NTU A DIAMBU WA FUKWA | NGA NZAMBI OKUVWANGA KIELEKA MFUNU?
Nga Nzambi Okuvwanga Kikilu Mfunu?
“Mono, mumbona-mpasi yo nkondami; o Mfumu okungindula.”a—DAVIDI WA MWISI ISAELE, MUNA TANDU KIA 11 V.T.K.
“E zula ina nze etonsi dia maza muna nkalu.”—YESAYA 40:15
Nga Davidi wavavanga vo Nzambi kansia sungididi? Nga Nzambi okusianga sungididi? Wantu ayingi ke bekwikilanga ko vo Nzambi wa Mpungu-ngolo okubavwanga o mfunu. Ekuma?
E kuma kadi, Nzambi osundidi wantu awonso o nene. E zula yawonso “ina nze etonsi dia maza muna nkalu, ibadikilu se mbundukutu vana balanza.” (Yesaya 40:15) Mwangi a nsangu mosi ona okatikisanga mabundu wavova vo: “Diampasi kikilu mu kwikila vo vena yo Nzambi ona ovwanga wantu o mfunu.”
Kuna diak’e sambu, vena ye wantu beyindulanga vo mavangu mau mekubavambanisanga yo Nzambi. Muna bonga e nona, yakala dimosi oyikilwanga vo Jim wavova vo: “Nkumbu miayingi ilombanga muna sambu vo Nzambi kansadisa mu kala ye luvuvamu ye volo, kansi ke kolo ko ifunganga makasi. Yayindula vo Nzambi kalendi kunsadisa ko kadi o vilwa wame wingi.”
Nga Nzambi wavavuka kikilu yo wantu ya mu tezo kia lembi kubavwa o mfunu? Aweyi Nzambi kebadikilanga vangwa yandi yalembi lunga? Ka vena muntu ko olenda vana mvutu za yuvu yayi. Kansi, e Bibila kina vo i Diambu dia Nzambi diavumunwinwa kivovanga vo Nzambi kavambana yo wantu ko lembi kubavwa o mfunu. Nkand’a Nzambi uvovanga vo: “Kavavukidi muna konso muntu vava twina ko.” (Mavangu 17:27) Muna malongi maya melanda, tubadika dina Nzambi kevovanga muna songa vo ovwanga konso muntu mfunu.