Kuna kwa Esi Ngalatia
2 Vava kiavioka mvu 14, yatomboka diaka kuna Yerusaleme yo Banaba,+ Tito mpe wayenda yame.+ 2 Yatomboka ko mu diambu dia lusengomono, yabazayisa e nsangu zambote isamunanga vana vena esi zula. Kiavangila wo va fulu kia ndonga ko, kansi vana vena awana batoma zitiswanga, kimana yakala ye ziku vo uselo wame ke wankatu ko. 3 Ozevo, Tito+ nkutu ona wakala yame, kakomekenua ko vo kazengwa,+ kana una vo Mungerekia. 4 Kansi e diambu diadi diavaika mu kuma kia mpangi zaluvunu ana bakoteswa muna kinsweki,+ ana bakota nze alangi mu vava fwasa luvevoko+ tuna lwau muna Kristu Yesu, kimana batubunduna emvimba;+ 5 ke twabalemvokela ko,+ kana nkutu mu fikolo,* kimana e ludi kia nsangu zambote kiakala kaka muna yeno.
6 Kansi, mu kuma kia awana bamonekanga vo wantu a mfunu+—kiakala aki nani bakala, ke dina mfunu ko kwa mono, kadi Nzambi ke talanga ndose ko—wantu awaya batoma zitiswanga ke bandonga diambu diampa ko. 7 Kansi vava bamona vo yavewa kiyekwa kia samuna e nsangu zambote kw’awana balembi zengwa,+ wauna Petelo kasilwa kiyekwa kia awana bazengwa— 8 kadi ndiona wavana Petelo e wisa kia kintumwa mu kuma kia awana bazengwa, wampana mpe e wisa kia kintumwa kuna kwa esi zula+— 9 vava babakula e nsambu zina yavewa,+ Yakobo,+ Kefa* yo Yoane, ana bamonekanga vo malunzi, omono yo Banaba+ batuvene o koko kwalunene muna songa vo batutambulwidi* kimana oyeto twenda kwa esi zula, kansi oyau kuna kw’awana bazengwa. 10 Batuvovesa kaka vo twasungamenanga asukami, omono mpe isianga ngolo zayingi mu vanga wo.+
11 Kansi vava Kefa*+ kayiza oku Antiokia,+ yantumba vana ndose andi, kadi diatoma moneka vo diambu diambi kavanga. 12 Kadi vitila balwaka wantu ana batuka kwa Yakobo,+ wadilanga vamosi ye esi zula;+ kansi vava balwaka wayambula wo vanga yo kubavambuka, mu kuma kia wonga wa awana bazengwa.+ 13 Ayuda ankaka mpe banyikama muna umpuki wandi, kana nkutu Banaba wavukumunua muna umpuki wau. 14 Kansi, vava yamona vo ke bakangalelanga mu ludi kia nsangu zambote ko,+ yavovesa Kefa* vana vakala yau awonso, oku vo: “Ngeye, kana una vo u Nyuda, kuzingilanga nze Ayuda ko kansi nze musi zula. Ozevo, ekuma okomekenanga esi zula bazingila mun’owu wa Kiyuda?”+
15 Oyeto tuna vo Ayuda a kingutukila, ke tu asumuki a zula ko, 16 tuzeye wo vo muntu ke lungisilwanga muna mavangu ma nsiku ko, kansi muna lukwikilu+ muna Yesu Kristu kaka.+ Oyeto tukwikidi muna Kristu Yesu, kimana twalungisilwa muna lukwikilu muna Kristu, kansi ke muna mavangu ma nsiku ko, e kuma kadi ke mosi ko olungisilwa muna mavangu ma nsiku.+ 17 Kansi oyeto, avo tubadikilwanga vo tu asumuki wau tuvavanga lungisilwa muna Kristu, nga Kristu sumu kesadilanga? Ke wau ko! 18 Avo ntelamese lekwa ina yabwisa, isonganga vo i nsumuki. 19 Kadi muna nsiku mono yafwa muna nsiku,+ kimana yazinga mu kuma kia Nzambi. 20 Owau nkomeno kumosi yo Kristu vana nti.+ Ndiona ozinganga ke mono diaka ko,+ kansi i Kristu ozinganga omu mono. Ozevo, owau o moyo ngina wau muna nitu, izingilanga wo muna lukwikilu lwame muna Mwan’a Nzambi,+ ona wanzola yo kukiyekola muna wete diame.+ 21 Kibembwele nkenda za Nzambi ko,+ kadi avo muntu muna nsiku kelungisilwa, ozevo, lufwa lwa Kristu ke luna mfunu ko.+