Wantete wa Samuele

17 Afelesetia+ bakutakese makesa* mau benda nuana vita. Bakutakane kuna Soko+ dia Yuda, basikidisi e ndo vana kati kwa Soko ye Azeka,+ muna Efese-damime.+ 2 Saulu yo nkangu a Isaele bakutakane yo sikidisa ndo kuna Ndimb’a Ela,+ bakiatamene muna nuanisa Afelesetia. 3 Afelesetia bakiatamene vana mongo kuna diaka sambu, Aneyisaele bakiatamene vana mongo kuna sambu diankaka, ndimba wakala vana kati kwau.

4 Muna ndo ya Afelesetia muvaikidi kesa dimosi; nkumbu andi Ngoleyate,+ wa musi Ngati,+ ntel’andi yinkoso sambanu yo lutama lumosi.* 5 Wakala ye mpu a nsongo vana ntu, ovuete kinkutu kia sengwa* kia mabala ma nsongo. E zitu dia kinkutu kiandi,+ 5.000 ma sekele* za nsongo. 6 Wakala ye nkaku mia nsongo muna malu ye dionga+ dia nsongo kuna nima. 7 O mvini a dionga diandi wakala nze nti mia akubi a nlele,+ e zitu dia ntu wa dionga diandi, 600 za sekele;* nati a ngubu andi ovitidi kuna ntwal’andi. 8 Ngoleyate otelamene, okazidi kwa makesa ma Isaele,+ oku vo: “Ekuma nuizidi kiatamena mu nuana e vita e? Mono i Mfelesetia, oyeno ke nu selo ya Saulu ko e? Nusola muntu kakulumuka vava ngina. 9 Avo olendele nuana yame yo kumponda, tukituka selo yeno. Kansi, avo insundidi yo kumvonda, yeno nukituka selo yeto, nuatusadila.” 10 Mfelesetia ovovele vo: “O unu mfidisi makesa ma Isaele e mpaka.+ Numpana muntu kanuana yame!”

11 Saulu yo makesa mawonso ma Isaele una bawidi mvovo mia Mfelesetia, bazakamene ye wonga.

12 Davidi i mwan’a Yisai wa musi Eferate+ a Beteleme+ ya Yuda, Yisai+ wana nana kakala yau,+ nunu kakala muna lumbu ya Saulu. 13 O wana tatu a Yisai ana bakala vo ambuta, bayenda yo Saulu kuna vita.+ E nkumbu za wan’andi tatu ana bayenda kuna vita i zau zazi, wantete Eliabe,+ wanzole Abinadabi,+ wantatu Sama.+ 14 Davidi i mwan’a nsuka;+ mbuta zandi yau atatu bayenda kumosi ye Saulu.

15 Davidi wayendanga kwa Saulu yo vutuka muna vungula mameme+ ma se diandi kuna Beteleme. 16 Muna kolo kiakina, Mfelesetia wayizanga yo telama mu mene-mene yo masika, lumbu 40 kavanga wo.

17 Yisai ovovese mwan’andi Davidi vo: “Bonga efa* kiaki kia masa mayokwa ye mbolo zazi kumi, nata zo mu nzaki kuna ndo kwa mpangi zaku. 18 E kunku kumi yayi ya kezio* natina yo mfumu a 1.000 dia makesa; tala mpe una bena mpangi zaku, untwasila e nsangu.” 19 Saulu ye mpangi za Davidi yo makesa mawonso ma Isaele bakala vana Ndimb’a Ela,+ banuananga ye Afelesetia.+

20 Davidi otelamene muna mene-mene, osisidi muntu kavungulanga mameme; okubikidi madia, wele nze una kakanikinua kwa Yisai. Vava kalwaka muna ndo, makesa mavaikanga benda kuna vita yo kaza kazu kia vita. 21 Isaele ye Afelesetia bakiatamene mantalani muna vita. 22 Vana vau Davidi osisidi lekwa vana moko ma nlundi, wele ntinu kuna kwakiatamena makesa. Vava kalweke, oyuvuidi mavimpi kwa mpangi zandi.+

