Nsilu Wasia Yefeta

Aneyisaele bakolamena diaka Yave yo yantika sambila nzambi zaluvunu. Vava wan’a Amone banuanisa Aneyisaele, e nzambi zazi zaluvunu ke zalenda kubatanina ko. Aneyisaele mu mpasi bakala se vioka mvu miayingi. Kuna kwalanda, basamba kwa Yave vo: ‘Tusumukini. Dododokolo, utuvuluza vana moko ma mbeni zeto.’ Aneyisaele bafwasa e nzambi zau za teke yo yantika sambila diaka Yave. Yave kazola ko vo bakwamanana mona e mpasi.

Yefeta wasolwa mu kala se mfidi a nkangu yo nuanisa wan’a Amone. Wavova kwa Yave vo: ‘Avo utusadisi twasunda e vita yayi, nsidi o nsilu vo vava ivutuka, ikuvana o muntu antete ovaika muna nzo ame mu kwiza kunkika.’ Yave wawá e sambu kia Yefeta yo kunsadisa mu sunda e vita.

Vava Yefeta kavutuka kuna nzo, muntu antete wayiza kunkika i mwan’andi ankento una vo i mwana mosi kaka kakala yandi. O mwana ndioyo wayantika kina yo sika tumbamba. Adieyi Yefeta kadi vanga? Wasungamena o nsilu kasia yo vova vo: ‘Ekwe mwan’ame! Okosomuene ntim’ame. Nsilu yasia kwa Yave. Muna lungisa wo, mfwete kufila wenda sadila muna saba kuna Silo.’ Kansi, o mwan’andi wavutula vo: ‘E tata, wau vo nsilu wasia kwa Yave, ofwete wo lungisa. Edi kaka ilombele vo ungiambula ngienda sakana ye akundi ame a wan’amakento kuna miongo mu ngonde zole. I bosi ikwenda.’ Mwan’a Yefeta wasadila kuna saba ye kwikizi kiawonso muna zingu kiandi kiawonso. Konso mvu, akundi andi bayendanga kunkingula kuna Silo.