Levitiku

5 “‘Avo muntu owidi nkoki wa kwenda tá kimbangi,*+ kansi o muntu ndioyo kele ko mu zayisa e diambu dina kenena vo mbangi yovo dina kamwene yovo dina kazeye, sumu kavolele, ozevo otumbwa mu kuma kia bi wandi.

2 “‘Yovo, avo muntu osimbidi konso lekwa kiafunzuka, kiakala vimbu dia bulu kiafunzuka kia mfuta yovo dia bulu kiafunzuka kia vata yovo dia vangwa kiakete+ kikiyilanga mu buka, muntu ndioyo ofunzuka, ngielele kekala yau, kana nkutu vo kazeye wo ko. 3 Yovo, avo muntu lembi wo zaya, osimbidi mfunzuka a muntu+—konso lekwa kilenda kunkitula wafunzuka—i bosi obakwidi wo, ngielele kekala yau.

4 “‘Yovo, avo muntu odidi ndofi ya vanga konso diambu lembi teka yindula—kiakala vo ndofi ya vanga diambu diambote yovo ya vanga diambu diambi, kiakala konso diambu—i bosi obakwidi vo ndofi kadidi lembi teka yindula, o muntu ndioyo ngielele kekala yau.*+

5 “‘Avo muntu ovangidi dimosi muna mambu mama, ozevo kafwete funguna+ e sumu diandi. 6 Otwasa mpe lukau lwa kuzuka kwa Yave mu kuma kia sumu kavolele,+ i sia vo, mwan’a meme dia nkento yovo mwan’a nkombo wa nkento se lukau lwa sumu. I bosi, o nganga olomba luyambulwilu lwa masumu mu kuma kiandi.

7 “‘Kansi, avo kena ye nzimbu zafwana ko mu sumba meme, kafwete twasa kwa Yave mbwela zole yovo nsweswe miole mia mayembe+ se lukau lwandi lwa kuzuka mu kuma kia sumu, nuni mosi se lukau lwa sumu, nuni mosi se lukau lwa ngioka.+ 8 Otwasa zo kwa nganga, ona osunzula ntete e nuni ya lukau lwa sumu yo zenga vana laka diandi muna zala, lembi zatuna o ntu andi. 9 O nganga ozaza e ndambu a menga ma lukau lwa sumu muna yaka ya ziku, kansi o menga mesuva meyitilwa vana sina dia ziku.+ Olwalu i lukau lwa sumu. 10 Ovanga diau dimosi muna nuni ya lukau lwa ngioka, wauna wasikidiswa;+ o nganga olomba luyambulwilu lwa sumu kavolele o muntu, e sumu diandi dilolokwa.+

11 “‘Kansi, avo kena ye nzimbu zafwana ko mu sumba mbwela zole yovo nsweswe miole mia mayembe, kafwete twasa tini kiakumi kia efa*+ kia mfumfu yambote se lukau lwa sumu mu kuma kia sumu diandi. Kafwete mo sanga mazi ko yovo sia mo ndumbu a nti a lebona, kadi lukau lwa sumu. 12 Otwasa e mfumfu kwa nganga, o nganga obonga koko kumosi kwa mfumfu se sinsu kisunzulanga lukau lwawonso* yo futumuna yo vana ziku, vana ntandu a tukau kwa Yave vana tiya. Olwalu i lukau lwa sumu. 13 O nganga olomba luyambulwilu lwa masumu mu kuma kia muntu, konso sumu kavovele muna masumu mama dilolokwa.+ Kina kisuva muna lukau lwalu kia nganga,+ nze una uvangwanga muna lukau lwa mbwaza.’”+

14 Yave okwamanene vovesa Mose vo: 15 “Avo muntu lembi wo kana, okondelo kwikizi wau kakulwidi o nsiku mu kuma kia lekwa yavauka ya Yave,+ obonga meme dia koko dialunga muna kambi yo twasa dio kwa Yave se lukau lwa kuzuka;+ e ntalu andi muna sekele* za palata, ikala mun’owu wa sekele ya fulu kiavauka.*+ 16 Ofuta e ntalu a lekwa yavauka ina kasumukini, okudikila mpe tini kiatanu kia ntalu yoyo.+ Ovana yo kwa nganga kumosi ye meme dia koko dia lukau lwa kuzuka, kimana o nganga kalomba luyambulwilu lwa sumu+ dia muntu, e sumu diandi dilolokwa.+

17 “Avo muntu osumukini muna vanga konso diambu kasima o Yave, kana nkutu vo kabakwidi wo ko, ngielele kekala yau, otumbwa mu kuma kia bi wandi.+ 18 Obonga meme dia koko dialunga muna kambi yo twasa dio kwa nganga se lukau lwa kuzuka, mun’owu wa ntalu isikidiswa.+ I bosi, o nganga olomba luyambulwilu lwa sumu dia muntu, mu kuma kia mbi kavangidi lembi wo zaya, e sumu diandi dilolokwa. 19 Olwalu i lukau lwa kuzuka. Ngielele kikilu kena yau wau kasumukini Yave.”