Mavangu ma Zintumwa
28 Vava twavuluka, twabakula wo vo e sanga kiakina kiayikilwanga vo Melìta.+ 2 Nkangu una wavovanga nding’a kinzenza* batomene kutusonga e ngemba. Balungidi tiya, batutambwidi yeto awonso, e kuma kadi kiozi kiakala ko mu kuma kia mvula yanokanga. 3 Kansi, Paulu vava kakutikidi vanga kia nkuni yo sia kio vana tiya, muvaikidi mpidi mu kuma kia mbangazi, izingamene muna koko kwandi. 4 Esi sanga kiaki vava bamwene e mpidi izingamene muna koko kwandi, bavovanene vo: “Kieleka, o muntu ndioyo mvondi, kana una vo ovulukidi muna mbu, Unsongi* ke unyambwidi ko kazinga.” 5 Kansi, Paulu osansumwini e mpidi vana tiya, yandi kamoni diambu. 6 Vo i yau, edi babenze vo vimba kevimba yovo ofwa vana vau. Vava bavingidi kolo kiayingi yo mona vo kabwidilu diambu diambi ko, basobele e ngindu, banyikidi vo nzambi.
7 Vana ndambu a fulu kiakina vakala ye ntoto a mfumu a sanga, nkumbu andi Popeleo, ututambwidi kuna ngemba yo kutusonga e fulu kia leka mu lumbu tatu. 8 O se dia Popeleo olambalele vana mfulu, kadi ngianduka ye makulu keyela. Paulu okotele muna kakala, osambidi, unyambikidi o moko, unsaswidi.+ 9 Ediadi vava diavangama, ankaka mpe bakala ye mayela vana sanga bezidi kwa yandi, ubawukidi.+ 10 Batuzitisa mpe muna kutuvana tukau twayingi, vava twakota muna nzaza, batuvana lekwa ina tuvua o mfunu.
11 Vava kiavioka ngonde tatu, tubakidi e nzaza ya esi Alesanderia ina ye dimbu kia “Wan’a Zeuse.” E nzaza yayi vana sanga yaviokesela e nsungi a kiozi. 12 Tulweke kuna Surakusai, tunangini ko lumbu tatu; 13 tuka kwakuna twakwamanana nkangalu yo lwaka kuna Rengio. Muna lumbu kialanda e tembwa kia sude kiavemoka, e lumbu kina kiazole twalwaka kuna Putiole. 14 Twasolala ko ampangi, batuwondelela twananga yau lumbu nsambwadi, i ndwaka twalwaka kuna Roma. 15 Ampangi vava bawa e nsangu mu kuma kieto, bayiza kutukika vana Zandu dia Apiu ye Lombo Tatu.* Paulu vava kabamona, wavutula matondo kwa Nzambi yo kasakeswa.+ 16 Vava twakota muna Roma, Paulu oveno nswa wakala yandi mosi kaka ye kesa dimosi dianlangidilanga.
17 Vava kiavioka lumbu tatu, obokelese akuluntu a Ayuda. Vava balungane, ubavovese vo: “Ampangi, kanele vo kiavangidi diambu diambi ko kwa nkangu ngatu muna fu ya mase meto,+ ngiekwelo muna Yerusaleme vana moko ma esi Roma se mbakami.+ 18 Awaya, vava bamfimpidi,+ bakanini kungiambula, kadi ke basolola kuma ko kia kuntumbila tumbu kia lufwa.+ 19 Kansi, wau vo Ayuda ke batambulwila ko, diamfila mu lomba vo yafundiswa kwa Kaisa,+ ke sia ko vo diambu yakala diau muna funda e zula kiame. 20 Kiaki i kuma yalombele vo twamonana yo mokena, kadi muna kuma kia vuvu kia Isaele idianu nkangilu mu luvambu lwalu.”+ 21 Bamvovese vo: “Ke tutambwidi nkanda mitukidi kuna Yuda ko mu kuma kia mambu maku, ngatu ampangi batukidi kwakuna beza kutusamunuina nsangu yovo kuyikila diambu diambi. 22 Kansi tuzolele wá dina una diau, kadi tuzeye wo vo e dibundu diadi diampa+ mbi kaka divovelwanga mwawonso.”+
23 Bawizana lumbu bewanana yandi, i bosi ayingi bayiza kwa yandi muna nzo kalwakila. Tuka muna mene yakuna masika ubasasidi e diambu, otomene kubasila umbangi mu kuma kia Kintinu kia Nzambi yo kubakwikidisila muna mambu matadidi Yesu,+ tuka muna Nsiku a Mose+ ye muna Angunza.+ 24 Akaka bakwikidi mana kavovele; akaka ke bakwikidi ko. 25 Wau vo ke bawizana ko, bele kwau, ekolo bavaikidinge Paulu ovovele vo:
“O mwand’avelela watoma vovela muna Yesaya wa ngunza kwa mase meno, 26 oku vo: ‘Wenda kwa nkangu wau, vova vo: “Wá nuwa, kansi ke nubakula ko, tala nutala, kansi ke numona ko.+ 27 Kadi e ntima mia nkangu wau mivuidi bâla, bawidi muna matu mau, yau ke bavani mvutu, bavuidi zima meso mau yo kaka o matu mau kimana balembi mona muna meso yo wá muna matu ngatu bakula muna ntima miau, bavutuka kwa mono, omono yabawuka.”’+ 28 Dianu vo, yambula diazayakana kwa yeno vo o luvuluzu lwalu lwatuka kwa Nzambi lutwikilu kwa zula;+ oyau wa kikilu bewa lo.”+ 29 * ——
30 Mvu miole miamvimba kakala muna nzo andi ya mfutila+ yo tambula kuna ngemba awonso ana bayizanga kwa yandi, 31 ubasamunwini Kintinu kia Nzambi yo longa mambu matadidi Mfumu Yesu Kristu kuna unkabu wawonso,+ ke vakala muntu ko wansimanga.