Kuna kwa Esi Kolosai

1 Paulu, wa ntumw’a Kristu Yesu muna luzolo lwa Nzambi yo Timoteo+ wa mpangi eto, 2 kuna kw’avauki ye mpangi za kwikizi muna Kristu koko Kolosai:

Yambula e nsambu yo luvuvamu lwa Nzambi wa Se dieto lwakala yeno.

3 Ntangwa zawonso tuvutulanga matondo kwa Nzambi wa Se dia Mfumu eto Yesu Kristu, vava tusambanga muna wete dieno, 4 kadi twawa lukwikilu lweno muna Kristu Yesu yo zola kweno muna avauki awonso, 5 mu kuma kia vuvu kina nualundilwa kuna zulu.+ Nuawá kala e vuvu kiaki muna ludi kia nsangu zambote 6 zina nuasamunuinua. Wauna e nsangu zambote ziyiminanga e mbongo yo nungunuka mu nza yawonso,+ i wau mpe uvangamanga vovo nuina tuka muna lumbu nuawá yo toma zaya ludi kia nsambu za Nzambi. 7 I wau nuawá kwa Epafera+ wa ntaudi eto anzolwa, una vo selo kia kwikizi kia Kristu muna wete dieto. 8 Watuzayisa mpe zola kweno muna kimwanda.*

9 I dianu vo, tuka muna lumbu twawá wo, ke tuyambulanga samba nkutu ko muna wete dieno+ yo lomba vo nuazadiswa yo zayi wasikila+ wa luzolo lwandi muna ngangu zawonso yo umbakuzi wa mwanda,+ 10 kimana nuakangala muna mpila ifwene kuna kwa Yave* muna kunyangidika muna mawonso, ekolo nukwamanananga yima e mbongo muna mavangu mawonso mambote yo nungunuka muna zayi wasikila wa Nzambi;+ 11 tulombele mpe nuakumikwa muna mawonso mun’owu wa nene wa nkum’andi+ kimana nualenda zizidila mawonso kuna kiese, 12 wau nutondanga o Se, ona wanufwanisa kimana nuakala entwadi muna vua dia avauki+ ana bena mu ntemo.

13 Watuvuluza muna wisa kia tombe+ yo kutufila muna kintinu kia Mwan’andi anzolwa, 14 muna yandi twavuluzilwa muna lukûlu, i sia vo, twalolokwa masumu.+ 15 Yandi i fwaniswa kia Nzambi olembi monekanga,+ i mwan’antete muna nsema wawonso;+ 16 kadi muna yandi i mwasemenua lekwa yawonso kuna zulu ye va ntoto, lekwa ina imonekanga ye ina ilembi monekanga,+ diakala kunda ya kintinu, kana umfumu, kana tuyalu yovo wisa. Lekwa yawonso muna yandi yasemenua+ ye mu kuma kiandi. 17 Yandi mpe wasemwa vitila lekwa yawonso,+ e lekwa yawonso muna yandi yasemenua, 18 yandi i ntu a nitu, ina vo i nkutakani.+ Yandi i lubantiku, i mwan’antete muna mafwa,+ kimana kakala wantete muna lekwa yawonso; 19 kadi Nzambi wazola vo kakala walunga muna mambu mawonso,+ 20 muna yandi, i kavutulwisila e ngwizani vana vena e lekwa yawonso+ yo yandi kibeni, kiakala lekwa ina ova ntoto yovo lekwa ina kuna zulu, wau katwasa luvuvamu muna menga+ mana kabungula vana nti ampasi.*

21 Oyeno mbeni nuateka kala, nuavambana yo Nzambi, kadi nuasianga e ngindu muna mavangu mambi, 22 kansi owau, unuyikakese diaka muna nitu a ndiona wakiyekola muna lufwa, kimana kanusunzula wavauka yo kondwa tona ye tumbu vana ndose andi+⁠— 23 kimana nuakala kaka muna lukwikilu,+ nuasikila muna nkubilwa+ yo kala ngingi,+ nualembi dimbula e vuvu muna nsangu zambote zina nuawá ye zina zasamunua muna nsema wawonso kuna nsi a zulu.+ Muna nsangu zazi zambote, omono Paulu i yakitukila selo.+

24 Owau ngiangalele mpasi imonanga mu kuma kieno,+ izizidilanga omu nitu ame dina dikondele muna mpasi za Kristu, muna wete dia nitu andi,+ ina vo i nkutakani.+ 25 I selo kia nkutakani yayi mun’owu wa kiyekwa+ yavewa kwa Nzambi muna diambu dieno, yasamuna e diambu dia Nzambi una ufwene, 26 e mbumb’avauka+ ina yaswekama tuka muna tandu* yavioka+ ye mbandu zavioka. Kansi owau isengomokene kw’aveledi andi,+ 27 ana Nzambi kayangalele zayisa vana vena e zula o umvuama wa nkembo a mbumba yayi yavauka,+ ina vo i Kristu wina muna yeno, e vuvu kia nkembo andi.+ 28 Yandi kaka tusamunanga yo wondelela awonso, yo longa awonso muna ngangu zawonso, kimana twasunzula wantu awonso kwa Nzambi bazikuka muna Kristu.+ 29 Muna diadi ifuntukanga yo siamanana muna lusadisu lwa nkum’andi una usalanga mu mono.+