Kuna Kwa Ayibere
5 Kadi konso ngang’ambuta osolelo vana vena wantu, otumbikwanga muna wete dia wantu muna mambu mana ma Nzambi,+ kimana katambika tukau ye yimenga mu kuma kia masumu.+ 2 Olenda fwila nkenda* awana ke bena yo zayi ko y’awana bevanganga vilwa,* kadi yandi mpe onuananga ye lutovoko lwa yandi kibeni, 3 kiaki i kuma kafwete tambikila tukau muna masumu ma yandi kibeni nze una kevanganga muna masumu ma nkangu.+
4 Kavena muntu ko okuyitumbikanga se ngang’ambuta, Nzambi kaka okunsolanga, nze una kasolela Arone.+ 5 Diau dimosi mpe yo Kristu, ke yandi kibeni+ ko wakikembesa kimana kakala se ngang’ambuta, kansi wakembeswa kwa Ndiona wamvovesa vo: “Ngeye u mwan’ame; o unu nkitukidi se diaku.”+ 6 Wauna kavovele mpe vana fulu kiankaka vo: “Ongeye u nganga yakwele mvu, nze kinganga kia Mankizedeke.”+
7 Muna zingu kiandi ova ntoto,* Kristu wadodokela yo lomba muna kâzu kiangolo ye mansanga+ kwa Ndiona wafwana kumvuluza muna lufwa, wawakana mu kuma kia vumi wandi kwa Nzambi. 8 Kana una vo mwana kakala, walongoka nlemvo muna mpasi kamona.+ 9 Vava kazikulwa muna mawonso,+ wakituka se ntu a luvuluzu lwakwele mvu kw’awonso ana bekunlemvokelanga,+ 10 e kuma kadi watumbikwa se ngang’ambuta kwa Nzambi, e kinganga nze kia Mankizedeke.+
11 Mambu mayingi tuna mau mu vova mu kuma kiandi, diampasi mu sasila mo, kadi nukitukidi se afwa-matu. 12 Mun’owu wa kolo nuviokese kala, nuafwana kala alongi, kansi muntu diaka nuvuidi o mfunu kanulonga mambu mantete+ mavauka ma Nzambi tuka kuna lubantiku, nuvutukidi yangalela kimvumina, ke mu madia mangolo ko. 13 Kadi konso ndiona okwamanananga nua kimvumina, kazeye diambu dia unsongi ko, kadi nsedia kwandi.+ 14 Kansi madia mangolo m’awana bazikuka, awana bena vo, wau bayukwa sadila umbakuzi wau, balongwa mu zaya swaswanesa edi diambote ye diambi.