Vwanga Akaka o Mfunu
1 Diakiese dia mona e ndungunuka ya nkangu a Yave yiwokesanga lutangu lwa nkutakani. Kasikil’owu, muna mvu a salu uviokele nkutakani 46 zampa zivangamene mu Angola! Muna zunga yakaka, maseka ma Kintinu malutidi sadilwa kwayingi, dimonekanga vo nkutakani zayingi zisadilanga Eseka dimosi dia Kintinu. E diadi divavanga vo twazayanga zitaziana.
2 E nkutakani zifwete kalanga ye ngwizani kimana bavelelesanga Eseka dia Kintinu kuna lubatiku ye kuna mfoko a konso lukutanu. Ediadi diamfunu kikilu, kele vo Eseka dia Kintinu mpangi zakaka diaka besadila dio. Diamfunu twasisanga ekunda yatoma kubikwa ye komba Eseka dia Kintinu yo lunda nkanda muna malundilu ma nkanda yo nona elekwa yawonso ya mwangana muna Eseka dia Kintinu. E nzo zakete zifwete veleleswanga kuna mfoko a konso lukutakanu, i sia vo sadila lixivia ye detergente mu sukula zo, tula e papela higienico yo veta e titi.
3 Kele vo nkutakani yakaka yivinga mo, awana bavitidi o kutakana bafwete vaika nzaki mu sisa e fulu kwa mpangi bekwiza kota muna Eseka dia Kintinu. O mwelo wa Eseka dia Kintinu ulenda zala yo wantu kele vo ampangi bazolele mokena vana mwelo, ediadi dilenda vunzanesa ampangi bekubamanga mu yantika lukutakanu lwau. Dilenda kala vo efulu kia ningamena makalu kiakete, muna diadi awana bavitidi bafwete katulanga makalu mu nzaki mu kuma kia mpangi bevinga. Kuna diak’esambu, awana bekala muna lukutakanu lulanda ke bafwete vita lwaka ola yanda ko, muna lembi vava ofientana mu vioka muna mwelo ye nzo zakete ye muna fulu ya ningamesena makalu.
4 Avo nkutakani zayingi zisadilanga Eseka dia Kintinu, diamfunu bakalanga ye ngwizani ambote mu kuma kia nkubika ya velelesa dio. E nkutakani zifwete kubikanga luveleleso ntangwa ke ntangwa. Nkutakani zawonso, ke kolo ko zatambwidi nkanda wavovele edi dia velelesa ye vangulula Eseka dia Kintinu yo songa mpila dilenda vangilwanga muna konso lumingu, ngonde ye mpila ya vangulula dio konso ngonde tatu. Diamfunu mu kala ye sadilwa yafwana mu vangila luveleleso, i sia vo kala ye sesa, lekwa ya sia maza muna sukulwila Eseka dia Kintinu, nlele mia kusunwina e mvindu ye pelo ya katulwila e titi. Bafwete kalanga ye nkubika zambote za kalanga ye maza mafwana mu toma velelesa Eseka. Vava e nkutakani aku ikalanga ye mbebe ya velelesa Eseka dia Kintinu, vanganga luzolo lwa vana moko. Muna mpila yayi e nkutakani zakaka zisadilanga Eseka, ke bekala y’owu wa yidimina ko.
5 Ezak’e ntangwa e nkutakani zisobanga e lumbu ya lukutakanu lwau, nze muna lumingu lwa nkingul’a nkengi a zunga. Kele vo nkutakani imosi ikingulwa, akuluntu a nkutakani zakaka bafwete teka zayiswa kimana ateleki bazaya wo. Kele vo vekala ye nkubika yavaninw’o nswa, nze Sikola ya Aviti a nzila a ngonde ke ngonde, Lukutakanu lw’akuluntu a zunga yovo lukazalu, akuluntu ye akengi a zunga a nkutakani zozo bafwete teka zayiswa. E diadi divanga vo o yau balembi kubika salu yakaka ya sadila Eseka dia Kintinu muna ola yayina.
6 Ezak’entangwa, maseka ma Kintinu mesadilwanga kwa nkutakani za zunga kiakaka. Diamfunu akengi a zunga bekingulanga e nkutakani zozo bazayisanga akwau e nkubika zau za nkingula. Dilenda kala vo diambu bevava soba yovo nkakalakani zakaka zilenda bwa vava akengi a zunga wole bekubikanga nkingula mu lumingu lumosi.
7 O vwang’akaka o mfunu, kala ye mbokena zambote yo teka kubama kusadisanga mu kala yo ungudi ye nkutakani zakaka kimana vo “mambu mawonso, mavangilwa muna nsongi yo wete.”—1 Korinto 14:40.