Yoane Okubikidi e Nzila

Yoane wa mwan’a Zakaria yo Elisabete wasolwa se ngunza vava kakituka se mbuta. Yave wasadila Yoane mu zayisa wantu vo Masia mu kwiza kena. Kansi, vana fulu kia longela muna masambilu yovo muna mbanza, Yoane walongelanga muna makanga. Wantu batukanga muna Yerusaleme ye muna zunga yawonso ya Yuda kimana balongwa kwa Yoane. Wabalonganga vo muna yangidika Nzambi, bafwete yambula mavangu mambi. Vava bawanga malongi ma Yoane, ayingi bavilukanga o ntima yo vubwa kwa Yoane muna Nkoko a Yodani.

Yoane zingu kiavevoka kakala kiau. Wavuatanga mvuatu miavangilwa mu mika mia samo. Makonko ye wiki kadianga. Wantu bavavanga zaya kana nani i Yoane. Kana nkutu Afarisi ye Asaduki akwa lulendo, bayizanga tala Yoane. Yoane wabavovesa vo: ‘Nufwete soba mavangu meno yo viluka e ntima. Ke nuyindula ko vo nusundidi akaka wau nuvovanga vo nu wan’a Abarayama. Ediadi ke disongele ko vo nu wan’a Nzambi.’

Wantu ayingi bayizanga kwa Yoane yo kunyuvula: ‘Adieyi tufwete vanga muna yangidika Nzambi?’ Yoane wabavovesanga vo: ‘Avo yinkutu yole una yau, vana kimosi kwa ndiona okondelo.’ Nga ozeye ekuma kavovela wo? Wazola vo alongoki andi bazaya vo muna yangidika Nzambi, bafwete zolanga o wantu.

Yoane wavovesa akwa mpaku vo: ‘Nukala akwa ziku, ke nuvuni muntu ko.’ Wavovesa masoladi vo: ‘Ke nubangika wantu ko ngatu vova luvunu.’

Anganga ye Anelevi bayiza mpe kwa Yoane yo kunyuvula vo: ‘Ngeye u nani? Wantu awonso bazolele kuzaya.’ Yoane wavova vo: ‘I nding’a muntu okazanga muna makanga yo sadisa wantu kimana bazaya Yave, nze una Yesaya kasakula.’

Wantu bayangalelanga mana Yoane kabalonganga. Ayingi bayindulanga vo Yoane i Masia. Kansi, wabavovesa vo: ‘Ndiona unsudidi mu kwiza kena. Kiafwana nkutu kutulula nsinga mia nsampatu zandi ko. Mono mu maza ivubilanga wantu, kansi oyandi okubavubila muna mwand’avelela.’