Wanzole wa Paulu Kuna kwa Esi Korinto

5 Kadi tuzeye wo vo nzo eto ova nza, e saba kiaki, avo kibangwilu,*+ tukala ye nzo ituka kwa Nzambi, nzo a mvu ya mvu kuna zulu, ke yatungilwa muna moko ma wantu ko.+ 2 Kadi tubumanga mwamu nzo yayi,* wau tuna ye tima diayingi diavuata ina ya* zulu,+ 3 dianu vo, vava tuvuata yo, ke tuwanuka nkonga ko. 4 Ozevo, oyeto tuna mu saba kiaki tubumanga ye zitu, e kuma kadi ke tuzolele kio vula ko, kansi tuzolele vuata kiankaka,+ kimana kina kifwanga kiavingiswa eki kia moyo.+ 5 Ndiona watukubikila kio i Nzambi,+ yandi watuvana o mwanda se lusikidisu lwa mana mekwiza.*+

6 Dianu vo, wau tuna ye vuvu kiasikila yo zaya wo vo ekolo tuna muna nitu,* twavavuka yo Mfumu,+ 7 kadi oyeto mu lukwikilu tukangalelanga, ke mu mbona meso ko. 8 Kansi tuna ye vuvu kiasikila ye tuna yo luzolo lwavavuka e nitu kimana twakala kumosi yo Mfumu.+ 9 Kiakala vo tuna yandi kumosi, yovo twamvavuka, e kani dieto i tondakana kwa yandi. 10 Kadi yeto awonso tutelama* vana kunda kia lufundisu kia Kristu, kimana konso muntu kasendelwa mun’owu wa mavangu mandi ekolo kena muna nitu, makala mambote yovo mambi.+

11 Dianu vo, wau tuzeye o vumi wa Mfumu, tukwamanana kwikidisa wantu, kansi tutomene zayakana kwa Nzambi. Ngina ye vuvu vo tutomene zayakana mpe muna ntona zeno. 12 Ke tuzolele kuyisana diaka ko mu kuma kieno, kansi tunuwondelele nuayisana mu kuma kieto, kimana nualenda vana e mvutu kw’awana bekuyisaninanga kaka muna mpwa,+ ke muna ntima ko. 13 Kadi avo twazengomoka,+ i mu kuma kia Nzambi; avo tuna yo vimpi, i mu kuma kieno. 14 Kadi o zola kwa Kristu kukutufilanga, e kuma kadi edi tuzeye vo muntu mosi wafwa muna wete dia wantu awonso;+ kadi awonso bafwa. 15 Wafwila awonso kimana awana bena moyo, balembi kadila diaka o moyo muna yau kibeni,+ kansi muna ndiona wabafwila yo fulwa.

16 Dianu vo, tuka owau ke tuzeye diaka muntu ko mun’owu wa kinitu.+ Kana nkutu vo twakizayila Kristu mun’owu wa kinitu, ke tunzayidi diaka mu mpila yayi ko.+ 17 Ozevo, avo muntu kintwadi kena yo Kristu, i vangwa kiampa;+ e lekwa yankulu iviokele. Nutala! e lekwa yampa isemeno. 18 Kansi e lekwa yayi yawonso kwa Nzambi itukanga, ona wavutulwisa e ngwizani eto yo yandi kibeni muna Kristu+ yo kutuvana e salu kiavutulwisa e ngwizani,+ 19 i sia vo, muna Kristu, Nzambi wavutulwisa e ngwizani a nza ye yandi kibeni,+ ke badikanga diaka masumu mau ko,+ watuyekeka e nsangu za vutulwisa e ngwizani.+

20 Dianu vo, oyeto tu akunzi,*+ twavinga vana fulu kia Kristu,+ vika sia vo Nzambi yeto kesadilanga muna bokela o wantu. Wau vo twavinga vana fulu kia Kristu, tudodokele wantu vo: “Nuvutulwisa e ngwizani yo Nzambi.” 21 Ndiona walembi sumuka,+ o Nzambi wankitula se sumu* mu kuma kieto, kimana muna yandi oyeto twalungiswa vana ndose a Nzambi.+