Wantete wa Ntinu

16 Ozevo, e diambu dia Yave mu kuma kia Basa dizidi kwa Yeu+ wa mwan’a Kanani,+ oku vo: 2 “Mono yatelamesa vana ntoto yo kukitula se ntu a nkangu ame Isaele,+ kansi ongeye okwamanene kangalela muna nzil’a Yerobame yo sumukisa nkangu ame Isaele, bankendeleka muna masumu mau.+ 3 Muna kuma kiaki, komba ikomba Basa ye nzo andi, ikitula yo nze nzo a Yerobame+ wa mwan’a Nebate. 4 Konso muntu muna nzo a Basa ofwila muna mbanza, mbwa zikundia; ona ofwila muna kiana, nuni za zulu zikundia.”

5 Vo i mambu mankaka ma lusansu lwa Basa, mana kavanga ye ngolo zandi, nga ke masonama ko muna nkand’a lusansu lwa ntinu mia Isaele? 6 I bosi, Basa olele yo mase mandi, ozikilu muna Tiresa,+ o Ela wa mwan’andi oyantikidi yala vana fulu kiandi. 7 E diambu dia Yave mu kuma kia Basa ye nzo andi dizidi diaka muna Yeu wa ngunza wa mwan’a Kanani, mu kuma kia bi wandi wawonso kavanga vana meso ma Yave yo kunkendeleka muna mavangu ma moko mandi, wau kakituka nze nzo a Yerobame ye mu kuma kia Nadabi wa mwan’a Yerobame+ kavonda.

8 O mvu una wa 26 wa luyalu lwa Asa wa selo kia Yuda, o Ela wa mwan’a Basa oyantikidi yala Isaele muna Tiresa, mvu miole kayala. 9 Zimere wa ntaudi andi, mfumu a ndambu a makalu mandi ma vita, umvuandidi e mfulu ekolo kanuanga yo kolwa malavu kuna Tiresa muna nzo a Aresa wa selo kia nzo a ntinu* muna Tiresa. 10 Zimere okotele, ovondele ntinu+ muna mvu una wa 27 wa luyalu lwa Asa wa Ntinu a Yuda, ovingidi vana fulu kiandi kia kintinu. 11 Zimere vava kayala yo vuanda vana kunda kia kimfumu, ovondele nzo yawonso ya Basa. Kasisidi kana yakala* dimosi ko yovo yitu* yandi ngatu akundi andi. 12 Dianu vo, Zimere ofukisi nzo yawonso ya Basa mun’owu wa diambu dia Yave dina kavova muna Yeu wa ngunza+ mu kuma kia Basa. 13 Ediadi diavangama mu kuma kia masumu mawonso ma Basa yo Ela wa mwan’andi ye nsumukisa basumukisa Isaele, bakendeleka Yave wa Nzambi a Isaele muna teke yau yakondwa mfunu.+ 14 Vo i mambu mankaka ma lusansu lwa Ela ye mawonso kavanga, nga ke masonama ko muna nkand’a lusansu lwa ntinu mia Isaele?

15 O mvu una wa 27 wa luyalu lwa Asa wa ntinu a Yuda, Zimere okitukidi se ntinu, lumbu nsambwadi kayala muna Tiresa ekolo makesa makiatama mu nuanisa Ngibetone+ ya Afelesetia. 16 I bosi, makesa mana makala muna ndo bawá dina diavovua vo: “Zimere ovuandidi ntinu e mfulu yo kumvonda.” Ozevo, muna lumbu kiakina Aneyisaele awonso bakala muna ndo batumbikidi Omere+ wa mfumu a makesa se ntinu muna Isaele. 17 Omere ye Isaele yawonso, batombokele tuka kuna Ngibetone, bazungidi Tiresa. 18 Vava Zimere kamwene vo mbanza ibakamene, okotele muna tininu dia nzo yandá ya ntinu,* oyokele e nzo yo fwila mûna.+ 19 Ediadi diavangama mu kuma kia masumu kavola wau kavanga mambu mambi vana meso ma Yave yo diatila muna nzil’a Yerobame ye muna sumu dina kasumukisa Isaele.+ 20 Vo i mambu mankaka ma lusansu lwa Zimere ye mfulu kavuandila o ntinu, nga ke masonama ko muna nkand’a lusansu lwa ntinu mia Isaele?

21 O nkangu a Isaele wavambana mu buka yole. E buka kimosi kialanda Tibini wa mwan’a Nginati ye kani dia kunkitula se ntinu, e buka kiankaka kialanda Omere. 22 Kansi, alandi a Omere basundidi alandi a Tibini wa mwan’a Nginati. I dianu vo, Tibini ofwidi, Omere okitukidi se ntinu.

23 Muna mvu una wa 31 wa luyalu lwa Asa wa Ntinu a Yuda, Omere oyantikidi yala Isaele, mvu 12 kayala. Mvu sambanu kayala muna Tiresa. 24 Osumbidi mongo a Samaria kwa Semere muna talanta zole* za palata, otungidi mbanza vana mongo. E mbanza ina katunga, ovene yo nkumbu a Samaria,*+ kadi Semere i mfumu a mongo. 25 Omere wavanganga mambu mambi vana meso ma Yave, osundidi awonso ana bamvita muna vang’o bi.+ 26 Wakangalela muna nzila zawonso za Yerobame wa mwan’a Nebate ye muna sumu diandi kasumukisa Isaele yo kendeleka Yave wa Nzambi a Isaele muna teke yau yakondwa mfunu.+ 27 Vo i mambu mankaka ma lusansu lwa Omere, mana kavanga ye nkum’andi, nga ke masonama ko muna nkand’a lusansu lwa ntinu mia Isaele? 28 I bosi, Omere olele yo mase mandi, ozikilu muna Samaria; Akabi+ wa mwan’andi oyantikidi yala vana fulu kiandi.

29 O mvu una wa 38 wa luyalu lwa Asa wa Ntinu a Yuda, Akabi wa mwan’a Omere okitukidi se ntinu a Isaele, Akabi wa mwan’a Omere mvu 22 kayala Isaele muna Samaria.+ 30 Akabi wa mwan’a Omere osundidi awonso ana bamvita muna vang’o bi+ vana meso ma Yave. 31 Vana ntandu a kangalela muna masumu ma Yerobame+ wa mwan’a Nebate, wabonga mpe Izebele+ wa mwan’a Etebale wa ntinu a Sidone,+ oyantikidi sadila Bale+ yo kumvumbamena. 32 Otungidi mpe ziku dia Bale muna nzo* a Bale+ ina katunga muna Samaria. 33 Akabi ovangidi mpe vindi diavauka.*+ Akabi mambu mayingi kavanga mana makendeleka Yave wa Nzambi a Isaele lutila ntinu miawonso mia Isaele miamvita.

34 Muna lumbu yandi, o Kiele wa musi Betele otungulwidi Yeriko. Vava kakuba e nkubilw’a mbanza, Abirami wa mwan’andi antete wafwa, vava katungulula mavitu ma mbanza, Sengube wa mwan’andi wansuka wafwa mun’owu wa diambu dia Yave dina kavova muna Yosua wa mwan’a Nuni.+