23 Ekolo kamokenanga yau, vavaikidi kesa dimosi muna makesa ma Afelesetia, nkumbu andi Ngoleyate+ wa musi Ngati, ovovele diaka mambu mana kateka vova,+ Davidi owidi mo. 24 Wan’amakala a Isaele awonso vava bamona Ngoleyate, babakamene wonga yo tina.+ 25 Makesa ma Isaele bavovele vo: “Numwene muntu ndioyu okwizanga? Wizidi tianguna Isaele.+ Ndiona okumvonda, o ntinu vuamisa kekumvuamisa yo kumvana mwan’andi ankento,+ ovevola e nzo a se diandi muna mpaku ye salu muna Isaele.”

26 Davidi uyuvuidi kwa ana batelamene vana ndambu andi vo: “Aweyi kevangwa muntu ovonda Mfelesetia ndioyo yo katula luvezo muna Isaele? Nani i Mfelesetia ndioyu walembi zengwa, katonta makesa ma Nzambi amoyo?”+ 27 I bosi, nkangu umvovese mana bateka kumvovesa: “I wau wuwu kevangwa ndiona okumvonda.” 28 Eliabe+ wa mpangi andi ambuta unwidi ekolo kemokenanga yo wantu, ofungidi Davidi makasi, ovovele vo: “Ekuma okulumukini kwaku? Kwa nani osisidi mameme mandwelo muna makanga?+ Nzeye lulendo lwaku ye makani mambi ma ntim’aku; okulumukini watala e vita.” 29 Davidi ovutwidi vo: “Nkia diambu mpangidi owau? Diambu dimosi kaka ngiuvuidi!” 30 Davidi ovilukidi kwa muntu ankaka, oyuvuidi diaka diau dimosi,+ nkangu bamvene mvutu zina bateka kumvana.+

31 Akaka bawidi mambu Davidi kavova, bazayisi mo kwa Saulu. Saulu umbokelese. 32 Davidi ovovese Saulu vo: “Ke muntu ko ofwete yoya mu kuma kia Mfelesetia+ ndioyo. Ntaudi aku okwenda nuana yandi.” 33 Kansi, Saulu ovovese Davidi vo: “Kulendi nuanisa Mfelesetia ndioyo ko kadi u nleke kwaku,+ yandi kesa tuka muna kileke kiandi.” 34 Davidi ovovese Saulu vo: “Selo kiaku vava kakala mvungudi a mameme ma se diandi, lumbu kimosi vezidi nkosi,+ ibongele mwan’ameme muna kambi. E lumbu kiankaka vezidi use, ivangidi diau dimosi. 35 Ibalende yo kubabaka, nkutumwini e meme muna nu’andi. Vava kampilukila, imbakidi muna nsingu,* inwende yo kumvonda. 36 Ntaudi aku wavonda nkosi yo use, o Mfelesetia ndioyo walembi zengwa okala nze yau, kadi otiangwini* makesa ma Nzambi amoyo.”+ 37 Davidi ovovele diaka vo: “O Yave ona wampuluza muna kole kia nkosi ye kia use, okumpuluza vana moko ma Mfelesetia ndioyo.”+ Saulu ovovese Davidi vo: “Wenda, yambula Yave kakala yaku.”

38 Saulu ovuikidi Davidi e mvuatu miandi. Umvuikidi mpu andi a nsongo vana ntu ye kinkutu kiandi kia sengwa.* 39 Davidi ovuete nsosolo, otezele diata, kansi kalendele ko, kadi kayukwa vuata lekwa yayi ko. Davidi ovovese Saulu vo: “Kilenda kwenda ye lekwa yayi ko, kadi kisidi yo vuata ko.” Ozevo, Davidi okatwidi yo. 40 Obongele nkau andi, osolele matadi matanu malengomoka muna nkoko, osidi mo muna nkutu andi a kimvungudi, osidi nsinga watubila matadi+ vana moko, ofinamene Mfelesetia.

