Wantete wa Samuele
19 Saulu ovovese mwan’andi Yonatane ye ntaudi zandi zawonso vo Davidi kafwete vondwa.+ 2 Wau vo Yonatane wa mwan’a Saulu ozolele kikilu Davidi,+ Yonatane ovovese Davidi vo: “Se diame Saulu ozolele kuvonda. Dodokolo, mbazi muna mene-mene, toma kuyikenga, vava e fulu waswekamena. 3 Vaika ivaika yo telama yo se diame vana fulu kina okala. Ikuvovela kwa se diame, avo ngwidi diambu, ikuzayisa dio.”+
4 Yonatane otomene vovela Davidi+ kwa se diandi Saulu. Umvovese vo: “E ntinu kusumukina Davidi wa ntaudi aku ko, kadi kasùmukini ko, o mavangu mandi mawonso nluta kaka matwese kwa ngeye. 5 Wasia moyo* andi mu vonza vava kavonda Mfelesetia,+ Yave wavana Isaele yawonso e nsundidi anene. Ongeye wamona yo, wayangalala kibeni. Ekuma ozolele sumukina muna menga ma munkondwa-kuma, wavondesa Davidi kondwa kwa kuma?”+ 6 Saulu owididi Yonatane, odidi e ndofi vo: “Ndidi e ndofi muna Yave wa Nzambi amoyo, Davidi ke vondwa ko.” 7 I bosi, Yonatane obokele Davidi yo kunzayisa mawonso mama. Yonatane otwese Davidi kwa Saulu, Davidi ovutukidi sadila Saulu wauna kateka kunsadila.+
8 Vakedi diaka e vita, Davidi wele nuana ye Afelesetia, ovondele ndonga muna yau, bantinini.
9 Mwand’ambi utukidi kwa Yave ulwakidi Saulu+ wau kavuende muna nzo andi ye dionga vana koko, ekolo Davidi kasikanga kokolo.+ 10 Saulu ovavidi tobola Davidi muna yaka ye dionga, kansi Davidi ovengele dio, e dionga ditelele muna yaka. Davidi otinini muna fuku wauna. 11 I bosi, Saulu otumini wantu balangidila nzo a Davidi kimana bamvonda muna mene-mene,+ kansi Mikale wa nkaz’a Davidi umvovese vo: “Avo kutinini ko* mu fuku wau, mbazi vondwa ovondwa.” 12 Vana vau Mikale okulumwini Davidi vana zianela kimana katina. 13 Mikale obongele teke,* osidi kio vana mfulu, osidi mfika a mika mia nkombo kuna ntu, ofukidi kio nlele.
14 Saulu otumini wantu batwasa Davidi, kansi Mikale ovovele vo: “Yela keyela.” 15 Saulu otumini wantu benda tala Davidi, ubavovese vo: “Nuntwasila yandi vana mfulu kimana yamvonda.”+ 16 Vava wantu bakotele, bamwene teke* vana mfulu ye mfika a mika mia nkombo kuna ntu. 17 Saulu ovovese Mikale vo: “Ekuma umpunini wau oyambwidi mbeni ame+ katina?” O Mikale ovutwidi Saulu vo: “Yandi umpovese vo, ‘Ungiambula yatina, avo kungiambwidi ko, vonda ikuvonda.’”
18 Davidi otinini, olweke kwa Samuele kuna Rama.+ Umvovese mawonso kamvangidi Saulu. Oyandi yo Samuele bele kala kuna Nayote.+ 19 Disamwinu kwa Saulu vo: “Tala, Davidi una kuna Nayote muna Rama.” 20 Vana vau, Saulu otumini wantu benda kanga Davidi. Vava bamwene ngunza za nunu besakulanga, Samuele otelamene yo kubatwadisa, mwand’a Nzambi ulwakidi anati a nsangu a Saulu, oyau mpe bayantikidi sakula.
21 Vava Saulu kawá wo, otumini diaka wantu ankaka, yau mpe basakwidi. Otumini diaka buka kiantatu, yau mpe basakwidi. 22 I bosi yandi kibeni wele kuna Rama. Vava kalweke vana sima kiampwena kina muna Seku, oyuvuidi vo: “Akweyi bena Samuele yo Davidi?” Bavutwidi vo: “Bena kuna Nayote+ muna Rama.” 23 Vava Saulu kayendanga kuna Nayote muna Rama, mwand’a Nzambi unlwakidi, oyantikidi sakula yavana kalweke kuna Nayote muna Rama. 24 Okatwidi mvuatu miandi, osakwidi vana vena Samuele, olavalele e nkonga* o mwini wawonso yo fuku wawonso. I dianu bavovelenge vo: “Nga Saulu mpe ngunza e?”+