Levitiku
17 Yave ovovese Mose vo: 2 “Vovesa Arone yo wan’andi yo Aneyisaele awonso vo: ‘I wau wuwu kakanikini o Yave:
3 “‘“Avo muntu muna nzo a Isaele ovondele ngombe a koko yovo mwan’a meme dia koko yovo nkombo a koko muna ndo yovo umvondele kuna mbazi a ndo, 4 kansi kantwese vana mwelo a saba kia wananina ko kansunzula se lukau kwa Yave, vana ntwal’a saba kia Yave, o muntu ndioyo nkanu a menga kenata. Menga kabungwidi, kafwete vondwa vana vena o nkangu andi. 5 Ediadi divangama kimana o wan’a Isaele balembi vondela diaka e bulu yau va fulu kiasenzama, kansi banatanga yo kwa Yave vana mwelo a saba kia wananina, kuna kwa nganga. Batambikanga yo se yimenga ya ungudi kwa Yave.+ 6 O nganga ozaza e menga vana ziku dia Yave, vana mwelo a saba kia wananina yo futumuna mazi vana tiya se lekwa kia nsunga* kuna kwa Yave.+ 7 Mu mpila yayi, ke betambika diaka yimenga ko kwa nkuya mina nze nkombo,*+ mina betanga miau e zumba muna kubasambila.+ Owau ukala se nkanikinu wa mvu ke mvu muna mbandu zeno zawonso.”’
8 “Ofwete kubavovesa vo: ‘Konso muntu muna nzo a Isaele yovo konso nzenza ozingilanga vana kati kweno, ona otambika lukau lwa ngioka yovo kimenga 9 yo lembi lo twasa vana mwelo a saba kia wananina mu tambika lo kwa Yave, kafwete vondwa vana vena o nkangu andi.+
10 “‘Avo muntu muna nzo a Isaele yovo nzenza ozingilanga vovo nuina odidi menga ma konso vangwa,+ bembola kikilu ibembola o muntu odidi o menga yo kumvonda vana vena o nkangu andi. 11 Kadi o moyo a konso vangwa muna menga i wina,+ mono kibeni inuvene mo kimana nualombelanga luyambulwilu lwa masumu meno* vana ziku.+ Kadi o menga i metwasanga luyambulwilu lwa masumu+ muna moyo una muna menga. 12 I dianu yavovesela Aneyisaele vo: “Ke muntu ko vovo nuina ofwete dia menga, ke mosi ko muna nzenza zizingilanga vovo nuina+ ofwete dia menga.”+
13 “‘Avo mosi muna Aneyisaele yovo nzenza wina vovo nuina obakidi bulu kia mfuta muna nkonda yovo nuni ina ilenda diwa, kafwete tiamuna menga mandi+ yo fukila mo ntoto. 14 Kadi o moyo a vangwa ya mpila zawonso i menga mandi, wau vo o moyo muna menga i wina. Kiaki i kuma yavovesele Aneyisaele vo: “Ke nufwete dia menga ma konso vangwa ko, kadi o moyo a konso vangwa i menga mandi. Konso muntu odia menga kafwete vondwa.”+ 15 Konso muntu, kiakala mungutukila yovo nzenza odidi bulu kiwanukini kiafwa yovo kivondelo kwa bulu kia mfuta,+ kafwete sukula e mvuatu miandi yo yowela muna maza, okala wafunzuka yamuna nkokela;+ i bosi kekala wavelela. 16 Kansi, avo kasukwidi mvuatu miandi ko ngatu yowela,* otumbwa mu kuma kia bi wandi.’”+