Yesaya
41 “Nukala e pi-i ova ntadisi ame, nuawá yeno sanga;
Yambula e zula yavua diaka o nkum’au.
Yambula bafinama; yambula bavova.+
Yambula twiza kumosi mu kuma kia mfundisa.
2 Nani wabundumuna muntu tuka kuna kuvaikilanga e ntangwa,*+
Yo kumbokela muna unsongi vana kena,*
Kayekola e zula vana moko mandi
Yo kumfila kayala atinu?+
Nani okubakitulanga se mbundukutu vana ntadisi a nsosolo andi,
Yo kubavevomona nze titi vana ntadisi a mfumb’andi?
3 Oyandi okubalakama, kondwa kwa nkakalakani
Muna nzila zina o malu mandi ke masidi diatila ko.
4 Nani ovangidi yo lungisa mambu mama,
Obokelesanga e mbandu tuka kuna lubantiku?
5 E sanga imwene mo, imwene o wonga.
E nsuka za nza ziyantikidi zakama.
Bakutakene vamosi, bezidi.
6 Konso muntu osadisi o nkwandi
Yo vovesa mpangi andi vo: “Kumama.”
7 Dianu vo, nkwa salu ya moko okasakese mvangi a lekwa ya sengwa;+
Ndiona olelekanga sengwa muna malutelo
Okasakese ndiona otutanga vana nzundu.
Ovovele mu kuma kia fulu kiayikakeselwa e sengwa vo: “Vambote.”
I bosi e teke kikomeno e nsonso, kialembi nikuka.
8 “Kansi ongeye, e Isaele, u selo kiame,+
Ongeye, e Yakobo, ona yasola,+
E mbongo a Abarayama wa nkundi ame,+
9 Ongeye, ona yatwasa tuka kuna nsuka za nza,+
Ongeye, ona yabokela tuka muna fulu yandá ya nza.
10 Kumoni wonga ko, kadi ngina yaku.+
Kutokani ko, kadi mono i Nzambi aku.+
Ikukumika, elo, ikusadisa,+
Itoma kusimbinina muna koko kwame kwalunene kwa unsongi.’
11 Tala! Awonso bekufungilanga o makasi befusulwiswa e nsoni yo vezwa.+
Awana bekunuanisanga bekitulwa se ma kiakondwa o mfunu ye befûkiswa.+
12 Ongeye ovava o wantu bekunuanisanga, kansi kukubasolola ko;
O wantu bekunuanisanga bekituka nze lekwa ke kina ko, nze ma kiakondwa o mfunu.+
13 Kadi omono Yave wa Nzambi aku, nsimbinini o koko kwaku kwalunene,
Mono i Ndiona okuvovesanga vo: ‘Kumoni wonga ko. Ikusadisa.’+
14 Kumoni wonga ko, e Yakobo wa mumvidi,*+
Yeno nkangu a Isaele, ikunusadisa,” u kavovele o Yave wa Nkûdi aku,+ wa Mvauki a Isaele.
15 “Tala! Ikitwidi se bundilwa kiameno,+
Bundilwa kiampa kia meno mole.
Ongeye odiatakesa e miongo yo kosomona mio
Yo kitula e kundubulu nga vevele.
16 Ongeye oveva e mbeni zaku,
E tembwa kikubavevomona;
E kimbongela kikubamwanganisa.
17 “O nkondami yo nsukami bavavidi o maza, kansi ke basolwele mo ko.
Lubini lwau luyumini mu kuma kia vuina.+
Mono Yave ikubasadisa.+
Mono Nzambi a Isaele, kikubabembola ko.+
18 Ikukulwisa e nkoko vana kundubulu yakondwa e titi+
Ye nto za maza muna nzanza.+
Ikitula makanga se yanga dia maza diazala ye mabu
Yo kitula e nsi yakondwa maza se nto za maza.+
19 Muna makanga ikuna mo nti a nsedele,
Nti a akasia, nti a militi yo nti a mazi,+
Muna nzanza ikuna mo nti a sipelese,
Kumosi yo nti a ase yo nti a sipre,+
20 Kimana wantu awonso bamona yo zaya
Yo sia sungididi yo bakula vo
Koko kwa Yave kuvangidi dio,
Mvauki a Isaele olunganese dio.”+
21 “Nusunzula mfundu eno,” u kavovele o Yave.
“Nusonga e ngindu zeno,” u kavovele o Ntinu a Yakobo.
22 “Nusonga e ziku yo kutuzayisa mambu mevangama.
Yovo nutusamunuina mambu mekwiza.+
23 Nutuzayisa mana mebwa muna lumbu ikwiza,
Kimana twazaya wo vo oyeno nu nzambi.+
Elo, nuvanga konso diambu, diambote yovo diambi,
Kimana twasivika vava tumona dio.+
24 Tala! Oyeno nu lekwa kiakondwa o mfunu,
E salu kieno ke kina mfunu ko.+
Wangemi konso ndiona okunusola.+
25 Mbundumwini muntu tuka kuna node, oyandi okwiza,+
Ona otuka kuna kuvaikilanga e ntangwa,*+ ona ovovela e nkumbu ame.
26 Nani wazayisa e diambu diadi tuka kuna lubantiku, kimana twazaya dio,
Yovo tuka muna ntangwa yavioka, kimana twavova vo: ‘Olungidi kwandi’?+
Kieleka, ke vena muntu ko wazayisa dio!
Ke vena muntu ko wasamuna dio!
Ke vena muntu ko wawá mambu meno!”+
27 Mono i muntu antete yavova kwa Zione vo: “Tala o mambu mevangama!”+
Itwika nati a nsangu zambote kwa Yerusaleme.+
28 Kansi nkwamanene tala, ke vakedi muntu ko;
Ke vakedi muntu ko vana kati kwau ovana e longi.
Nkwamanene kubayuvula, ke mosi ko oven’e mvutu.
29 Tala! Yau awonso luvunu kwandi.*
E salu yau yampavala.
E teke yau yasengwa* mupepe kwandi ye lekwa yakondwa o mfunu.+