41 O Mfelesetia mpe ofinamene Davidi, o nati a ngubu andi okedi kuna ntwala. 42 O Mfelesetia vava kasengwele meso yo mona Davidi, umvezele kadi nleke kakala, wabwaka, wambote-mbote.+ 43 Mfelesetia ovovese Davidi vo: “Nga i mbwa+ wau okwizanga kwa mono yo nkau e? Muna diadi Mfelesetia osibidi Davidi muna nzambi zandi. 44 Mfelesetia ovovese Davidi vo: “Wiza vava ngina, yavana nitu aku kwa nuni za zulu ye kwa mbizi za mfuta.”

45 Davidi ovutwidi Mfelesetia vo: “Ongeye wizidi kwa mono yo nsosolo ye dionga+ ye swanga, kansi omono ngizidi kwa ngeye muna nkumbu a Yave a vu,+ wa Nzambi a makesa ma Isaele ona ofidisi e mpaka.+ 46 O unu kiaki Yave okuyekola vana moko mame,+ ikuvonda yo kuzenga o ntu; o unu kiaki ivana mavimbu ma makesa ma Afelesetia kwa nuni za zulu ye bulu ya mfuta; wantu a nza yawonso bezaya wo vo vena yo Nzambi muna Isaele.+ 47 Awonso bakutakene vava* bezaya wo vo, Yave ke vuluzilanga+ muna nsosolo ko yovo muna dionga ngatu muna maswanga, kadi e vita ya Yave,+ oyekola yeno awonso vana moko meto.”+

48 Ozevo, Mfelesetia otelamene yo finama kanuana yo Davidi, o Davidi wele ntinu vana fulu kina banuaninanga kimana kanuanisa Mfelesetia. 49 Davidi okobwele koko muna nkutu andi, obongele mo tadi, osidi dio muna nsing’andi watubila matadi yo tuba dio. E tadi ditelele vana nkut’a lose lwa Mfelesetia, tadi dikotele vana nkut’a lose lwandi, obwidi mambukama vana ntoto.+ 50 Muna nsing’andi ye tadi, Davidi osundidi Mfelesetia; obwisidi Mfelesetia yo kumvonda, kana una vo Davidi kakala yo nsosolo ko vana koko.+ 51 Davidi wele ntinu, otelamene vana ntandu a Mfelesetia. Ovolele nsosolo wakala muna luketo lwa Mfelesetia,+ umvondele yo kunzenga o ntu. Afelesetia vava bamwene vo e kesa diau ofwidi, bayantikidi tina.+

52 Dianu vo, makesa ma Isaele ye ma Yuda batelamene, bayantikidi kaza. Balakamene Afelesetia tuka kuna ndimba+ yakuna mavitu ma Ekerone,+ mavimbu ma Afelesetia mamwangane muna nzil’a Saraimi,+ Ngati yakuna Ekerone. 53 Vava Aneyisaele bavutukidi muna lakama Afelesetia, basanzidi e ndo zau.

54 Davidi obongele ntu a Mfelesetia onete wo kuna Yerusaleme, kansi e nuaninua ya Mfelesetia osidi yo muna saba kiandi.+

55 Saulu vava kamwene vo Davidi wele nuanisa Mfelesetia, oyuvuidi Abene+ wa mfidi a makesa mandi vo: “Abene, e toko+ diadi mwana nani?” Abene ovutwidi vo: “Muna nkal’aku kaka e ntinu, kizeye kwame ko!” 56 Ntinu ovovele vo: “Vava zaya kana toko diadi mwan’a nani.” 57 Davidi vava kavonda Mfelesetia+ yo vutuka, Abene umbakidi yo kuntwasa kwa Saulu yo ntu a Mfelesetia vana moko mandi. 58 Saulu unyuvuidi vo: “E toko, u mwan’a nani?” Davidi ovutwidi vo: “I mwan’a ntaudi aku Yisai+ wa musi Beteleme.”+