Mavangu ma Zintumwa

7 Kansi ngang’ambuta ovovele vo: “Nga mambu mama i una men’e?” 2 Setefano ovutwidi vo: “Ampangi yo mase, nuwá. Nzambi a nkembo wamoneka kwa se dieto Abarayama ekolo kakala kuna Mesopotamia, vitila kenda zingila kuna Karani,+ 3 umvovese vo: ‘Sisa e nsi aku ye yitu yaku, wenda kuna nsi ikusonga.’+ 4 I bosi, okatukidi muna nsi ya Akaladi, wele zingila kuna Karani. Vava o se diandi kafwa,+ Nzambi wamfila muna nsi yayi, eyi nuzingilanga owau.+ 5 Kansi kamvanina mo e vua ko, kana nkutu fulu kalenda sia tambi kiandi; kansi wansia nsilu vo okumvana yo se vua ye kwa mbongo andi,+ kana una vo kakala yo mwana ko. 6 Nzambi wamvovesa diaka vo e mbongo andi ikala se nzenza muna nsi angani, o nkangu ukubabunduna yo kubabangika mu 400 za mvu.+ 7 ‘Ifundisa e zula kikubabunduna,’+ u kavovele Nzambi, ‘vava kivioka e mambu mama bevaika yo kwiza kunsadila salu kiavauka ova fulu kiaki.’+

8 “Wakanga yandi mpe e kangu dia zengwa,+ vava kawuta Isaki, wanzenga muna lumbu kianana,+ Isaki+ wawuta* Yakobo, Yakobo wawuta ntu mia makanda* 12. 9 Ntu mia makanda bamwenene Yosefe kimpala,+ bantekele kuna Engipito.+ Kansi Nzambi wakala yandi,+ 10 umvulwizi muna mpasi zandi zawonso yo kumvana e ngangu yo kunsonga e dienga vana ndose a Faro wa ntinu a Engipito. Unsolele kayala Engipito ye nzo andi yawonso.+ 11 Vava mvengele wakota muna Engipito yawonso ye Kenani, elo, mpasi zayingi watwasa, mase meto ke bakala ye lekwa kia dia ko.+ 12 Kansi Yakobo owidi wo vo madia mena kuna Engipito, otumini mase meto muna nkumbu antete.+ 13 Muna nkumbu yanzole, Yosefe uyisunzwidi kwa mpangi zandi, e kanda dia Yosefe dizayakene kwa Faro.+ 14 Dianu vo, Yosefe otwikidi e nsangu kuna Kenani, obokelese Yakobo wa se diandi ye yitu yandi yawonso,+ wantu* 75.+ 15 Yakobo wakulumuka kuna Engipito,+ i kûna kafwila,+ yo mase meto mpe.+ 16 Banatwa kuna Sekeme, yo zikwa muna ziami kina Abarayama kasumbila muna nzimbu za palata kwa wan’a Kamo kuna Sekeme.+

17 “Ekolo kiafinamanga e ntangwa ilungana o nsilu una Nzambi kasila Abarayama, o nkangu wawokelanga yo wutana muna Engipito, 18 yavana kiayala ntinu ankaka muna Engipito, ona kazaya Yosefe ko.+ 19 Ntinu ndioyo wasadila ndekwa zambi mu fukisa kanda dieto, wakomekena mase meto babembola wan’au kimana bafwa.+ 20 Muna ntangwa yayina, Mose wawutuka, mote kakala vana ndose a Nzambi. Wasanswa ngonde tatu muna nzo a se diandi.+ 21 Kansi, vava kabembolwa,*+ o mwan’ankento a Faro wambonga yo kunsansa nze mwan’andi.+ 22 Dianu vo, Mose walongelwa muna ngangu zawonso za esi Engipito. Wakumama muna mvovo ye mavangu.+

23 “Vava kalungisa kimbuta kia mvu 40, wabaka nzengo za* kwenda kingula mpangi zandi, wan’a Isaele.+ 24 Vava kamona musi Engipito mosi wamwesanga mwan’a Isaele e mpasi, wasadisa mpangi andi, walanda kunda muna vonda musi Engipito. 25 Edi kayindula vo mpangi zandi bebakula vo o Nzambi muna moko mandi kekubavuluzila, kansi ke babakula wo ko. 26 Muna lumbu kialanda, wamoneka kwa yau ekolo nwole muna yau banuananga, wavava vutulwisa ngwizani au, oku vo: ‘Oyeno nu ampangi. Ekuma nunuaninanga?’ 27 Kansi, ndiona wasunda nkwandi e ngolo wanunguna Mose yo vova vo: ‘Nani utumbikidi se mfumu ye mfundisi eto? 28 Nga ozolele kumponda wauna ovondelenge musi Engipito o zono e?’ 29 Mose vava kawidi wo, otinini yo kwenda zingila se nzenza muna nsi ya Midiani, i kuna kawutila wana wole.+

