Wantete wa Tusansu
28 Davidi okutakese akuluntu awonso a Isaele kuna Yerusaleme: akuluntu a makanda, ntu mia buka, afidi a buka+ ana basadilanga ntinu, mfumu za mafunda, mfumu za nkama,+ akuluntu a mavua mawonso ye twelezi ya ntinu+ yo wan’andi,+ mbanda-mbanda zandi ye makesa mawonso ye mabamba-ngolo.+ 2 Davidi wa Ntinu otelamene, ovovele vo:
“Nungwa, e mpangi zame yo nkangu ame. Diakala muna ntim’ame edi dia tungila nkel’a kangu dia Yave e nzo ya vundila, yakala se sikinua kia tambi ya Nzambi eto,+ yakubika mawonso muna tunga e nzo.+ 3 Kansi, Nzambi aludi umpovese vo: ‘Ka ngeye ko otungila nkumbu ame e nzo,+ kadi u nuani a mvita, menga wabungula.’+ 4 Kansi, Yave wa Nzambi a Isaele wansola muna nzo yawonso ya se diame yakala se ntinu a Isaele yakwele mvu,+ kadi wasola Yuda se ntu,+ muna nzo a Yuda osolele nzo a se diame,+ muna wan’a se diame, mono kasonga e dienga yo kuntumbika se ntinu a Isaele yawonso.+ 5 Muna wan’ame awonso—kadi Yave wan’ayingi kampene+—osolele Solomo+ wa mwan’ame kimana kavuanda vana kunda kia kimfumu kia Yave muna Isaele.+
6 “Umpovese vo, ‘Mwan’aku Solomo yandi otunga e nzo ame ye yanzala yame, kadi yandi nsolele kakala mwan’ame, mono yakala se diandi.+ 7 Sikidisa isikidisa kimfumu kiandi yakwele mvu,+ avo okwamanana lunda nkanikinu miame ye nzengo zame+ wauna kevanganga owau.’ 8 I dianu mpovele vana meso ma Isaele yawonso, e nkutakani a Yave ye muna matu ma Nzambi eto: Nutoma lunda yo tomba nkanikinu miawonso mia Yave wa Nzambi eno, nuavua e nsi yambote+ yo sisila yo kwa wan’eno se vua diau yakwele mvu.
9 “Vo i ngeye Solomo wa mwan’ame, zaya Nzambi a se diaku, unsadila yo ntim’asikila ye luyangalalu* lwa ntima,+ kadi Yave ofimpanga ntima+ miawonso yo bakula ngindu ye makani mawonso.+ Avo umvavidi, oyambula vo wansolola,+ kansi avo unyambwidi, okubembola yakwele mvu.+ 10 Zaya wo vo Yave ngeye kasolele watunga e nzo avauka. Kala yo unkabu, yantika e salu.”
11 Davidi ovene kwa mwan’andi Solomo e mbandu a mwelo+ a tempelo+ ye mbandu za nzo zandi, malundilu mandi, masuku ma ntandu ye masuku makati ye nzo ina yakalanga e fukwa kia vutulwisila e ngwizani.*+ 12 Umvene mbandu a lekwa yawonso kasongwa muna mwanda, mbandu a yanzala+ yawonso ya nzo a Yave, masuku mawonso madila makala muna nzunguluka, malundilu ma nzo a Nzambi aludi ye malundilu ma lekwa yavauka;*+ 13 umvene mpe luludiku mu kuma kia buka+ ya nganga ye Anelevi ye salu yawonso ya nzo a Yave ye salanganu yawonso ya salu kia nzo a Yave; 14 osikidisi e zitu dia wolo, wolo wa salanganu ya mpila zawonso za salu, zitu dia salanganu yawonso ya palata ye salanganu ya mpila zawonso za salu; 15 osikidisi mpe e zitu dia wolo wa zangikilwa ya minda,+ minda miandi mia wolo, zitu dia zangikilwa ya minda yaswaswana ye minda miandi ye zitu dia palata ya zangikilwa ya minda, konso zangikilwa kia minda ye minda miandi mun’owu wa salu kisadilwa; 16 zitu dia wolo wa meza ma mbolo za lubakanisu,*+ muna konso meza, zitu dia palata muna meza ma palata, 17 zitu dia nsoma, pidi, mvungu mia wolo walembi sangwa lekwa, zitu dia pidi yakete, konso pidi yakete ya wolo,+ zitu dia pidi yakete ya palata, muna konso pidi kiakete. 18 Osikidisi mpe zitu dia wolo wakenzwa watungila e ziku+ dia ndumbu ye fwaniswa kia kalu,+ i sia vo, akelubi+ a wolo ye mave mau mayalumuka vana Nkel’a kangu dia Yave. 19 Davidi ovovele vo: “O koko kwa Yave kwakala yame, wampana ngangu za soneka mawonso ma mbandu+ itungilwa e nzo.”+
20 Davidi ovovese mwan’andi Solomo vo: “Kala yo unkabu, kumama, wayantika e salu. Kumoni wonga ko ngatu vumiswa, kadi Yave wa Nzambi, wa Nzambi ame una yaku.+ Ke kuyambula ko ngatu kusisa,+ okala yaku yavana kifokoka e salu kia nzo a Yave. 21 Tala, vena ye buka ya nganga+ ye Anelevi+ muna sala e salu kiawonso kia nzo a Nzambi aludi. Una ye asadi akwa ntim’a mvevo, ana bena ye ngangu za salu ya mpila mu mpila,+ akuluntu+ ye nkangu wawonso ana belemvokela luludiku lwaku lwawonso.”