12. Sikidisa Makani

AWEYI DISONGELE?

O kala ye kani ke lota ndozi ko yovo mpasi diambu dina ozolele vo diavangama. Muna kala ye kani diasikila divavanga vo watoma kubama, kulukilwa yo vanga e ngolo za lungisa mana osikidisi.

Tulenda sikidisa makani ma kolo kiakete, i sia vo, makani mana tulenda lungisa mu lumbu yovo mu tumingu twakete. Tulenda mpe sikidisa makani mana tulenda lungisa mu ngonde zakete. Vana ntandu, tulenda mpe sikidisa makani mana tulenda lungisa mu kolo kiandá, i sia vo, mu mvu umosi yovo lutila. O makani ma kolo kiakete malenda kutusadisa mu lungisa makani ma kolo kiandá.

EKUMA DININA O MFUNU?

O lungisa makani maku, dilenda kusadisa mu kumika e ngwizani aku yo wantu ankaka yo kufila mu kuyibunda e vuvu yo wokesa e kiese kiaku.

Kuyibunda e vuvu: Avo olungisi makani maku ma kolo kiakete, okala ye ziku vo olenda lungisa makani maku ma kolo kiandá. Dikusadisa mpe mu kala ye vuvu vo osunda e mpasi za lumbu ke lumbu nze, ntonta za akwaku a sikola.

Yikundi: Wantu awonso bezolanga kala vamosi ye wantu ana bena ye makani muna zingu, i sia vo, wantu ana bazeye mana bazolele muna zingu ye bevanganga mawonso muna mo lungisa. Kasikil’owu, avo ngeye yo nkundi aku kani dimosi nuna diau, osala e ntwadi muna dio lungisa dikumika kikundi kieno.

Kiese: Vava ovanganga mawonso muna lungisa makani maku, kiese kiayingi omona.

“Izolanga sikidisa makani. Dikunsadisanga mu lembi kondwa e salu yo kala ye kani muna zingu. O lungisa e kani wasikidisa, kiese ditwasanga yo kufila mu yindula vo: ‘Ekwe! ndendele lungisa mana yasikidisa!’”—Christopher.”

DINA BIBILA KIVOVANGA: “Ndiona otalanga e tembwa ke kuna mbongo ko, ona otalanga matuti ke kutika ko.”—Kimpovi 11:4.

MANA OLENDA VANGA

Tala maka mambu olenda vanga muna sikidisa yo lungisa makani maku.

Sola mana ovanga. Soneka makani mana olenda lungisa. I bosi, sia mo muna ndandani, kani diantete ozolele lungisa, diazole, diatatu ye mana malende.

Kubama. Muna konso kani osikidisa vanga o mambu malende:

• Sikidisa e ntangwa ozolele lungisa e kani diaku.

• Yindula o mambu ofwete vanga.

• Yindula e nkakalakani olenda wanana zau ye una olenda zo sundila.

Ntangwa ya vanga e diambu. Ke divava ko vo wakubika mawonso vitila wayantika vanga e diambu. Ukiyuvula: ‘Nkia diambu diantete ndenda vanga muna lungisa e kani diame?’ Lembi viokesa e ntangwa yayingi, vanga e diambu diadi yo sia e sungididi muna lunungunuku lwaku ekolo ovanganga e mambu mankaka.

DINA BIBILA KIVOVANGA: “E makani ma nkwa fululu nluta metwasanga.”—Ngana 21:5.