Wantete wa Paulu Kuna kwa Timoteo
1 Paulu, wa ntumw’a Kristu Yesu muna lutumu lwa Nzambi wa Mvuluzi eto yo Kristu Yesu wa vuvu kieto,+ 2 kuna kwa Timoteo*+ wa mwan’ame kikilu+ muna lukwikilu:
Yambula wakala ye nsambu ye nkenda, ye luvuvamu lutukanga kwa Nzambi wa Se yo Kristu Yesu wa Mfumu eto.
3 Wauna yakasakesela vo wakala kaka muna Efeso ekolo yayenda kuna Makedonia, i diau ivanganga wau, kimana wakanikina akaka balembi longa mambu mankaka, 4 ngatu sia e sungididi muna tusansu twaluvunu+ ye tuvila. Mambu mama ke mena nkutu mfunu ko,+ mabanzikila kaka metwasanga, vana fulu kiatwasa konso diambu dia Nzambi dilenda kumika lukwikilu. 5 Kieleka, e kani dia luludiku lwalu* i zola+ kuna kutukanga muna ntim’avelela ye muna ntona zambote yo lukwikilu+ lwakondwa kivunina. 6 Wau babebola mambu mama, ankaka bakivana muna moko yakondwa mfunu.+ 7 Bezolanga kala alongi a nsiku,+ kansi ke bebakulanga mana bevovanga ko, ngatu mana besiandamenanga.
8 Tuzeye wo vo Nsiku wambote avo muntu osadilanga wo una ufwene,* 9 yo zaya vo o nsiku ke wasiwa mu kuma kia muntu ansongi ko, kansi mu kuma kia yimpumbulu,+ akolami, mindembi vumina Nzambi ye asumuki, minkondwa kwikizi* ye akwa lutiangu, avondi a mase ye ngudi ye wantu ankaka, 10 minta-zumba,* akala belekananga ye akwau akala, ayiyi a wantu, akwa luvunu, awana bedianga ndofi zaluvunu ye mawonso ke mena ngwizani ko ye longi diavimpi*+ 11 mun’owu wa nkembo a nsangu zambote za Nzambi a kiese, zina yayekekwa.+
12 Ntondele Kristu Yesu wa Mfumu eto, ona wankumika, kadi wambadikila vo i nkwa kwikizi wau kangiekeka uselo,+ 13 kana una vo ntianguni a Nzambi yakala ye mbangiki ye nkwa nsoki.+ Kansi yafwilwa e nkenda kadi ku bubu* yavangilanga wo yo kondwa lukwikilu. 14 E nsambu za Mfumu eto zawokela kikilu kwa mono kumosi yo lukwikilu yo zola kuna muna Kristu Yesu. 15 E diambu diadi dia kieleka ye difwene tambulwilwa emvimba: Kristu Yesu wayiza va nza mu vuluza asumuki.+ Vana vena asumuki awaya, omono nsundidi.+ 16 Kansi, yafwilwa e nkenda kimana muna mono nsundidi osumuka, Kristu Yesu kasonga luzindalalu lwandi lwawonso yo kunkitula se mbandu kw’awana bekwikila muna yandi muna vua moyo a mvu ya mvu.+
17 Kuna kwa Ntinu a mvu ya mvu,+ ona ozinganga yakwele mvu+ yo lembi moneka,+ wa Nzambi mosi kaka,+ kwa yandi zitu yo nkembo yamu mvu ya mvu. Amen.
18 E mwan’ame Timoteo, ivene luludiku lwalu* mun’owu wa ungunza una wasakulwa mu kuma kiaku, una onuaninanga ndwan’ambote,+ 19 watatidila lukwikilu ye ntona zambote,+ zina ankaka babembola, yo kubafila mu vidisa lukwikilu lwau nze nzaza idimukini. 20 Imenai+ yo Alesandero bena vana vena wantu awaya, dianu yabayekolwela kwa Satana+ kimana balongoka vo ke bafwete tianguna Nzambi ko.