Wantete wa Paulu Kuna kwa Timoteo
3 E diambu diadi diaziku: Avo muntu kinkengi kevavanga,+ salu kiambote kazolele. 2 O nkengi kafwete kala ye lusembo ko, yakala dia nkento mosi, nkwa volo muna mambu mawonso, nlungaladi,*+ ke nkwa mvualangani ko, nzodi a nzenza,+ ozeye longa,+ 3 ke nduvu a malavu ko,+ ke nuani ko, kansi nlembami,+ ke nkwa ntantani ko,+ ke munzodi a nzimbu ko,+ 4 otoma ludikanga esi nzo andi, una yo wana besonganga lusakalalu yo luzitu+ 5 (kadi avo muntu kazeye ludika esi nzo andi ko, aweyi kelunga-lungila e nkutakani a Nzambi?), 6 ke munkwikizi ampa ko,+ kimana kalembi kuyitundidika yo bwa muna tumbu kiazengelwa Nkadi ampemba. 7 Vana ntandu, kafwete silwa mpe kimbangi kiambote* kw’awana bena kuna mbazi,+ kimana kakondwa lusembo* yo lembi bwa muna ntambu wa Nkadi ampemba.
8 Diau dimosi mpe ye selo ya salu, bafwete kala akwa zitu, ke akwa mpova zole ko,* ke mindue mia vinyu ayingi ko, ke akwa loko dia vava nluta mu mpila yambi ko,+ 9 betatidilanga e mbumb’avauka ya lukwikilu* ye ntona zavelela.+
10 Wantu awaya bafwete teka fimpwa kana vo bafwana; i bosi besala se selo avo bakondelo lusembo.+
11 Akento mpe diau dimosi, bafwete kala akwa zitu, ke akumbi ko,+ akwa volo muna fu yau, akwa kwikizi muna mambu mawonso.+
12 Selo kia salu kafwete kala yakala dia nkento mosi, otoma ludikanga wan’andi ye nzo andi. 13 Kadi akala ana betoma salanga, nkumbu ambote bekuyivangilanga yo vua unkabu wayingi wa vovela mambu ma lukwikilu lwau muna Kristu Yesu.
14 Isonekene mambu mama, kana una vo ngina ye vuvu kia kwiza monana yaku, ke kolo ko, 15 kimana avo nzingidi, wazaya una ofwete kadila muna nzo a Nzambi,+ ina vo i nkutakani a Nzambi amoyo, lunzi ye nkubilw’a ludi. 16 Kieleka, e mbumb’avauka a vumi wa Nzambi yanene kikilu: ‘Yesu wamoneka muna nitu,+ walungisilwa muna mwanda,+ wamoneka kwa mbasi,+ wasamunua vana vena zula,+ wakwikilwa mu nza,+ watambulwa muna nkembo.’