Mavangu ma Zintumwa
10 Muna Kaisaria mwakala muntu mosi nkumbu andi Koneleo, mfidi a buka kia makesa* muna vu* kia Italia. 2 Wavuminanga Nzambi kumosi y’esi nzo andi awonso, wavananga tukau twayingi twa nkenda kwa wantu yo dodokela Nzambi ntangwa zawonso. 3 Muna tezo kia ola ina yavua,*+ omwene mbasi a Nzambi muna mona-meso, wizidi kwa yandi yo vova vo: “E Koneleo!” 4 Koneleo untadidi, omwene wonga, oyuvuidi vo: “Nkia diambu e Mfumu?” Umvutwidi vo: “E sambu yaku ye tukau ovananga kwa asukami tutombokele se luyindulu vana vena Nzambi.+ 5 Owau, tuma wantu kuna Yafo, babokela Simone oyikilwanga vo Petelo. 6 Muntu ndioyo muna nzo a Simone wa nkubiki a nkanda mia bulu kalwakidi, ina vana ndambu a kalunga.” 7 E mbasi ona wamokena yandi vava kakatukidi, Koneleo obokele selo yandi yole ye kesa dimosi diavuminanga Nzambi vana vena selo yandi, 8 ubasamunuini mawonso, ubatumini kuna Yafo.
9 Muna lumbu kialanda ekolo bakala muna nzila yo finama e mbanza, Petelo otombokele vana nludi a nzo kasamba, muna tezo kia ola ina yasambanu.* 10 Kansi omwene nzala, ozolele dia. Ekolo belambanga madia, omwene muna mona-meso,+ 11 e zulu diziukidi ye lekwa kikulumukanga ova ntoto nze nlele wampwena wa lino, wazitikwa muna nsuka zau yá; 12 muna kati mwakala ye mpila zawonso za bulu ya malu mayá ye lekwa iyatatanga ova ntoto ye nuni za zulu. 13 I bosi, owidi ndinga imvovese vo: “Telama e Petelo, vonda wadia!” 14 Kansi Petelo ovutwidi vo: “Kilendi ko e Mfumu, e kuma kadi kiadidi nkutu lekwa kiafunzuka ko ngatu lekwa kiasafuka.”+ 15 E ndinga imvovese mu nkumbu anzole vo: “Yambula yikila e lekwa ina Nzambi kavelelese vo yafunzuka.” 16 Ediadi nkumbu tatu diavangama, vana vau e lekwa kiokio kitombwelo kuna zulu.
17 Ekolo Petelo katokananga mu zaya e nsas’a mona-meso, vana vau o wantu ana batumwa kwa Koneleo batelamene vana vitu yo yuvula kana akweyi ina e nzo a Simone.+ 18 Babokele yo yuvula kana vo Simone ona oyikilwanga vo Petelo mwamuna kalwakidi. 19 Petelo wau kabadikanga e mona-meso, o mwanda+ umvovese vo: “Tala, wantu tatu bekuvavanga. 20 Telama, kulumuka, wenda yau, kukatikisa ko, e kuma kadi mono ibatumini.” 21 I bosi Petelo okulumukini vana vena wantu awaya, ovovele vo: “I mono oyu nuvavanga. Ekuma nuizidi?” 22 Bavovele vo: “E Koneleo+ wa mfidi a makesa, muntu ansongi ye mumpumina Nzambi, muntu ambote vana vena zula kiawonso kia Ayuda, watambwidi luludiku lwa Nzambi muna mbasi avelela mu kubokela, wenda kuna nzo andi, kawá mana ovova.” 23 Ubakotese muna nzo, ubasongele fulu kia leka.
