Nekemiya

13 E lumbu kiakina batangidi nkand’a Mose muna matu ma nkangu,+ muna nkanda wau mwasonama vo Nyamone yovo musi Moabe+ kafwete kota ko muna nkutakani a Nzambi aludi+ yakwele mvu, 2 kadi ke bayenda kika Aneyisaele ko yo madia ye maza, kansi bafuta Bilami kabasiba.+ Kansi, o Nzambi eto wakitula sibu se nsambu.+ 3 Vava bawidi Nsiku, bayantikidi vambanisa wan’awonso a nzenza* muna Isaele.+

4 Vitila kolo kiakina, Eleyasibe+ wa nganga, wa yitu kia Tobiya+ yandi wakala se nkengi a malundilu* ma nzo* a Nzambi eto.+ 5 Wakubikila Tobiya e lundilu* diampwena dina dialundilwanga tukau twa mbwaza, ndumbu a nti a lebona, salanganu, tini yakumi ya mbwaza, vinyu yampa ye mazi,+ lekwa yayi i yau yavewanga kwa Anelevi,+ kw’ayimbidi ye ayingidi a mavitu yo tukau twa anganga.+

6 E kolo kiakina kiakala kuna Yerusaleme ko, kadi muna mvu una wa 32+ wa Antakesate+ wa Ntinu a Babele yavutuka kwa ntinu; vioka lumbu yakete, yalomba nswa kwa ntinu yavutuka kuna Yerusaleme. 7 Ndweke kuna Yerusaleme, mbwene o bi una wavanga Eleyasibe+ muna sadisa Tobiya,+ kadi wankubikila e lundilu vana yanzala kia nzo a Nzambi aludi. 8 Diankendeleka kikilu, i dianu yavetela e salanganu yawonso ya nzo a Tobiya kuna mbazi a lundilu.* 9 I bosi, nkanikini vo bavelelesa malundilu;* mvutwidi mo salanganu ya nzo a Nzambi aludi+ yo tukau twa mbwaza ye ndumbu a nti a lebona.+

10 Yawa mpe vo Anelevi+ ke bavewanga diaka kunku kiau ko,+ muna kuma kiaki, Anelevi ye ayimbidi ana basalanga e salu, bayenda kwau konso muntu kuna kiana kiandi.+ 11 Yatumba alandi a nguvulu,+ oku vo: “Ekuma yavezelwa e nzo a Nzambi aludi?”+ I bosi, ibakutakese yo kubavutulwisa muna fulu yau. 12 E Yuda yawonso yatwasa tini kia kumi+ kia mbwaza ye vinyu yampa ye mazi muna malundilu.+ 13 Ntumbikidi kinkengi kia malundilu kwa Selemeya wa nganga, Sadoke wa nsoneki yo Pedaya wa Nlevi, o Kanani wa mwan’a Zaku, wa mwan’a Mataneya yandi wabasadisanga, kadi vuvu babundwanga. Yau bakala ye kiyekwa kia kaya madia kwa mpangi zau.

14 E Nzambi ame, dodokolo ungindula+ muna kuma kiaki, kuvilakani walakazi wame ko una yasonga muna nzo a Nzambi ame ye salu kiandi.*+

15 E lumbu yayina yamona ankaka muna Yuda bakamanga e vinyu muna Lumbu kia Vundu,+ bakutikanga ntete mia masa yo natina mio muna mabuluku, batwasanga mpe vinyu ye uva, bundu ya nsanda, ye mazitu ma mpila zawonso muna Yerusaleme muna Lumbu kia Vundu.+ Yabavovesa vo ke bateki madia mu lumbu kiakina ko.* 16 Esi Turo ana bakala muna mbanza batwasanga mbizi za maza ye yinkita ya mpila zawonso, batekanga yo kwa Ayuda muna Yerusaleme, muna Lumbu kia Vundu.+ 17 Yatumba azitu a Yuda, oku vo: “Nkia mbi yayi nuvanganga, wau nusafulanga e Lumbu kia Vundu? 18 Mase meno ke wau ko bavanganga? O Nzambi eto ke mu kuma kiaki ko katwasila mbi yayi mu yeto ye muna mbanza yayi? Nga nuzolele kudikila makasi ma Nzambi muna Isaele wau nusafulanga Lumbu kia Vundu?”+

19 Ozevo, nkanikini vo mavitu ma Yerusaleme mazikwa vitila tombe kiabukama, i sia vo, vitila lubantiku lwa Lumbu kia Vundu. Nkanikini mpe vo ke mafwete ziulwa ko yavana kivioka e Lumbu kia Vundu, nsidi akaka muna selo yame bayingila mavitu kimana mwalembi koteswa konso funda muna Lumbu kia Vundu. 20 Ozevo, akiti ye ateki a lekwa ya mpila zawonso balele kuna mbazi a Yerusaleme lumbu kimosi yovo yole. 21 Ibalukisi, oku vo: “Ekuma nulekelanga vana yaka? Avo nuvangidi wo diaka, mu ngolo ikunukatulwila.” Tuka lumbu kiakina ke bayizanga diaka ko muna Lumbu kia Vundu.

22 Mpovese Anelevi vo bayivelelesanga e lumbu yawonso, beza langidilanga mavitu, kimana e Lumbu kia Vundu kiavaulwa.+ Ungindula mpe muna diambu diadi, e Nzambi ame, umfwila e nkenda muna walakazi waku wayingi.+

23 Muna lumbu yayina mbwene Ayuda ana basompele akento+ a esi Asedode,+ Amone y’esi Moabe.+ 24 Akaka muna wan’au nding’a Asedode ye ndinga za nkangu miankaka bavovanga, kansi ke bavovanga nding’a Yuda ko. 25 Yabatumba, yabalevola, yawanda akaka muna yau,+ yavuza nsuki zau, yabadisa e ndofi muna Nzambi, oku vo: “Ke nuvani wan’eno amakento kwa wan’au amakala ko, ngatu yambula vo wan’eno amakala babonga wan’au amakento yovo yeno kibeni nuababonga.+ 26 Nga Solomo wa Ntinu a Isaele ke mu diambu diadi ko kasumukin’e? Ke vakala ntinu wafwanana yandi ko muna zula yayingi;+ wazolakana kwa Nzambi andi,+ i kuma Nzambi kanyadikila se ntinu muna Isaele yawonso. Kansi, akento a nzenza bansumukisa.+ 27 Ekuma nuvangidi e mbi yayi yayingi yo sumukina Nzambi eto muna sompa akento anzenza?”+

28 Mosi muna wan’a Yoyada,+ wa mwan’a Eleyasibe+ wa ngang’ambuta, nzitu a Sambalati+ wa musi Korone kakala. I dianu yanyingila vana yakala.

29 E Nzambi ame, ubayindula, dodokolo, kadi basafwidi unganga ye kangu dia unganga+ ye kangu dia Anelevi.+

30 Ibavelelese muna usafu wa nzenza zawonso, nsidi anganga ye Anelevi muna fulu yau, konso muntu muna salu kiandi,+ 31 nkubikidi mpe salu kia twasa e nkuni+ muna ntangwa yasikididi ye bundu yantete yabwaka.

Ungindula, dodokolo, e Nzambi ame, muna wete.+