Nkwa Ngolo

NG’OZEYE nkumbu ya nkwa ngolo wazinga kala? Nkumbu andi Samesone, mfundisi kakala. Yave wavana Samesone e ngolo. Una Samesone kawutukidi ko, o Yave wavovesa ngw’andi vo: ‘O wuta mwana, yandi ovuluza Isaele vana koko kwa Afelesetia.’

Afelesetia bazingilanga muna nsi a Kenani wantu ambi bakala. Bakala yo makesa mayingi ma vita yo bangikanga Aneyisaele. Lumbu kimosi vava Samesone kayenda kuna bazingilanga Afelesetia wawanana ye nkosi anene. Kansi o Samesone wamvonda mu moko. Wavonda mpe ulolo wa Afelesetia.

Ke kolo ko, o Samesone obandidi kimakangu yo nkento nkumbu andi Delila. Amfumu za Afelesetia bavovesa Delila vo bekumvana 1.100 ya palata ovo ubasamunwini kuna kutukanga e ngolo za Samesone. Delila wazola baka e nzimbu zazi. Kakala nkundi ambote a Samesone ko ngatu nkundi a nkangu a Nzambi. Ozevo, wakwamanan’o yuvula Samesone kana akweyi kwatukanga e ngolo zandi.

O Samesone unsamunwini e mbumba. Umvovese vo: ‘E nsuki zame ke zizengwanga ko. Tuka yawutukila Mvauki yakala kwa Nzambi, wansola se selo kiandi. Ovo nzengelo e nsuki e ngolo zame zikunkatuka.’

Vava Delila kazaya wo, olekese Samesone muna nkat’andi. I bosi, obokele muntu kazenga nsuki zandi. O Samesone vava kasikama, kasidi diaka ye ngolo ko. Afelesetia bezidi kunkanga. Bandungwini o meso, bankitwidi se mbundu au.

Lumbu kimosi Afelesetia bavangidi nkinzi anene kwa Dangone wa nzambi au. Batumisi Samesone muna pelezo bansakanina. Muna kolo kiaki, e nsuki za Samesone zayantika o mena. O Samesone ovovese kindende kina kiansimb’o koko vo: “Ungyambula yasimba malunzi mana matensamene e nzo.” O Samesone osambidi kwa Yave kamvana e ngolo. I bosi, oyekamene o malunzi. Okazidi vo: “Mbula yafwa kumosi ya Afelesetia.” Vava Samesone kayekama malunzi ma nzo, e nzo ibwididi, 3.000 ma Afelesetia bakembelanga mo bafwa.