Noa Otungidi e Nzaza

NOA nkento mosi kakala yandi yo wan’atatu amakala, Seme, Kami yo Yafete. Yau mpe bakala y’akazi au. Ozevo, e nzo ya Noa enana dia wantu bakala.

Nzambi wavovesa Noa vo katunga nzaza yampwena. ‘Kasia yo banga tatu.’ ‘Kavambula masuku.’ Esuku dia Noa y’esi nzo andi, esuku dia bulu ye dia madia bedia yau awonso.

O Nzambi wavovesa mpe Noa vo katoma tunga e nzaza yalembi kota maza. Wavova: ‘Omono ntwasa kizalu kia maza kiafwantakesa nza yawonso. Konso ndiona olembi kala muna nzaza ofwa.’

O Noa ye wan’andi balemvokela Nzambi yo yantika tunga e nzaza. Kansi, wantu akaka seva kaka basevanga. Bakwamanana vanga o bi. Ke vakedi mosi ko wakwikila mu mvovo mia Noa mu mana kevanga o Nzambi.

E nzaza kolo kiayingi yatungwa kadi yampwena kikilu yakala. Vioka mvu miayingi yamanisa o tungwa. Nzambi wavovesa Noa vo kakotesa bulu muna nzaza. Muna bulu ke yavelela ko nwole nwole, ekoko ye nkento. Muna ina yavelela nsambwadi nsambwadi. Nzambi wavovesa mpe Noa vo katwasa mpila zawonso za nuni. O Noa ovangidi mawonso kankanikina o Nzambi.

I bosi, Noa y’esi nzo andi yawonso bakota muna nzaza. O Nzambi ozikidi e kielo. O Noa y’esi nzo andi bavingila muna kati kwa nzaza. Se badiki vo ongeye una yau muna kati kwa nzaza yo vingila. E kizalu nga kikwiza kieleka nze una kavova o Nzambi?