Wanzole wa Ntinu

17 Muna mvu wa 12 wa luyalu lwa Akazi wa Ntinu a Yuda, Oseya+ wa mwan’a Ela oyantikidi yala Isaele muna Samaria; mvu vua kayala. 2 Wavanga mambu mambi vana meso ma Yave, kansi ke mu tezo kia ntinu mia Isaele ko mina mimvitidi. 3 Samanese wa ntinu a Asuri wizidi kunuanisa, Oseya okitukidi se ntaudi andi,+ oyantikidi futa e vaku.+ 4 Kansi, o ntinu a Asuri owidi wo vo Oseya umvuandidi mfulu, kadi watuma wantu kwa So wa Ntinu a Engipito+ yo lembi futa diaka e vaku kwa ntinu a Asuri wauna kateka vanga. Muna kuma kiaki, ntinu a Asuri unkangidi yo kunsia muna pelezo.

5 O ntinu a Asuri onuanisi nsi yawonso, olweke muna Samaria ozungidi yo mu mvu ntatu. 6 Muna mvu wa vua wa luyalu lwa Oseya, ntinu a Asuri obakidi Samaria.+ Onete nkangu a Isaele kuna Asuri,+ ubasidi muna Kalaki ye Kabo vana nkoko a Ngozane+ ye muna mbanza za esi Madai.+

7 Ediadi diavangama kadi nkangu a Isaele wasumukina Yave wa Nzambi au, ona wabavaikisa muna nsi a Engipito yo kubakatula muna wisa kia Faro wa ntinu a Engipito.+ Basambidi* nzambi zankaka,+ 8 balende fu ya zula ina Yave kayinga vana vena Aneyisaele ye fu ina ntinu mia Isaele basikidisa.

9 Aneyisaele bakivene mvimba muna mambu malembi songa vana meso ma Yave wa Nzambi au. Batungidi mabata muna mbanza zau zawonso,+ tuka kuna yingidilu yakuna mbanza yangolo.* 10 Bayidongelekele malunzi mavauka+ ye mavindi mavauka* muna imongo-mongo yawonso ye kuna nsi a nti miawonso miasavuka;+ 11 bayokele ndumbu muna mabata mawonso nze una wavanganga e zula ina kayinga Yave vana bena.+ Bavanganga mambu mambi muna kendeleka Yave.

12 Bakwamanana sadila teke yangemi*+ ina Yave kabavovesela vo: “Ke nuvangi wo ko!”+ 13 Yave wakwamanana lukisa Isaele ye Yuda muna ngunza zandi zawonso ye amoni awonso,+ oku vo: “Nuviluka muna nzila zeno zambi!+ Nulunda nkanikinu miame ye mîna miame mun’owu wa nsiku wawonso una yakanikina kwa mase meno yo kunusamunuina muna ntaudi zame angunza.” 14 Kansi ke bawidi ko, babâdisi ntima miau* nze mase mau ana balembi kwikila muna Yave wa Nzambi au.+ 15 Bakwamanene bembola mîna miandi ye kangu diandi kakanga+ yo mase mau, tuludiku tuna kabavana se lulukisu,+ bakwamanene sadila teke yakondwa mfunu,+ ke bakala diaka mfunu ko,+ batanginina e zula ina yabazunga ina Yave kabakanikina vo ke batanginina yo ko.+

16 Bayambwidi nkanikinu miawonso mia Yave wa Nzambi au, bavangidi teke yole ya sengwa*+ ya wan’a ngombe ye vindi diavauka,*+ bavumbamene e vu kiawonso kia zulu+ yo sadila Bale.+ 17 Bayokele mpe wan’au amakala ye amakento vana tiya,*+ batesese ngombo yo vava mpandu,+ bakivene* muna mavangu mambi vana meso ma Yave muna kunkendeleka.

