi kayambula tumba ambasi ko ana basumuka,+ wabatuba kuna Tarataru,*+ wabakanga muna mawulu ma tombe yo kubalunda yamuna lufundisu.+ 5 Kayambula tumba wantu a nz’ankulu ko,+ kansi wavuluza Noa wa nteleki a unsongi+ kumosi ye wantu nsambwadi ankaka+ vava katwasa kizalu muna nza ya mindembi vumina Nzambi.+ 6 Watumba e mbanz’a Sodoma ye Ngomora vava kakitula zo se ntoto ampolo,+ wasikidisa mbandu a mambu mekwiza kwa yimpumbulu.+ 7 Wavuluza Loti wa muntu a nsongi,+ ona watoma kendalalanga mu kuma kia mavangu mansoni* ma yimpumbulu— 8 kadi ekolo kazinganga yau lumbu ke lumbu, o muntu ndioyo a nsongi, e moyo* andi ansongi wabangamanga mu kuma kia mavangu ma umpumbulu kamonanga yo wá. 9 Muna ntangw’a ntonta, Yave* ozeye vuluza awana bekumvuminanga,+ kansi minkondwa unsongi balundilwa lufwasu muna lumbu kia lufundisu,+ 10 musungula awana bevavanga safula nitu za akaka+ ye awana bevezanga e wisa.*+
Akwa unkabu wambi yo lulendo, ke bemonanga wonga wa tianguna akwa zitu ko, 11 ambasi nkutu kanele vo basundidi e ngolo yo nkuma, ke bekubafundanga ko muna mvovo mia lutiangu, kadi Yave* bezitisanga.+ 12 Vo i wantu awaya, bena nze bulu yikondelo nyindu, yiwutukanga kimana yabakwa yo vondwa, betiangunanga mambu balembele zaya.+ Fwaswa befwaswa mu kuma kia mavangu mau mambi, 13 e mpasi bemonanga i nsendo a mavangu mau mambi.
Bemwenanga dio se diakiese wau bekuyivananga muna nkemba,+ kana nkutu muna mwini. Akwa matona ye twangu,* bekembanga muna malongi mau ma luvunu wau bedianga yeno kumosi.+ 14 Meso mau mazele ye zumba,+ ke belendanga yambula sumu ko, bevukumunanga ana balembi sikila. E ntima miau mialongwa e loko. Wana asibwa. 15 Bayambwidi e nzil’a nsongi yo bendomonua. Balende nzil’a Bilami+ wa mwan’a Beo, ona wazolanga nsendo a mavangu mambi,+ 16 kansi watumbwa muna masumu mandi.+ E buluku ke divovanga ko divovele muna nding’a muntu yo sima e vangu dia uzowa dia ngunza.+
17 Awaya i nto zakondwa maza ye mbungezi ivevomonuanga* kwa tembwa kiangolo, balundilwa e fulu kiatombe kina bû.+ 18 Bevovanga mambu mampwena-mpwena makondwa o mfunu. Muna sikamesa zolela ya nitu+ ye mavangu mansoni,* bevukumunanga awana batinini kala mimpanga-mambi.+ 19 Ekolo bekubasilanga nsilu a luvevoko, yau kibeni abundu a mavangu mambi;+ kadi ona osundilu kwa nkwandi, okitukidi se mbundu andi.*+ 20 Kieleka, wau batinini mambu ma usafu ma nza+ muna kuma kia zayi wasikila wa Mfumu ye Mvuluzi Yesu Kristu, avo bavutukila mo diaka, e nkal’au yansuka isunda eyi yantete o bi.+ 21 Diambote kwa yau kele vo ke bazayi nzil’a unsongi ko, ke mu zaya yo ko, yo vengomoka muna nkanikinu miavelela batambula.+ 22 Dibabwididi edi diyikwanga muna kingana kia ludi vo: “E mbwa ivutukidi e luki yandi, e ngulu isukwilu yele kuyivindumuna diaka muna nteke.”+