E NZA YANKINDA-NKINDA

1 | Tanina o Vimpi Waku

EKUMA DININA DIAMFUNU?

O kondwa kwa nzimbu yovo bwila sumbula dilenda twasa e mpasi muna zingu kia wantu mu mpila zayingi.

O bwila e sumbula kutoma kendelekanga wantu ye avo muntu okwamanene kendalala, kuna kulanda, olenda bakama kimbevo.
O kondwa kwa nzimbu kulenda wokesa e mpasi muna tupitalu yo lembi kala ye nlongo miafwana mu toma wuka mbevo zayingi.
E sumbula yikitulanga e zingu kia wantu se kiampasi muna sumba lekwa bavuidi o mfunu, nze madia ye nlongo.

Nkia Mambu Ofwete Zaya Muna Tanina o Vimpi Waku?

Yimbevo yangolo ye ntokani zasaka zilenda kufila mu yambula lunga-lunga o vimpi waku. Muna mpila yayi, olenda kituka se mbevo kikilu.
Avo kuvavidi mawuku ko mu kuma kia kimbevo una kiau, e kimbevo kilenda wokela ye olenda nkutu fwa.
Ozevo, avo otomene lunga-lunga o vimpi waku, okala wakubama mu baka e nzengo zambote avo mambu mampasi mabwididi.
Kiakala vo u mvuama yovo nsukami, olenda vanga diambu muna tanina o vimpi waku.

Adieyi Olenda Vanga Owau?

O nkwa ngangu oteka yindulanga mambu malenda kuntwasila e vonza yo vanga diambu muna venga mo. I diau mpe olenda vanga muna tanina o vimpi waku. O kala nkwa unkete dilenda kusadisa mu venga yimbevo yovo bakama kimbevo kiangolo. Kingana kimosi kivovanga vo, ekolo nlembo ke walwele ko, kanga wo e tenda.

“Okala nkwa unkete dikutusadisanga mu lembi fwasa nzimbu zayingi mu vava mawuku kwa dotolo ngatu sumba nlongo ntangwa zawonso.”—Andreas.a

a E nkumbu zankaka muna Sikama! yayi zasobwa.

AWEYI OLENDA ZIZIDILA?—Mambu Olenda Vanga

Muna kolo kiampasi, e mambu mama mekusadisa mu tanina o vimpi waku.

KALANGA NKWA UNKETE

Kalanga nkwa unkete

Bibila kivovanga vo: “O nlungaladi omwene vonza, oswekamene.” (Ngana 22:3) Teka yindulanga yo venga mambu malenda sia o vimpi waku mu vonza.

Toma sukulanga e moko ye sabuni ntangwa zawonso, mu sungula vitila wasimba madia yovo vava otukanga kuna nzo akete.
Kalanga ye fu kiatoma velelesa e nzo aku yo sukula (desenfectar) e lekwa itoma simbwanga yovo sadilwa.
Avo dilendakana, venganga okala vamosi ye awana bena ye kimbevo kisambukilanga.

DIANGA MADIA MEKUTWASILA VIMPI WAMBOTE

Dianga madia mekutwasila vimpi wambote

Bibila kivovanga vo: “Kavena muntu ko omenganga e nitu andi, kansi odikilanga yo lunga-lunga yo.” (Efeso 5:29) Tusonganga vo tutoma lunga-lunganga e nitu eto muna venganga o dia yovo nua lekwa ilenda kututwasila yimbevo.

Nuanga maza mayingi.
Dianga e bundu ye ndunda za mpila mu mpila.
Venganga osadila yovo dia mazi, mungwa ye sukadi zayingi.
Kunuenge fomo ko yovo malavu mayingi mankolwa ngatu viokesa e tezo muna nlongo.

“Muna venga yimbevo, tusianga e ngolo za dia madia mekututwasila vimpi wambote. Vana fulu kiafwasanga nzimbu zayingi muna kwenda kwa dotolo ngatu sumba nlongo, tusadilanga e nzimbu zeto mu sumba madia mekututwasila vimpi wambote.”—Carlos.

NANANGA E NITU YO LEKANGA TULU TWAFWANA

Nananga e nitu

Bibila kivovanga vo: “O vunda fiakete kusundidi ke mu salu kiangolo ko, kadi ediadi dina nze landa e tembwa.” (Kimpovi 4:6) O sala mfunu kwina, o vunda mpe mfunu kwina.

Nananga e nitu. Olenda yantikila muna kangalanga kiamalu nkumbu miayingi muna lumingu. O nana e nitu dilenda kusadisa mu kala yo vimpi wambote kana nkutu vo u nunu, mvanguki yovo kimbevo kilembi sasukanga una kiau.
Lekanga tulu twafwana

Lekanga tulu twafwana. Avo kulekanga tulu twafwana ko, ediadi dilenda wokesa e ntokani zaku yo lembi sia e sungididi muna mambu. Kuna kulanda, olenda bakama kimbevo kiangolo.
Kalanga ye ola yasikididi ya kwenda vana mfulu yo zitisa yo. Olenda sikidisa e ola ofwete lekanga ye ola ofwete sikama lumbu yawonso.
Venganga e fu kia talanga televizau yovo sadila telefone ye lekwa yankaka ekolo una vana mfulu.
Venganga o dia kwayingi, nua kafe yo malavu mankolwa vitila wenda leka.

“Yabakula vo o tulu twame diambu tuvanganga muna vimpi wame. Avo kitomene leka ko, o ntu ame ulunzanga, e nitu ame mpe iyoyanga. Kansi, avo ntomene leka, e nitu ame yambote ikalanga yo vanga mawonso mvuidi o mfunu. Ikalanga yo nkuma wafwana ye kitoma yelanga ko.”—Justin.