Ubavana e Nginz’ambote

Kwa aki nani tuvana e ngiz’ambote? Kwa awonso bekwizanga mu tukutakanu tweto twa Kikristu. Kiakala wantu ampa yovo akundi eto. (Roma 15:7; Ayib 13:2) Dilenda kala mpe mpangi otukidi ku nsi yakaka yovo Nkristu wayoya muna mwanda ona ke kwizanga diaka mu tukutakanu ko se vioka mvu miayingi. Kele vo ngeye, yindula una wadi mona. Nga kwadi zola ko vo watambulwa kuna ngemba zawonso? (Mat 7:12) Muna kuma kiaki, vanganga e ngolo za lwaka mu ola muna Seka dia Kintinu mu kayisa akaka una lukutakanu ke lwayantikidi ko ye kuna mfoko a lukutakanu. Ediadi disadisa mu siamisa o zola kwaku muna akaka yo vana nkembo kwa Yave. (Mat 5:16) Kieleka ke dilendakana ko mu mokena yo wantu awonso bekwizanga mu lukutakanu. Kansi, avo yeto awonso tuvangidi ngolo, awonso beyangalala.a

E fu kia zola nzenza ke kilendi songwa kaka ko muna ntangwa Luyindulu, kansi ntangwa zawonso. Vava wantu ampa bekwizanga mu tukutakanu yo mona o zola kwa Kikristu muna mavangu, dikubafilanga mu kembelela Nzambi yo kutuyikama muna nsambil’a velela.—Yoa 13:35.