Afundisi
15 Ke vavioka kolo ko, muna nsungi a nkutik’a masa, Samesone wele kingula nkaz’andi, onete mwan’a nkombo. Ovovele vo: “Nzolele kwenda kwa nkaz’ame muna suku.” O se dia mwan’a ndumba kanyambwidi ko kakota. 2 O se dia mwan’a ndumba umvovese vo: “Yabenze vo ‘Menga okumenganga.’+ I diau yamvanini kwa nkundi aku a longo.+ Nleke andi nga kalutidi vienga ko yo yandi? Umbonga kavinga vana fulu kiandi.” 3 Kansi, Samesone ubavovese vo: “Owau Afelesetia ke balendi kumpana ngielele ko wau ikubamwesa e mpasi.”
4 Samesone wele baka 300 za mfwenge. Obongele sisi ya tiya, okangidi mfwenge zole-zole muna nkila yo sia sisi ya tiya muna nkila miau miole. 5 I bosi, okwikidi sisi ya tiya, oyambwidi mfwenge zenda muna mpatu za masa za Afelesetia. Oyokele yawonso, ntete mia masa, mbongo yalembi kutikwa, mpatu za vinyu ye za olive.
6 Afelesetia bayuvuidi vo: “Nani ovangidi e diambu diadi?” Bavoveso vo: “Samesone wa mwan’a longo wa musi Timena, kadi wabongele nkaz’andi yo kumvana kwa nkundi andi a longo.”+ Ozevo, Afelesetia batombokele, bayokele nkento yo se diandi.+ 7 Samesone ubavovese vo: “Wau vo nuvangidi e diambu diadi, kidingalala ko yavana ikunulanda e kunda.”+ 8 Ubavondele mosi-mosi, ndonga kavondele, i bosi okulumukini, wele kala muna nduk’a tadi dia Etame.
9 Afelesetia batombokele yo sikidisa ndo muna Yuda, bazietele muna Leki.+ 10 Esi Yuda bayuvuidi vo: “Ekuma nuizidi kutunuanisina?” Bavutwidi vo: “Samesone twizidi kanga, twamvanga nze una katuvanga.” 11 Dianu vo, 3.000 ma esi Yuda bakulumukini kuna nduk’a tadi dia Etame, bavovese Samesone vo: “Nga kuzeye wo ko vo Afelesetia bekutuyalanga?+ Ekuma utuvangidi e diambu diadi?” Ubavovese vo: “Una bampangidi, i wau ibavangidi.” 12 Bamvovese vo: “Baka twizidi kubaka, twayekola vana moko ma Afelesetia.” Samesone ovovele vo: “Nundila e ndofi vo yeno kibeni ke nukumpanga diambu ko.” 13 Bamvovese vo: “Ve, kanga kaka tukukanga yo kutambika vana moko mau, kansi ke tukuvonda ko.”
Dianu vo bankangidi mu nsinga miole miampa yo kumvaikisa muna nduka. 14 Vava kalwaka kuna Leki, Afelesetia una bamona Samesone bakazidi. O mwand’a Yave unkumikini,+ e nsinga bankangila moko mikitukidi nze vusu diaziniswa va tiya, misotokele muna moko mandi.+ 15 Omwene visi kiampa kia matandi ma buluku; olambwidi koko obongele kio yo vondela kio 1.000 dia wantu.+ 16 Samesone ovovele vo:
“Muna visi kia matandi ma buluku—zudika dimosi, mazudika mole!
Muna visi kia matandi ma buluku, mpondele 1.000 dia wantu.”+
17 Vava kamana vova, olozele e visi kia matandi ma buluku, oyikidi fulu kiakina vo Rama-leki.*+ 18 I bosi, omwene vuina diayingi, obokele kwa Yave, oku vo: “Ngeye ovene luvuluzu lwalu lwampwena kwa selo kiaku. Owau nga yafwila muna vuina yo bwa vana moko ma mindembi zengwa?” 19 Nzambi owudidi e tadi diakala muna Leki, muvaikidi maza.+ Vava Samesone kanuini, o mwand’andi uvutukidi,* okumamene. I kuma kayikila fulu kiakina vo Ene-akore,* kiakinu muna Leki yamu unu kiaki.
20 Samesone mvu 20 kafundisa Isaele muna lumbu ya Afelesetia.+