Wanzole wa Paulu Kuna kwa Esi Korinto
8 Ampangi, owau tuzolele kunuzayisa e nsambu za Nzambi zina zavewa kwa nkutakani za Makedonia.+ 2 Kana nkutu muna mpasi zayingi muna kolo kia lutonto, e kiese kiau kiayingi yo usukami wau wayingi, wawokesa umvuama wau wavanina kuna mvevo. 3 Kadi bavangila wo mun’owu wa ndendelo zau,+ nsidi umbangi vo bavana nkutu lutila e ndendelo zau,+ 4 kadi muna lukanu lwa yau kibeni, batudodokelanga kimana bavewa e lau dia vanina kuna mvevo, basala e salu kia* sadisa avauki.+ 5 Bavanga nkutu lutila una twayindulanga, entete bakivana muna Mfumu ye kwa yeto mpe muna luzolo lwa Nzambi. 6 Dianu vo, tukasakese Tito+ kafokola e salu kia tambula tukau tweno twa mvevo, kadi yandi wayantika kio vana kati kweno. 7 Kansi, wauna nuavuamina muna mawonso, muna lukwikilu, muna mvovo, muna zayi, muna luzolo lwawonso yo muna zola kweto muna yeno, nuavuamina mpe muna vanina kuna mvevo.+
8 Ediadi mpovele ke nsiku ko, kansi mpovele dio mu kunusonga luzolo lwa wantu ankaka yo tonta e ziku kia zola kweno. 9 Kadi nuzeye zo e nkenda za Mfumu eto Yesu Kristu, kana una vo mvuama kakala, wasukama muna diambu dieno,+ kimana oyeno nuavuamina muna usukami wandi.
10 E ngindu zame muna diambu diadi i zazi:+ E salu kiaki nluta kikunutwasila, kadi mvu wamvimba uviokele kala tuka nuayantikila e salu kiaki, kansi nusonganga mpe luzolo lwa sala kio. 11 Dianu vo, nufokola e salu kina lwayantika, kimana luzolo lweno lwa sala lwalungana mun’owu wa ndendelo zeno. 12 Kadi avo luzolo lwa vana luna, o lukau lutondakana, musungula avo muntu ovanini mun’owu wa kina kena kiau,+ ke mun’owu wa kina kena kiau ko. 13 Kadi kizolele vevola akaka ko yo kudikila zitu kwa yeno; 14 kansi muna diambu dia mfwanani,* owau yambula ulolo weno walungisa e nsatu zau, o ulolo wau mpe walungisa e nsatu zeno, muna mpila yayi vekala ye mfwanani.* 15 Wauna wasonama vo: “Ndiona wakala ye yayingi, kakala ye nsuvila ko, ndiona wakala ye yakete, kakondwa lekwa ko.”+
16 Matondo kwa Nzambi wau kasia muna ntim’a Tito+ luzolo tuna lwau mu kuma kieno, 17 e kuma kadi, wau katambwidi lukasakeso lweto, una ye luzolo lwayingi lwa kwiza kwa yeno muna lukanu lwa yandi kibeni. 18 Kansi tuntumini kumosi yo mpangi ona ozitiswanga muna nkutakani zawonso muna diambu dia nsangu zambote. 19 Ke diau kaka ko, kansi wasolwa mpe kwa nkutakani kimana kakala nkweto muna nkangalu, wau tulunga-lunganga o lukau lwalu muna nkembo a Mfumu yo songa e tima dieto dia sadisa ankaka. 20 Ke tuzolele ko vo muntu kasolola mbi mu yeto wau tulunga-lunganga lukau lwalu lwa mvevo.+ 21 Kadi oyeto ‘tulunga-lunganga mawonso muna unsongi, ke vana ndose a Yave* kaka ko, kansi vana ndose a wantu mpe.’+
22 Vana ntandu, tubatumini kumosi yo mpangi eto ona twafimpa nkumbu miayingi yo soloka vo nkwa fululu muna mambu mayingi, kansi owau una ye luzolo lwayingi, e kuma kadi vuvu kiayingi kekunubundanga. 23 Avo lukatikisu nuna lwau mu kuma kia Tito, yandi i nkwame, kumosi tusalanga muna wete dieno; avo lukatikisu nuna lwau mu kuma kia mpangi zeto, oyau i ntumwa za nkutakani ye nkembo a Kristu. 24 Dianu vo, nubasonga ziku kia zola kweno+ yo songa kwa nkutakani zawonso e kuma tukuyisaninanga mu kuma kieno.