Nga Ozeye?

Ekuma e nkunga miakadila o mfunu kuna kwa Aneyisaele?

NKUNGA mfunu kikilu miakala muna kinkulu kia Isaele. E Bibila nkumbu miayingi kivovelanga wantu bayimbilanga yovo sika masikilu. Nkanda miankaka ye sono yayingi muna Bibila i nkunga, nze i nkand’a Nkunga, Nkung’a Solomo ye Maniongo ma Yeremiya. Nkanda umosi uvovelanga e zingu kia nz’ankulu uvovanga vo, e Bibila “kitoma songanga vo Aneyisaele bakala ye fu kia yimbila nkunga muna salu yau ya lumbu ke lumbu.”

Nkunga muna salu ya lumbu ke lumbu. Aneyisaele bayimbilanga nkunga muna songa kiese yovo ntantu zau. (Yes. 30:29) Akento basikanga yingoma-ngoma, bayimbilanga nkunga ye kiese kiawonso yo kina muna nkinzi mia nsambila, vava kiatumbikwanga atinu ye vava makesa basundanga e vita. (Afu. 11:34; 1 Sam. 18:6, 7; 1 Nti. 1:39, 40) Aneyisaele bayimbilanga mpe muna songa e ntantu zau vava bafwilwanga. (2 Tus. 35:25) Nze una uvovanga nkanda umosi, kalukatikisu ko vo “Ayibere nkangu wa ayimbidi bakala.”

Nkunga muna lumbu lwa ntinu. Atinu a Isaele mpe batoma zolanga miziki. Kasikil’owu, Saulu wa Ntinu wabokelesa Davidi kuna lumbu lwa ntinu kimana kansikilanga e kokolo. (1 Sam. 16:18, 23) Muna mvu mialanda, vava yandi kibeni Davidi kakituka se Ntinu wavanga masikilu, wasoneka nkunga miambote-mbote ye wakubika buka kia ayimbidi ana bayimbilanga muna tempelo a Yave. (2 Tus. 7:6; Am. 6:5) Solomo wa Ntinu wakala ye ayimbidi a wan’a makento ye wan’a makala kuna lumbu lwandi.—Kim. 2:8.

Nkunga muna nsambila. Edi disundidi o mfunu, Aneyisaele basadilanga e nkunga muna sambila Yave. Muna bonga e nona, vakala ye 4.000 ma wan’a makala basikanga e miziki muna tempelo kuna Yerusaleme. (1 Tus. 23:5) Basikanga yimbalu, nsambi, kokolo ye mpungi. (2 Tus. 5:12) Kansi ke yau kaka ko basambilanga Yave ye miziki. Aneyisaele ayingi bayimbilanga e nkunga ekolo bayendanga muna nkinzi kuna Yerusaleme. Miankaka muna nkunga miami, miayikilwanga vo Nkung’a Ntomboka. (Nku. 120–134) Landila nkanda miankaka mia Ayuda, Aneyisaele bayimbilanga e Nkunga mia Aleluya,a yovo nkunga mia kembelela Yave vava badianga e Nduta.

E nkunga miakinu o mfunu kuna kwa nkangu a Nzambi. (Yak. 5:13) O yimbila i dimosi muna nsambil’eto. (Efe. 5:19) Vava tuyimbidilanga Yave kumosi ye mpangi zeto, e kintwadi kieto kitoma kumamanga. (Kol. 3:16) Vana ntandu, e nkunga mitoma kutusadisanga vava tukalanga mu mpasi. (Mav. 16:25) Ke lukatikisu ko vo, e nkunga i mpila yambote yasongela lukwikilu yo zola kweto muna Yave.