Yosefe Omengeno kwa Mpangi Zandi

TALA etoko diadi dikendalele kikilu. I Yosefe. Ampangi zandi bantekele kwa wantu bayendanga kun’Engipito. Ekuma bavangila diambu diadi diambi? Kimpala bamwenanga.

O Yakobo w’es’au watoma kunzolanga. Wantungila kinkutu kiambote, kianda. Vava mpangi zandi 10 bamona vo o Yakobo olutidi zola Yosefe ke mu yau ko, bayantikidi kumwena kimpala yo kumenga. Kansi, vena ye diambu diakaka bamengenanga.

O Yosefe walota ndozi zole. Muna zau zole, wamona mpangi zandi bamvumbamena. Vava kabazayisa ndozi zozo baluta kumenga.

Lumbu kimosi vava mpangi za Yosefe bayenda dikil’ekambi di’es’au, o Yakobo otumini Yosefe kenda kubatala kana vo bena kiambote. Vava mpangi za Yosefe bamona kuna vala, akaka bavovele vo: ‘Yambula twamvonda.’ Kansi, o Rubeni wa mpangi au ambuta ovovele vo: ‘Ke nuvangi dio ko.’ Ikuma, bambongele, bantubidi mun’ewulu, diakondwa maza. Bavwende mu yindula dina bekumvanga.

Muna kolo kiakina, bamwene Aneyisemaele baviokanga. O Yuda ovovese ampangi zandi vo: “Nwiza, twanteka kwa Aneyisemaele.” Idiau bavanga. Batekele Yosefe muna palata 20. Ediadi diambi kikilu.

Adieyi bevova kw’es’au? Bavondele nkombo. Babongele kinkutu kia Yosefe bazazidi kio o menga ma nkombo. Batwese kio kwa Yakobo w’es’au bavovele vo: ‘Kiaki tusolwele: tala kana i kinkutu kia Yosefe, ovo ke kiau ko.’

O Yakobo otonene kio. Obokomokene ye dilu oku vo: ‘Bulu kia futa kindidi.’ Ampangi za Yosefe i una mpe bavava vo o s’au kabadika. O Yakobo okendalele kikilu. Wandidila lumbu yayingi. Kansi, o Yosefe kafwa ko. Yambula twatala dina diambwila kuna kanatwa.