Wanzole wa Paulu Kuna kwa Esi Korinto
12 Sana kaka ikuyisana. Se yavovela mambu ma mona-meso+ kasongele Mfumu+ ye nsangu kanzayisi, kana una vo ke dikuntwasila nluta ko. 2 Nzeye muntu una ntwadi muna Kristu, se vioka mvu 14—kana muna nitu yovo ke mu nitu ko, kizeye kwame ko; Nzambi kaka ozeye—wazavunua muna zulu diatatu. 3 Elo, nzeye muntu ndioyo—kana muna nitu yovo ke mu nitu ko, kizeye kwame ko; Nzambi kaka ozeye— 4 ona wazavunua muna paradiso yo wá e mvovo ke milendi vovua ko, mina vo ke miavaninua nswa kwa muntu ko mu vova mio. 5 Ikuyisana muna diambu dia muntu ndioyo, kansi kisinga kuyisana ko, nanga muna lutovoko lwame kaka. 6 Kana nkutu vo nzolele kuyisana, kikala se zowa ko, kadi ludi ivova. Kansi, kizolele wo vanga ko, kimana valembi kala muntu okumpana ndungidi lutila dina kamwene mu mono yovo dina kawidi kwa mono, 7 wau yatambula tusengomono twatu twanene.
Muna lembi kuyitundidika, yasiwa lusende omu nitu,+ mbasi a Satana okungwandanga kimana yalembi kuyitundidika. 8 Nkumbu tatu yadodokela Mfumu muna diambu diadi, kimana lwakatuka omu mono. 9 Kansi umpovese vo: “E nsambu zame zafwana kwa ngeye, kadi nkum’ame uzikukidi muna lutovoko.”+ Dianu vo, ikuyisanina kuna kiese muna kuma kia lutovoko lwame, kimana o nkum’a Kristu wakala kaka omu mono nze fukwa. 10 Dianu vo, ngiangalele muna tutovoko, muna tuvezo, muna nkondelo, muna tubangamu, muna mpasi mu kuma kia Kristu. Kadi avo ntovokele, ozevo nkumamene.+
11 Nkitukidi se zowa. Yeno nunkitwidi wo, kadi yeno nuadi vova muna wete diame. Kana una vo kina mfunu ko, kisidi songa ko vo mbuta za ntumwa zeno zisundidi, kana nkutu muna diambu dimosi.+ 12 Kieleka, yeno kibeni nuamona e ziku kia kintumwa kiame muna luzindalalu lwayingi,+ muna sinsu ye masivi yo mavangu mankuma.+ 13 Mono kibeni kianukudikila zitu ko, muna mpila yayi kaka luswaswanene ye nkutakani zankaka. Nga diambu diambi yavanga?+ Avo i wau, nundoloka muna bi wau.
14 Nutala, wau i nkumbu antatu nkubamene mu kwiza kunukingula, kansi kikunukudikila zitu ko. Kadi kizolele tambula mavua meno ko,+ kansi yeno kaka; e kuma kadi, o wana+ ke yau ko bafwete lundila mase ye ngudi zau, kansi mase ye ngudi kaka bafwete lundila wan’au. 15 Vo i mono, kuna kiese isadila yawonso ngina yau yo funtuka mu kuma kieno.*+ Avo zola itoma kunuzolanga, oyeno mpe nga ke nutoma kunzola ko e? 16 Kana una vo i wau, kikunukudikilanga zitu ko.+ Kansi, nuvovele vo, “mvunginiki” yakala, “muna ndekwa” yanubakila. 17 Nga nsendo yatambula kwa yeno mun’awana yanutumina? 18 Yadodokela Tito, yantuma kumosi ye mpangi mosi. Nga Tito nsendo kavava kwa yeno e?+ Ke mu nyindu umosi ko twakangadil’e? Ke mu ntambi zau zimosi ko twakangadil’e?
19 Nanga oyeno nubenze vo tanina tukuyitaninanga, kansi ke wau ko. Wau vo tu alandi a Kristu ludi tuvovanga vana ndose a Nzambi. Azolwa, tuvanganga mawonso mama muna kunukumika. 20 Kadi wonga ngina wau, vava ilwaka kwa yeno, yalembi kunuwana wauna nzolele, mono mpe yalembi kala wauna nuzolele, kansi vekala ye nzonzi, kimpala, makasi, ntantani, nyidimu, makumbu, kuyitundidika ye mvuanga. 21 Nanga vava ivutuka diaka, o Nzambi ame okumfusulwisa e nsoni vana ndose eno, se yadila mu kuma kia ndonga y’awana bateka sumuka, kansi ke baviluka ntima ko muna mavangu mau ma usafu, mavangu ma zumba* ye mavangu mansoni* mana bavanga.