Rute yo Naomi

Vava mvengele wakota muna Isaele, nkento mosi wa mwisi Isaele nkumbu andi Naomi, wayenda zingila kuna Moabe kumosi yo nkaz’andi ye wan’au wole amakala. Kuna kwalanda, o nkaz’a Naomi wafwa. O wan’andi basompa akento a esi Moabe, Rute yo Orepa. Diankenda vo kuna kwalanda, wan’a Naomi mpe bafwa.

Vava Naomi kawá vo mvengele kuna Isaele ufokokele, wabaka e nzengo za vutuka kuna nsi andi. Rute yo Orepa bayenda yandi. Kansi muna nzila, Naomi wabavovesa vo: ‘Nu akento ambote nuakala kwa wan’ame, nu wan’ambote mpe kwa mono. Nzolele vo nuasompa akala akaka. Nuvutuka kweno kuna Moabe.’ Bamvutula vo: ‘Zola tutoma kuzolanga. Ke tuzolele kusisa ko.’ Kansi, Naomi wakwamanana kubavovesa vo bavutuka. I bosi, Orepa wavutuka kwandi, kansi o Rute kazola vutuka ko. Naomi wamvovesa vo: ‘Orepa ovutukidi kwa nkangu andi ye kwa nzambi andi. Nda landi mpangi aku a longo, vutuka kuna nzo a ngudi aku. Ongeye mpe wenda kwaku.’ Kansi o Rute wavova vo: ‘Kilendi kusisa ko. O nkangu aku ukala nkangu ame, o Nzambi aku okala se Nzambi ame.’ Aweyi obenze kamona o Naomi vava kawá e mvovo miami mia Rute?

Rute yo Naomi balwaka kuna Isaele kuna lubantiku lwa nkutik’a masa. Lumbu kimosi, Rute wayenda wonzolola e mbongo yasala muna mpatu a Boaze wa mwan’a Rakabi. Boaze Wawá e nsangu vo Rute i mwisi Moabe ona watatidila Naomi. Wazayisa asadi andi vo basisa ndambu a masa muna mpatu kimana Rute keza wonzolola.

Muna masika, Naomi wayuvula Rute vo: ‘Mu mpatu a nani osadidi o unu?’ Rute wavutula vo: ‘Mu mpatu a yakala dimosi una ye nkumbu a Boaze.’ Naomi wamvovesa vo: ‘Boaze yitu kia nkaz’ame. Kwamanana sadila muna mpatu andi ye ndumba zankaka. Ke bekuvanga diambu ko.’

Rute wakwamanana sadila muna mpatu a Boaze yavana e nsungi a nkutika yafokoka. Boaze wamona vo Rute nkwa fululu ye nkento ambote kakala. Muna tandu kiakina, avo yakala ofwidi lembi sisa wana, yitu kiandi osompa nkento kasisidi. Muna kuma kiaki, Boaze wasompa Rute. Bawuta mwana yo kumvana e nkumbu a Obede, ona wawuta se dia Davidi wa ntinu. Akundi a Naomi bayangalala kikilu. Bavova vo: ‘Entete, Yave wavana Rute ona otoma kuzolanga, owau uvene o ntekelo. Yambula Yave kakembelwa.’