Afundisi

7 I bosi, o Yerubale, i sia vo, Ngidone,+ yo nkangu wawonso kakala wau batelamene muna mene-mene yo sikidisa ndo vana Sima kia Karode. E ndo ya Midiani ku node a ndo a Ngidone yakala kuna kundubulu kia More vana ndimba. 2 Yave ovovese Ngidone vo: “Wantu una yau engi muna yekola Midiani vana moko maku.+ Kadi e Isaele ilenda kuyisana vana ndose ame, oku vo: ‘Koko kwame kumpulwizi.’+ 3 Dodokolo, zayisa nkangu vo: ‘Konso ona omona wonga yo zakama, yambula kavutuka kuna nzo andi.’”+ Dianu vo, Ngidone ubatontele. Ozevo, 22.000 bavutukidi muna nzo zau, 10.000 kaka basala.

4 Yave ovovese Ngidone vo: “Yamu wau o nkangu wingi. Ubakulumuna kuna maza yabatontela kûna. Vava ikuvovesa vo: ‘Ndioyu okwenda yaku,’ yandi okwenda yaku, kansi avo mpovele vo: ‘Ndioyu ke kwenda yaku ko,’ ke kwenda yaku ko.” 5 Okulumwini nkangu kuna maza.

Yave ovovese Ngidone vo: “Konso ona oyenzama yo latula maza muna lubini, wauna o mbwa kelatulwilanga, umvambula ye awana befukamanga mu nua o maza.” 6 Lutangu lw’awana bazawidi o maza muna moko mu latula mo, 300. Kansi, awonso basidi yau bafukamene mu nua o maza.

7 Yave ovovese Ngidone vo: “Ikunuvuluzila muna 300 za wantu ana bazawidi o maza yo latula mo, iyekola Midiani vana moko maku.+ Vo i awonso basidi, bavutuka konso muntu kuna nzo andi.” 8 Vava batambwidi nkuta ye mpungi kwa nkangu, ovovese wantu akaka awonso bavutuka muna nzo zau, onete kaka 300 za wantu. E ndo ya Midiani kuna yanda yakala, kuna ndimba.+

9 Muna fuku wauna, Yave umvovese vo: “Telama wanuanisa e ndo, kadi ngiekwele yo vana moko maku.+ 10 Kansi, avo wonga omona muna kubanuanisa, kulumuka kuna ndo yo Pura wa selo kiaku. 11 Wá mana bevova, i bosi okala ye unkabu* wanuanisa e ndo.” Dianu vo Ngidone yo Pura wa selo kiandi bakulumukini kuna nsuk’a ndo ya makesa.

12 Esi Midiani ye esi Amaleke ye esi Este awonso,+ bamwanganene muna ndimba, ulolo nga makonko, e samo zau zilembi tangakana+ nze senge vana kumu dia kalunga. 13 O Ngidone vava kalweke, vakedi muntu ozingulwilanga nkwandi ndozi, oku vo: “Tala ndozi ndotele. Vakedi mbolo yavindumuka yavangilwa muna bale, inengomokene muna ndo a Midiani. Yilweke kuna saba, iwandamene e saba mu ngolo zawonso, e saba kibwidi.+ E saba kibangukidi yo bwa vana ntoto.” 14 O nkwandi ovovele vo: “Owau i nsosolo a Ngidone+ wa mwan’a Yoase wa Nyisaele. Nzambi oyekwele Midiani ye ndo yawonso vana moko mandi.”+

15 Ngidone vava kawidi e ndozi ye nsas’andi,+ ofukamene yo samba kwa Nzambi. I bosi ovutukidi kuna ndo a Isaele yo vova vo: “Nutelama, kadi o Yave oyekwele ndo a Midiani va moko meno.” 16 Ovambwidi 300 za wantu mu buka tatu, ovene kwa yau awonso mpungi+ ye mvungu miankatu mianene ye mini muna mvungu. 17 Ubavovese vo: “Nuntala, nuvanga konso owu ivanga. Vava ilwaka kuna nsuk’a ndo, konso owu ivanga u nuvanga. 18 Omono ye awonso bena yame, vava tusika e mpungi, oyeno mpe nusika e mpungi muna ndambu zawonso za ndo yo kaza oku vo: ‘Muna Yave ye muna Ngidone!’”

19 Ngidone ye 100 wantu kakala yau, balweke kuna nsuk’a ndo, mu lubantiku lwa ngingila yanzole ya fuku,* vava bamana soba ayingidi. Basikidi e mpungi+ yo wula mvungu miakala vana moko mau.+ 20 E buka yau tatu basikidi mpungi yo wula mvungu. Konso muntu osimbidi e mini vana koko kwalumonso ye mpungi vana koko kwalunene, basikidi zo, bakazidi oku vo: “Nsosolo a Yave ye wa Ngidone!” 21 Batelamene konso muntu vana fulu kiandi, bazietele e ndo. Makesa mawonso ma mbeni malundumukini yo kaza vava batinininge.+ 22 Ekolo 300 za wantu basikanga e mpungi, Yave ovilwidi nsosolo a konso muntu muna nkwandi muna ndo yawonso;+ makesa batinini yakuna Bete-sita kuna Serera, yakuna mwingilu a Abele-mekola,+ kuna Tabati.

23 Aneyisaele babokeleso tuka kuna Nafetali yo Asire yo Manase yawonso,+ balakamene Midiani. 24 O Ngidone otumini wantu muna zunga kiawonso kia miongo mia Eferaime, oku vo: “Nukulumuka mu nuanisa Midiani, yo baka masau yakuna Bete-bara kuna Yodani.” Ozevo, Aneferaime yawonso balungalakene, babakidi masau yakuna Bete-bara kuna Yodani. 25 Babakidi mfumu zole za Midiani, Orebe yo Zebe; bavondele Orebe vana tadi dia Orebe.+ Bavondele Zebe vana kaminu dia vinyu dia Zebe. Balakamene Midiani,+ batuese ntu mia Orebe yo Zebe kwa Ngidone kuna simu dia Yodani.