18 Dianu vo Yave ofungidi Isaele makasi, ubakatwidi vana meso mandi.+ Kasisidi muntu ko, kanda dia Yuda kaka.

19 Kana nkutu nkangu a Yuda ke balunda nkanikinu mia Yave wa Nzambi au ko;+ oyau mpe balanda fu ina yalanda Isaele.+ 20 Yave obembwele mbongo yawonso a Isaele, ubakulwidi yo kubayekola vana moko ma asanzi, yavana kabayinga vana kena. 21 Wakatula Isaele muna nzo a Davidi, oyau batumbikidi Yerobame wa mwan’a Nebate se ntinu.+ Kansi, Yerobame ovukumwini Isaele kimana bayambula landa Yave, wabasumukisa e sumu diampwena. 22 O nkangu a Isaele ukwamanene kangalela muna masumu ma Yerobame.+ Ke bayambwidi mo ko 23 yavana Yave kabakatwidi vana meso mandi nze una kavova muna ntaudi zandi zawonso, angunza.+ Isaele oyalwilu muna nsi andi yo natwa se abakami kuna nsi ya Asuri,+ bakinu kûna yamu unu kiaki.

24 I bosi, o ntinu a Asuri obongele wantu muna Babele, Kuta, Ava, Kamati yo Sefavayime+ ubavingisi vana fulu kia Aneyisaele muna mbanza za Samaria; babongele Samaria se fua diau yo zingila muna mbanza zandi. 25 Kuna lubantiku, ke bavuminanga* Yave ko. Muna kuma kiaki, Yave otwikidi nkosi vana bena,+ zivondele akaka muna nkangu. 26 Bazayisa kwa ntinu a Asuri vo: “E zula ina wanata yo kubavingisa muna mbanza za Samaria ke bazeye sambila Nzambi a nsi ko. Muna kuma kiaki, Nzambi otwikidi nkosi vana bena yo kubavonda, kadi ke mosi ko muna yau ozeye sambila Nzambi a nsi.”

27 Muna kuma kiaki, o ntinu a Asuri okanikini vo: “Nuvutula ko nganga mosi muna nganga zina nuayalula ko, kakala kûna kabalonga una bafwete sambidila Nzambi a nsi.” 28 Mosi muna nganga zina zayalulwa muna Samaria yo natwa kuna kinkole, ovutukidi kuna Betele,+ oyantikidi kubalonga una bafwete vumina* Yave.+

29 Kansi, konso zula kivangidi nzambi au yo kunsia muna masambilu muna mabata mana batunga muna Samaria; konso zula kivangidi wo muna mbanza zina bakalanga. 30 Esi Babele bavangidi Sukote-benote, esi Kuta bavangidi Nengale, esi Kamati+ bavangidi Asima, 31 esi Ava bavangidi Nibekazi yo Tataki. Esi Sefavayime bayokele wan’au vana tiya se yimenga kwa nzambi za Sefavayime,+ i sia vo, Andameleke yo Anemeleke. 32 Kana una vo bavumina Yave, bayitumbikila mpasi wantu se nganga za mabata, ana basadilanga muna masambilu muna mabata.+ 33 Dianu vo, bavuminanga Yave yo sambila mpe nzambi zau mun’owu wa nsambila za zula ina batuka.+

34 Yamu unu kiaki bakinu landa nsambila zau zankulu. Ke mosi ko muna yau osambilanga Yave ngatu lunda mîna miandi, nzengo zandi, Nsiku ye nkanikinu mina Yave kavana kwa wan’a Yakobo ona kasoba nkumbu vo Isaele.+ 35 Vava Yave kakanga yau e kangu,+ wabakanikina vo: “Ke nuvumina nzambi zankaka ko, ke nuvumbamena zo ko yovo sadila zo ngatu kelela zo kimenga.+ 36 Kansi, Yave ona wanuvaikisa muna nsi a Engipito yo nkum’andi yo koko kwandi kwalambuka,+ Yandi nuvumina,+ vumbamena yo kelela kimenga. 37 E mîna miandi, nzengo, Nsiku ye nkanikinu una kanusonekene,+ nutoma mio lundanga, ke nuvumina nzambi zankaka ko. 38 Ke nuvilakani e kangu yakanga yeno ko,+ ke nuvumina nzambi zankaka ko. 39 Nuvumina kaka Yave wa Nzambi eno, kadi yandi okunuvuluza vana moko ma mbeni zeno.”

40 Kansi, ke basidi kumlemvokela ko, balende nsambil’au yankulu.+ 41 E zula yayi bavumini Yave,+ kansi basadidi mpe teke yau yavalwa. O wan’au ye atekelo au yamu unu kiaki bakinu vanga una wavanga mase mau.