Mavangu ma Zintumwa
8 O Saulu watambulwila mpe vo Setefano kavondwa.+
Muna lumbu kiakina mubundumukini lubangamu lwangolo muna nkutakani yakala muna Yerusaleme; katula kaka antumwa, yau awonso bamwanganeswa muna zunga ya Yuda ye Samaria.+ 2 Kansi, wantu ana bavuminanga Nzambi babongele Setefano kimana banzika, bandididi e dilu kiayingi. 3 Saulu oyantikidi fukisa nkutakani. Wele muna nzo ye nzo, obakidi akala ye akento, ubayekwele muna pelezo.+
4 Kansi, ana bamwanganeswa muna nsi, bele samuning’e nsangu zambote za diambu dia Nzambi.+ 5 Filipo okulumukini kuna mbanz’a Samaria,+ oyantikidi kubasamunuina oma ma Kristu. 6 E ndonga yatoma sia sungididi kumosi mana Filipo kavovanga ekolo bawanga yo mona e sinsu ina kavanganga. 7 E kuma kadi, ayingi bakala ye mianda mia usafu, miabokanga mu nding’a ngolo yo vaika.+ Akwa mavola ayingi ye mbevo za malu mpe, bawukwa. 8 Kiese kiayingi kiakala muna mbanza yayina.
9 Muna mbanza mwakala muntu mosi, nkumbu andi Simone, ona wateka kala ngang’a mpandu yo sivikisa e zula kia Samaria, wakiyikilanga vo wanene. 10 Yau awonso, tuka muna nleke yamuna mbuta bansiang’e sungididi yo vova vo: “O muntu ndioyu i Nkum’a Nzambi, owu uyikilwanga vo Wanene.” 11 Batoma kunsianga e sungididi, kadi se kolo kiayingi kabasivikisanga muna mpandu zandi. 12 Kansi, vava bakwikila Filipo ona wasamunanga e nsangu zambote za Kintinu kia Nzambi+ ye nkumbu a Yesu Kristu, akala ye akento bavubwa.+ 13 Simone mpe okwikidi, una kavubilu okedi kaka yo Filipo;+ watoma sivika wau kamona sinsu ye mavangu mankuma mavangamanga.
14 Antumwa kuna Yerusaleme vava bawidi vo esi Samaria batambulwidi diambu dia Nzambi,+ babatumìni Petelo yo Yoane; 15 awaya bakulumukini yo samba kimana batambula o mwand’avelela.+ 16 Kadi ke mosi ko muna yau wateka tambula mwand’avelela, kansi muna nkumbu a Mfumu Yesu kaka bavubilwa.+ 17 Babatensekele moko,+ bayantikidi tambula mwand’avelela.
18 O Simone vava kamwene vo mwanda uvewanga muna ntensekwa moko ma antumwa, ubavene nzimbu, 19 ovovele vo: “Numpana mpe e wisa kiaki, kimana konso muntu ona itenseka moko katambula mwand’avelela.” 20 Kansi, Petelo umvovese vo: “Yambula wafwa ye palata aku, kadi edi obenze vo olenda tambula lukau lwangovo lwa Nzambi muna nzimbu.+ 21 Kuna ye kunku ko muna diambu diadi, kadi o ntim’aku ke wasikila ko vana meso ma Nzambi. 22 I kuma vo, viluk’o ntima muna bi waku yo dodokela Yave,* avo dilendakana kaloloka makani mambi ma ntim’aku; 23 kadi mbwene vo u ndudi ya mpondi,* u ntaudi a vilwa.” 24 Simone ubavutwidi vo: “Nudodokela Yave* mu kuma kiame kimana mawonso nuvovele malembi kumbwila.”
25 Vava batomene sila umbangi yo samuna e diambu dia Yave,* bavutukidi kuna Yerusaleme, bele samuning’e nsangu zambote muna mavata mayingi ma esi Samaria.+
26 Kansi, mbasi a Yave*+ ovovele kwa Filipo, oku vo: “Telama, wenda kuna sude muna nzila yatuka kuna Yerusaleme yakuna Ngaza.” (E nzila yayi ya makanga.) 27 Muna diadi otelamene, wele, owananene yo nzimba mosi wa Ntiopia, nkwa wisa muna lûmbu lwa Kandaki wa ntinu ankento a Etiopia, yandi walunga-lunganga lusalu lwandi lwawonso. Otukidi kuna Yerusaleme mu sambila Nzambi,+ 28 wau kavutukanga muna kalu diandi, watanganga mu nding’angolo o nkand’a Yesaya wa ngunza. 29 O mwanda uvovese Filipo vo: “Wenda finama e kalu diodio.” 30 Filipo wele ntinu, ofinamene vana ndambu, unwidi ekolo ketanganga mu nding’angolo nkand’a Yesaya wa ngunza, unyuvuidi vo: “Nga obakwidi mana otanganga?” 31 Ovutwidi vo: “Aweyi ndenda mo bakulwila, avo ke vena muntu ko olenda mo kunsasila?” Ododokele Filipo kamanta muna kalu, kavuanda yandi. 32 E Sono kina katangidinge i kiaki: “Nze meme wanatwa kuna vondelo, nze mwan’a meme obutamene vana ntadisi a asaki a mika, kaziula nu’andi ko.+ 33 Ekolo kavezwanga, e ndungidi yakatulwa kwa yandi.+ Nani ozingula mambu ma mbandu andi? Kadi o moyo andi ukatwilu ova ntoto.”+
34 O nzimba ovovese Filipo vo: “Idodokele, unzayisa, o ngunza nani keyikanga muna mvovo miami? Yandi kibeni yovo muntu ankaka?” 35 Filipo oyantikidi vova, tuka muna sono kiaki, unsamunuini nsangu zambote mu kuma kia Yesu. 36 Ekolo bayendanga muna nzila, balweke vana fulu kiakala maza, o nzimba ovovele vo: “Tala! O maza i mama; adieyi dinsimbidi muna vubwa?” 37 * —— 38 Muna diadi olombele vo e kalu dianingama, Filipo ye nzimba bakulumukini muna maza, umvubidi. 39 Vava bavaikidi muna maza, o mwand’a Yave* unete Filipo mu nzaki, o nzimba kamwene diaka ko, wele muna nzil’andi ye kiese. 40 Kansi, Filipo wele kuna Asedode, okwamanene samuna e nsangu zambote muna mbanza zawonso yavana kalweke kuna Kaisaria.+