30 “Vava kiavioka mvu 40, mbasi mosi yamoneka kwa yandi muna makanga ma Mongo a Sinai muna nlaku a tiya twa mvanga* walemanga.+ 31 Vava Mose kamona wo, wasivika kikilu. Kansi wau kafinama kimana katoma tala, wawá nding’a Yave,* oku vo: 32 ‘Omono i Nzambi a mase maku, Nzambi a Abarayama yo Isaki yo Yakobo.’+ Mose oyantikidi zakama, kalendele wo tala diaka ko. 33 Yave* umvovese vo: ‘Katula e nsampatu muna malu maku, kadi e fulu kina otelamene i ntoto avauka. 34 Kieleka, mbwene e mpasi za nkangu ame una muna Engipito, ngwidi e kazu kiau,+ nkulumukini yabakûla. Owau wiza, yatuma kuna Engipito.’ 35 O Mose ona babembola, oku vo: ‘Nani utumbikidi se mfumu ye mfundisi eto?’+ i yandi o Nzambi katuma+ se mfumu ye nkûdi muna mbasi ona wamoneka kwa yandi vana mvanga.* 36 Yandi wabavaikisa,+ wavanga masivi ye sinsu muna Engipito,+ muna Mbu Ambwaki+ ye muna makanga, mu mvu 40.+

37 “O Mose i yandi wavova kwa wan’a Isaele vo: ‘Nzambi okunuvaikisila ngunza nze mono vana vena mpangi zeno.’+ 38 I yandi wakala vana vena nkutakani muna makanga; yandi wakala ye mbasi+ ona wamvovesa+ vana Mongo a Sinai yo mase meto, watambula nsangu zamoyo, zavauka yo kutuvana zo.+ 39 Mase meto ke banlemvokela ko, kansi bambembola+ yo vutuka kuna Engipito muna ntima miau,+ 40 bavova kwa Arone vo: ‘Utuvangila nzambi zina zikutuvita o ntu. Kadi vo i Mose ndioyo, ona watuvaikisa muna nsi ya Engipito, ke tuzeye ko dina dimbwididi.’+ 41 Dianu vo, muna lumbu yayina bavanga mwan’a ngombe, batambika kimenga kwa teke, bayantika yangalala muna salu ya moko mau.+ 42 Nzambi wababembola, wabayambula basambila e vu kia zulu,+ wauna wasonama muna nkanda wa Angunza vo: ‘E nzo a Isaele, nga kwa mono nuatambika tukau ye yimenga muna mvu 40 nuakala muna makanga? 43 Nuanata saba kia Moloke+ ye ntetembw’a nzambi Refane, e teke ina nuavanga yo sambila yo. Dianu vo, ikununata kwandá vioka Babele.’+

44 “Mase meto bakala ye saba kia umbangi muna makanga, wauna Nzambi kakanikina Mose vo kavangila kio mun’owu wa mbandu ina kamona.+ 45 Mase meto ana batambula kio se vua, batwasa kio mpe yo Yosua muna nsi a zula+ ina Nzambi kayinga vana ndose a mase meto.+ I kuna kiakala yamuna lumbu ya Davidi. 46 Wakala ye dienga vana ndose a Nzambi yo lomba vo katungila Nzambi a Yakobo e nzo.+ 47 Kansi, Solomo wantungila e nzo.+ 48 Kana una vo, o Mpungu-nene ke zingilanga mu nzo yatungilwa mu moko ko,+ nze una kavova o ngunza: 49 ‘E zulu i kunda kiame kia kimfumu,+ o ntoto i sikinua kia tambi yame.+ Nkia mpila nzo nuzolele kuntungila? u kavovele o Yave.* Yovo, akweyi kina e fulu kiame kia vundila? 50 Nga ke koko kwame ko kwavanga lekwa yayi yawonso?’+

51 “Nu akwa lulendo, nu akwa ntima yo matu malembi zengwa, ntangwa zawonso nukakidilanga o mwand’avelela; wauna wavanga mase meno, i wau mpe nuvanganga.+ 52 Nkia ngunza walembi bangikwa kwa mase meno?+ Elo, bavonda awana bateka samuna e ngiz’a muntu a nsongi,+ ona nukitukidi se ayekodi ye avondi.+ 53 Yeno nuatambula o Nsiku una nuazayiswa kwa ambasi,+ kansi ke nualunda wo ko.”

54 Vava bawidi mambu mama, bafungidi kikilu makasi* muna ntima miau, bankwetesele o meno. 55 Kansi oyandi, ozele yo mwand’avelela, otadidi kuna zulu, omwene nkembo a Nzambi yo Yesu ovuende kuna koko kwalunene kwa Nzambi,+ 56 ovovele vo: “Tala, mbwene zulu diziukidi yo Mwan’a muntu+ otelamene kuna koko kwalunene kwa Nzambi.”+ 57 Muna diadi, bakazidi muna nding’angolo, bakakidi matu mau, yau awonso banyilamene. 58 Vava bamvaikisi kuna mbazi a mbanza, bayantikidi kuntuba matadi.+ Ambangi+ basidi e mvuatu miau vana malu ma toko wayikilwanga vo Saulu.+ 59 Ekolo betubilanga Setefano matadi, ovovele vo: “E Mfumu Yesu, tambula mwand’ame.” 60 I bosi, ofukamene, okazidi muna nding’angolo vo: “E Yave,* kubayekeka sumu diadi ko.”+ Vava kavovele ediadi, olele muna lufwa.