Yakobo yo Esau Bavutulwisi e Ngwizani

Yave wasia nsilu kwa Yakobo vo okuntanina nze una katanina Abarayama yo Isaki. Yakobo wayenda zingila kuna nsi a Karani, i kuna kasompela yo wuta wana ayingi. Wakituka mvuama.

Kuna kwalanda, Yave wavovesa Yakobo vo: “Vutuka kuna nsi a mase maku.” Muna kuma kiaki, Yakobo ye esi nzo andi bayantika nkangalu wandá. Ekolo bayendanga, wantu bayiza zayisa Yakobo vo: ‘E mpangi aku mu kwiza kena ye 400 za wantu.’ Yakobo wamona wonga kadi wabanza vo Esau okumvanga e mbi kumosi ye esi nzo andi. Wasamba kwa Yave vo: ‘Umvuluza do, vana koko kwa mpangi ame.’ Muna lumbu kialanda, Yakobo watwikila Esau tukau twa mameme, nkombo, ngombe, samo ye mabuluku.

Muna fuku, vava Yakobo kakala va yandi mosi kaka, wamona mbasi. O mbasi wayantika nuana yo Yakobo. Banuana yavana kuma kwakiá. Kana una vo Yakobo walwala ekolo banuananga, kayoya ko. O mbasi wavova vo: ‘Ungyambula mfwete kwenda.’ Kansi, Yakobo wavova vo: ‘Kikuyambula ko yavana okunsambula.’

I bosi, o mbasi wasambula Yakobo. Owau, Yakobo wakala ye ziku vo Yave ke yambula ko vo Esau kamvanga e mbi.

Muna mene wauna, Yakobo wamona Esau kuna vala kumosi ye 400 za wantu. Vava Yakobo kafinamanga vana ndambu a Esau, wavumbama nkumbu nsambwadi vana ndose a mpangi andi. Esau wayenda ntinu vana vakala Yakobo yo kumbimba. Yau nzole bayantika dila, bavutulwisa e ngwizani. Aweyi obenze kamona o Yave mu mpila ina Yakobo kasingikila e mambu?

I bosi, Esau wavutuka kuna nzo andi. Yakobo mpe wavutuka kuna nzo andi. Yakobo wana 12 kakala yau. E nkumbu zau Rubeni, Simone, Levi, Yuda, Dani, Nafetale, Ngadi, Asere, Yisaka, Zebulone, Yosefe yo Benyamini. Mosi muna wana awaya, i sia vo, Yosefe wasadilwa kwa Yave mu vuluza nkangu andi. Nga ozeye mu nkia mpila? Yambula twazaya.