Wantete wa Paulu Kuna kwa Esi Tesalonika
2 Ampangi, yeno kibeni nutomene wo zaya vo e nkingula ina twanukingula nluta yatwasa.+ 2 Kana una vo twateka mona e mpasi yo tiangunua kuna Filipi,+ wauna nuzeye, twakala yo unkabu muna lusadisu lwa Nzambi eto kimana twanusamunuina e nsangu zambote za Nzambi+ muna lubangamu lwayingi. 3 Kadi o lukasakeso tunuvene ke vilwa ko yovo usafu, ngatu luvunu, 4 kansi wauna Nzambi kamwena vo twafwana mu tambula kiyekwa kia samuna e nsangu zambote, i una tuvovelanga, ke mu yangidika wantu ko, kansi mu yangidika kaka Nzambi ona ofimpanga e ntima mieto.+
5 Kieleka, nuzeye wo vo ke tusidi sadila mvovo mia malengo ko muna kunuvuna, ngatu sadila umpuki muna vava tambula lekwa;+ Nzambi i mbangi! 6 Ke twavavanga nkembo kwa wantu ko, kana nkutu kwa yeno yovo kw’akaka, kadi zitu diampwena twadi kala kwa yeno wau vo tu ntumwa za Kristu.+ 7 Kansi, twakituka akwa ngemba kwa yeno, nze ngudi oyemekanga yo lunga-lunga wan’andi kuna zola kwawonso. 8 Wau vo twatoma kunuzola, ke twakala kaka ye kani dia kunusamunuina e nsangu zambote za Nzambi ko, kansi twayekola mpe mioyo mieto,+ kadi nuatoma zolakana kwa yeto.+
9 Kieleka, ampangi nusungamenanga e salu kieto ye mfuntuka eto. Muna lembi kala se zitu diampwena kwa yeno, twasalanga fuku yo mwini+ ekolo twanusamunuinanga e nsangu zambote za Nzambi. 10 Yeno nu mbangi yo Nzambi mpe, kadi nuamona una twakadila ye kwikizi, unsongi yo kondwa lusembo kwa yeno minkwikizi. 11 Nutomene wo zaya vo twanuwondelelanga, yo kunufiaulwisa yo longa konso muntu vovo nuina,+ nze una o se+ kevanganga kwa wan’andi, 12 kimana nuakangala e nkangala ifwene kuna kwa Nzambi+ ona okunubokelanga muna Kintinu kiandi+ yo nkembo andi.+
13 Ekiaki i kuma tuvutulwilanga mpe matondo kwa Nzambi ntangwa zawonso,+ kadi vava nuatambula e diambu dia Nzambi, dina nuawá kwa yeto, ke nuatambula dio nze diambu dia wantu ko, kansi wauna dina kieleka, diambu dia Nzambi kaka, dina disalanga mu yeno minkwikizi. 14 Kadi oyeno ampangi, nuakituka se atanginini a nkutakani za Nzambi muna Kristu Yesu zina muna Yuda, kadi numweswanga e mpasi kwa esi nsi eno,+ wauna oyau mpe bemweswanga e mpasi kwa Ayuda, 15 ana bavonda Mfumu Yesu+ ye angunza yo kutubangika.+ Ke beyangidikanga Nzambi ko, kadi ke bezolanga wete dia wantu awonso ko, 16 bevavanga kutusima twalembi vova kwa esi zula kimana bavuluzwa.+ Muna vanga wo, besakisanga masumu mau. Kansi kuna mfoko, makasi mandi mekubaluakila.+
17 Vo i yeto ampangi, vava twavambana yeno mu kolo kiakete, (muna kinitu, ke mu ntima mieto ko), twakala ye viangi kiayingi kia monana yeno diaka,* i dianu vo, twavanga mawonso muna vanga wo. 18 I kuma twazola kwizila kwa yeno, elo, mono Paulu, yavava kwiza ke nkumbu mosi kaka ko, kansi nkumbu miole; kansi Satana wakanga e nzila eto. 19 Akieyi i vuvu kieto yovo kiese yovo kolow’a lusanu vana ndose a Mfumu eto Yesu muna ngiz’andi? Nga ka yeno ko e?+ 20 Kieleka, oyeno i nkembo eto ye kiese kieto.