Nga Ozeye?

Ekuma Bibila kivutukilanga mambu mau mamosi?

EZAK’E NTANGWA, asoneki a Bibila bavutukila mambu mau mamosi. Badika mambu tatu mabafila mu vanga e diambu diadi:

Kolo masonekwa. Kuna Isaele yankulu, ayingi muna nkangu ke bakala ye kopi za Nsiku ko. Nkumbu miayingi, bawanga e ntangilu a Nsiku vava nkangu wakutakananga muna saba ye muna tempelo. (Nsi. 31:10-12) Nanga vakala ye mambu mabavunzanesanga ekolo bakala batelama mu ola zayingi mu wa o Nsiku watangwanga vana fulu kia ndonga. (Nek. 8:2, 3, 7) Muna ntangwa yayina, ovutukila mambu mamfunu diadi sadisa nkangu mu sungamena sono yo sadila yo. Diadi kubasadisa mpe mu sungamena nsasa za mambu mamfunu nze nsiku mia Nzambi ye nzengo zandi.—Lev. 18:4-22; Nsi. 5:1.

Mpila yasonekena. E nkanda miankaka mia Bibila miasonekenua mu mpila ya nkunga nze nkand’a Nkunga, Nkung’a Solomo ye Maniongo ma Yeremiya. Ezak’e ntangwa, mu nkunga miankaka muna ye mvovo mivutukilwanga. Ediadi diasonganga o mfunu wa ntu a diambu wa nkunga yo sadisa nkangu mu sungamena e mvovo miami. Muna bonga e nona, tala e mvovo mina muna Nkunga 115:9-11: “Isaele, bunda Yave e vuvu—yandi i nsadisi aku ye ngubu aku. E nzo a Arone, bunda Yave e vuvu—yandi i nsadisi aku ye ngubu aku. E yeno nuvuminanga Yave, nubunda Yave e vuvu—yandi i nsadisi eno ye ngubu eno.” Kieleka, ovutukila mvovo diasadisa ayimbidi mu lunda e mvovo miami muna ngindu zau ye ntima.

Mfunu watoma kiesesa mambu masina. Ezak’e ntangwa, asoneki a Bibila bavutukilanga mambu mamfunu. Muna bonga e nona, vava Yave kakanikina Aneyisaele vo ke badie menga ko, wavovesa Mose kavutukila diambu diadi nkumbu miayingi. Nzambi wazola kiesesa vo moyo a konso vangwa i menga mandi, i sia vo, menga moyo mesunzulanga. (Lev. 17:11, 14) Kuna kwalanda, vava antumwa ye akuluntu kuna Yerusaleme basoneka e mambu mana Akristu bafwete venga muna lembi kendeleka Nzambi, batoma kiesesa diaka e diambu dia venga menga.—Mav. 15:20, 29.

Kana una vo Bibila kivutukilanga e mvovo, Yave kazolele ko vo twakala ye fu kia vutukilanga mvovo. Kasikil’owu, Yesu wavova vo: “Vava osambanga, kuvutukilanga mambu mau mamosi ko.” (Mat. 6:7) I bosi, Yesu wayika mambu tulenda lomba muna sambu mana mena ngwizani ye luzolo lwa Nzambi. (Mat. 6:9-13) Kanele vo tufwete venga e fu kia vutukilanga mvovo miau mimosi muna sambu, kansi ke diambi ko mu vutukila lomba mambu mau mamosi.—Mat. 7:7-11.

Vena ye kuma yayingi e Diambu dia Nzambi divutukilanga miaka mvovo ye mambu. Kimosi muna kuma yayi, i mpila o Nlongi eto Wanene kekutulongelanga mambu muna wete dieto.—Yes. 48:17, 18