Muna lumbu kialanda, otelamene, wele yau. Mpangi zankaka zatuka kuna Yafo bele yandi. 24 Muna lumbu kialanda okotele muna Kaisaria. Koneleo wabavingilanga, wakutakesa yitu yandi ye akundi. 25 Petelo vava kakotele, Koneleo wizidi kunkika, ovumbamene vana malu mandi yo kunsambila. 26 Kansi Petelo untelamese, ovovele vo: “Telama; mono mpe i mpasi muntu.”+ 27 Ekolo kemokenanga yandi, okotele muna nzo, omwene wantu ayingi bakutakene. 28 Ubavovese vo: “Oyeno nutomene wo zaya vo ke diansongi ko kwa Nyuda kakala e ntwadi yovo finama muntu a kanda diankaka,+ kansi o Nzambi unsongele vo kifwete yikila muntu ko vo wafunzuka yovo wasafuka.+ 29 Muna diadi ngizidi, kiafididi mpaka ko vava yabokelo. Dianu vo, nunzayisa, e kuma nuntumisini.”
30 Koneleo ovovele vo: “lumbu yá iviokele kala, vava yasambidinge muna nzo ame, mu ola yayi, i sia vo, ola yavua,* vana vau muntu wavuata mvuatu mikezimanga otelamene vana ndose ame 31 yo vova vo: ‘E Koneleo, e sambu yaku ye tukau ovananga kwa asukami tutombokele se luyindulu vana vena Nzambi. 32 Dianu vo, tuma wantu kuna Yafo, babokela Simone ona oyikilwanga vo Petelo. Muna nzo a Simone wa nkubiki a nkanda mia bulu kalwakidi, ina vana ndambu a kalunga.’+ 33 Vana vau itumisi, diambote wau wizidi. Owau yeto awonso vana ndose a Nzambi i twina mu wá mambu mawonso mana o Yave* kakanikini wavova.”
34 Muna diadi, Petelo oyantikidi vova vo: “Owau ntomene wo zaya vo Nzambi ke sianga mpambula ko,+ 35 kansi muna zula yawonso, ndiona okumvumina yo vanga mambu mansongi otondwa kwa yandi.+ 36 Watuma e diambu diandi kwa wan’a Isaele wau kabasamunuina e nsangu zambote za luvuvamu+ muna Yesu Kristu—ondioyo i Mfumu a wantu awonso.+ 37 Oyeno nuzeye e diambu diamokenuanga muna Yuda yawonso, tuka muna Ngalili,+ vava kiavioka luvubu luna Yoane kasamunanga: 38 mu kuma kia Yesu wa musi Nazarete, una Nzambi kankusila o mazi muna mwand’avelela+ yo nkuma, wazietanga muna nsi yawonso mu vanga mawete yo wuka awonso babangikwanga kwa Nkadi ampemba,+ kadi Nzambi wakala yandi.+ 39 Tu mbangi za mambu mawonso kavanga muna Yuda ye muna Yerusaleme; kansi bamvonda muna kumanika vana nti. 40 Nzambi wafula muntu ndioyo muna lumbu kiatatu+ yo yambula vo kamoneka, 41 ke kwa awonso ko, kansi kwa mbangi ana bateka solwa kwa Nzambi, kwa yeto, ana twadia yo nua yandi vava kafulwa muna mafwa.+ 42 Watukanikina mpe vo twasamuna kwa wantu yo sia umbangi una ufwene+ vo yandi wasolwa kwa Nzambi kimana kakala mfundisi awana bena o moyo ye awana bafwa.+ 43 Muna yandi, e ngunza zawonso za silanga umbangi+ vo konso ona okwikila muna yandi otambula luloloko lwa masumu muna nkumbu andi.”+
44 Ekolo Petelo kavovelenge mambu mama, awonso bawidinge e diambu dia Nzambi batambwidi mwand’avelela.+ 45 Minkwikizi miazengwa, ana bayiza kumosi yo Petelo basivikidi kikilu, kadi o lukau lwangovo lwa mwand’avelela lwavewa mpe kwa wantu a zula. 46 Kadi babawidi bevovanga muna ndinga za kinzenza yo kembelela Nzambi.+ I bosi Petelo ovovele vo: 47 “Wantu awaya batambwidi o mwand’avelela nze yeto, nga vena yo muntu olenda kubakakidila maza, balembi vubwa?”+ 48 Muna diadi, okanikini vo bavubilwa muna nkumbu a Yesu Kristu.+ I bosi, bandodokele vo kakala yau mu lumbu yakete.